Maika 3 - Vakavakadewa Vou kei na iVola tale eso

Vosavakacataki na Nodra i Liuliu na Isireli

¹ Ni vakarorogo mada, oi kemuni na nodra i liuliu na Isireli! E sega beka ni kilikili kei kemuni mo ni vakayacora na lewa dodonu,

² ia o ni sa besetaka ga na veika vinaka ka sa gadreva tikoga na veika ca. O ni sa drudrugi ira bulabula na noqu tamata ka seleseleta tani na lewedra mai na suidra.

³ O ni sa kani ira tiko na noqu tamata. O ni sa drudruga laivi na kulidra, o ni sa musumusuraka na suidra, ka seleseleti ira vakalalai me vaka na lewe ni manumanu sa vakarau saqa.

⁴ Sa voleka mai na gauna mo ni tagi kina vei Jiova, ia ena sega ni rogoci kemuni o koya. Ena sega ni rogoca na nomuni masu o koya, ni sa ca na nomuni i valavala.

⁵ Era sa vakacalai na noqu tamata mai vei ira na parofita era dau yalataka na tiko vinaka kei na sautu vei ira era sa saumi ira, ia era sa veivakarerei ga ni ra na valuti o ira sa sega ni saumi ira. Sa kaya vei ira na parofita vakaoqo o Jiova,

⁶ “Ena vuku ni nomuni vakauti ira vakatani na noqu tamata, sa na mudu vakadua na nomuni dau raivotu vakaparofita, ka sa na sega tale ni rawa mo ni tukuna e dua na ka e se bera tiko ni yaco. Kemuni na parofita, sa voleka sara ni oti na nomuni gauna; sa kala sobu na nomuni matanisiga.”

⁷ O ira era dautukuna na veika e se bera ni yaco era na qai madua ga ni sa cala na nodra vosa ni yalayala. Era na vakamadualaki baleta ni sa sega ni vakayacora na Kalou na ka era sa tukuna.

⁸ Ia vei au, sa vakasinaiti au ga o Jiova ena nona kaukauwa kei na nona Yalo Tabu, ka sa solia vei au na lewa dodonu kei na yalo doudou me'u tukuna kina vei ira na Isireli na veika ca era sa vakayacora.

⁹ Ni vakarorogo mada mai vei au, oi kemuni na dauveiliutaki e Isireli, oi kemuni sa dau cata tiko na lewa dodonu ka vukica na ka dina me cala.

¹⁰ O ni a tarai Jerusalemi, na koro ni Kalou, ena vakadave dra kei na lewa e sega ni dodonu.

¹¹ O ira na dauveiliutaki era sa veiliutaki ga ena vuku ni i lavo ni veitemaki se veivaqumi era sa saumi kina, o ira na bete era sa vakamacalataka ga na i balebale ni lawa ena vuku ni kedra i sau, o ira na parofita era sa dauvakatakila ga na ka ena vuku ni i lavo — ka ra sa kaya kecega ni sa tiko vata kei ira o Jiova. Era sa kaya ga vakaoqo, “Ena sega sara ni yacovi keda e dua na leqa. Sa tiko vata ga kei keda o Jiova.”

¹² O koya oqo, ena vukumuni, ena siviyarataki kina o Saioni me vaka e dua na i teitei, o Jerusalemi ena yaco me dua ga na i rusarusa ni koro, ka na dua na veikau loa na delana sa toka kina na Valenisoro.