Maika 6 - Vakavakadewa Vou kei na iVola tale eso

Sa bolei Isireli na Kalou

¹ Ni rogoca mada na bolebole i Jiova me baleti Isireli. I Jiova, mo ni mata cake, ka vakaraitaka na nomuni lewa; ni laiva me ra rogoca na veiulunivanua kei na veidelana na ka o ni sa tukuna.

² Oi kemuni na veiulunivanua, oi kemuni na yavu dei kei vuravura, mo ni rogoca mada na vosa ni bolebole i Jiova! E dua na ka sa bolei ira kina na nona tamata o Jiova. Sa na vakamacalataka o koya na ka me beitaki ira kina na Isireli.

³ A sa kaya o Jiova, “Kemuni na noqu tamata, na veika cava beka au sa vakayacora vei kemuni? Au sa vakaicolacolataki kemuni li vakaevei? Ni sauma na noqu taro.

⁴ Au a kauti kemuni tani mai Ijipita. Au a vakabulai kemuni mai na veivakabobulataki. Au a vakatalai Mosese kei Eroni kei Miriama me ratou liutaki kemuni mai.

⁵ Kemuni na noqu tamata, ni nanuma mada na ka sa nakita me cakava vei kemuni o Pelaki na tui Moapi kei na i lakolako ni nona ciqoma na nona kerekere o Balami na luve i Piori. Ni nanuma tale mada ga na veika sa yaco ena i lakolako mai Sitimi ki Kilikali, mo ni qai kila kina na ka au sa cakava oti mo ni vakabulai rawa kina.”

Na Veika sa Vinakata o Jiova

⁶ A cava me noqu i kaukau vei Jiova, na Kalou ni lomalagi, ni'u sa lako me'u sokalou vua? Me'u kauta beka na luve ni bulumakau uro vinaka me ra la'ki cabo me i soro kama vua?

⁷ Ena taleitaka beka o Jiova ke'u kauta vua e udolu vakaudolu na sipi, se me vuqa vakavuqa na uciwai sa drodro mai kina na waiwai olive? Me'u vakacabora beka vua na noqu ulumatua me i buluti ni noqu i valavala ca?

⁸ E sega, sa tukuna oti ga vei keda o Jiova na ka e vinaka. Na ka e vinakata o koya vei keda sai koya oqo: me vakayacori ga na ka dodonu, me vakatakilai ga na yalololoma sa sega ni yalani, ka me ia ga na talairawarawa kei na veitokani veivolekati kei na noda Kalou ena yalomalumalumu.

⁹ Sa ka ni yalomatua na rerevaki Jiova. Sa kaci ki na koro levu o koya, ka vaka, “Ni vakarorogo, oi kemuni o ni soqoni tiko oqori ena koro!

¹⁰ Sa tiko ena nodra veivale na tamata ca na i yau era sa rawata mai na i tovo veivakaisini. Era sa taurivaka ena veivoli na i vakarau lasulasu, ka'u sa besetaka oqo.

¹¹ Me'u na vosoti ira vakaevei na tamata era sa dau taurivaka na i vakarau bibi lasulasu?

¹² O ira na nomuni tamata vutuniyau era sa dau rawa-ka mai vei ira na dravudravua ena veivakalolomataki, ka o ni sa tamata lasulasu kecega.

¹³ O koya oqo au sa tekivuna kina na cakacaka ni nomuni vakacacani ka vakarusai ena vuku ni nomuni i valavala ca.

¹⁴ O ni na kana tiko, ia o ni na sega ga ni mamau — ka o ni na viakana tikoga. Ni o ni butakoca na ka mo ni la'ki maroroya, o ni na sega ni maroroya rawa. Kevaka e dua na ka o ni sa maroroya rawa, au na qai vakarusa ena i valu.

¹⁵ O ni na kaburaka na itei ni sila, ia o ni na sega ni tamusuka ni sa matua. O ni na caka waiwai olive, ia o ni na sega ni vakayagataka. O ni na qaqia na qerepi, ia o ni na sega ga ni gunuva na kena waini.

¹⁶ Ena yaco na veika oqo baleta ni o ni sa muria tiko na i tovo ca nei tui Omirai kei na luvena o tui Eapi. O ni sa tomana tikoga na nodrau i vakarau ni cakacaka, o koya oqo ka'u na vakacacani kemuni kina, ka ra na cati kemuni na tamata kecega. Era na beci kemuni na tamata kecega.”