Maika 7 - Vakavakadewa Vou kei na iVola tale eso

Na i Tovo Boi Ca ni Isireli

¹ Sa sega na i nuinui! Au sa vaka e dua na tamata sa viakana tu ka sega ni kunea e dua na vuanikau se qerepi me bau vo tu e vuna. Sa veti taucoko sara ga na qerepi kei na vuanilolo kamikamica.

² Sa sega sara ni dua na tamata dina e vo tu ena vanua oqo, sa sega sara ni dua e dina vua na Kalou. Era sa mate oti kecega. Na tamata kecega sa waraka voli ga na gauna vinaka me laba kina. Na tamata kecega sa dui vakasasataka tale na wekana.

³ Era sa kena dau kece sara ena cakacaka ca. O ira na vakailesilesi kei ira na turaganilewa era vinakata kecega na veivaqumi, na i lavo ni veitemaki me ra taura lo. Na tamata kilai ka daurogoci na nona vosa sa dautukuna ga vei ira na ka e vinakata, ka ra sa qai daubosea vata ka sa sega kina na lewa dodonu.

⁴ O ira sara mada ga na nodra tamata nuitaki ka dina era vaka ga na kau vakavotona. Ia sa yaco mai na siga me na totogitaki ira kina na tamata na Kalou, me vaka sa veivakasalataki oti kina ena gusudra na i vakatawa, o ira na parofita. Era sa qai veilecayaki tu ena gauna oqo.

⁵ Kakua ni vakabauti koya na wekamu sa tiko volekati iko se vakadinati koya na nomu i tokani voleka. Mo qarauna vinaka sara mada ga na ka o tukuna vua na watimu.

⁶ Ena gauna oqo, o ira na tagane era sa dauraici ira sobu ga na tamadra me vaka era sa lialia, o ira na yalewa era sa dauveisaqasaqa ga kei na tinadra, kei ira na goneyalewa vakawati era sa dauveiba ga kei na nodra i sa, se vugodra yalewa; na kena meca e dua na tamata sai ira ga na lewe ni nona matavuvale.

⁷ Ia oi au, ka'u na rai ga vei Jiova; ka'u na waraki koya na Kalou, na noqu i vakabula. Ena rogoci au na noqu Kalou.

Sa Kauta mai na Veivakabulai o Jiova

⁸ Sa sega e dua na vuna me ra raici keda kina ena marau o ira na keda meca. Eda sa bale, ia eda au na tucake tale. Eda sa tiko ena butobuto ena gauna oqo, ia ena qai vakararamataki keda o Jiova.

⁹ Eda sai valavala ca vei Jiova, ia oqo, sa dodonu me da vosota vakalailai mada na nona cudru. Ia, e muri ga ena qai valataka o koya na ka me baleti keda ka vakadodonutaka na cala sa vakayacori oti vei keda.

¹⁰ Era na qai raica na ka oqo na keda meca ka ra na qai madua kina - o ira na meca era a vakalialiai keda ena nodra taroga, “Sa tiko e vei na Turaga na nomuni Kalou?” Ia eda na raica dina ga ni ra sa vakamalumalumutaki ka buturaki sobu me vaka na qele soso e gaunisala.

¹¹ Kemuni na kai Jerusalemi, sa toro voleka tiko mai na gauna me caka vou tale kina na bainikoro. Ena gauna o ya ena qai vakalevutaki cake kina na nomuni yalayala ni vanua.

¹² Era na qai lesulesu tale mai vei kemuni mai na veivanua kecega o ira na wekamuni — mai Asiria vaka ki na tokalau, mai Ijipita vaka ki na ceva, mai na veiwasawasa yawa kei na veiulunivanua yawa.

¹³ Ia na vuravura ena qai yaco me vaka na vanua dravuisiga baleta ni ra sai tovo ca na lewena.

Na Loloma i Jiova vei Isireli

¹⁴ I Jiova, mo ni vakatawai ira na nomuni tamata, o ira o ni sa digitaka. E dina ga ni ra sa bula vakatikitiki voli ga ena vanua lala, ia sa tu wavokiti ira na qele bulabula. Ni laivi ira me ra lako ka la'ki kana ena veivanua bulabula ka sautu ni veivanua mai Pasani kei Kiliati, me vaka era sa vakayacora oti ena gauna eliu sara.

¹⁵ Ni vakayacora mada na cakacaka mana eso ena vuku i keimami, me vaka na veisiga eso o ni a kauti keimami tani kina mai Ijipita.

¹⁶ Era na raica na veivanua na ka oqo ka ra na qai veilecayaki, ka dina ga ni sa tu vei ira na kaukauwa. Era na tabonaka na gusudra ena ligadra ka ubia na daligadra ni ra sa kidacala.

¹⁷ Era na dolo ena kuvu ni qele me vaka na gata; era na qasi cake mai na nodra i vunivuni ena sautaninini kei na rere. Era na qai saumaki mai vua na Kalou o Jiova ena yalo rere.

¹⁸ I Jiova, sa sega tale ni dua na kalou me vakataki kemuni; o ni sa vosota na nodra i valavala ca na nomuni vo-ni-bula era sa vakabulai. O ni sa sega ni cudru tikoga me tawa mudu, ia o ni sa marautaka ga mo vakaraitaka vei keimami na nomuni loloma sa sega ni yalani.

¹⁹ O ni na yalololoma tale vei keimami. O ni na buturaka sobu na neimami i valavala ca ka vakalutudromutaka ki na boto ni wasawasa!

²⁰ O ni na vakaraitaka na nomuni yalodina kei na loloma sa sega ni yalani vei ira na nomuni tamata na Isireli, na kawa i Epara-ama kei Jekope, me vaka o ni a yalataka vei ira na neimami qase ena gauna e muri sara.