Maika 2 - Vakavakadewa Vou kei na iVola tale eso

Ca ni Vakasaurarataki Ira na Dravudravua

¹ Ena ka vakadomobula dina o ira sa daumoce yadrayadra ka lalawataka voli na ca! Ni sa mataka caca, era sa kusarawa sara me ra vakayacora na ca era sa lalawataka ena kena gauna taudonu.

² Ni ra sa vinakata e dua na tiki ni qele, era sa kovea ga; ni ra sa vinakata na vale, era sa taura ga. Sa sega sara ni dua na vuvale me na tiko vakacegu rawa se na i yau me na dau taqomaki vinaka.

³ A sa qai kaya kina o Jiova, “Au sa nakita tiko me'u na vakarusai kemudou, ka na sega sara ni rawa mo dou dro bula. Ena dua na gauna ca vei kemudou ka na qai muduki vakadua kina na nomudou lako voli ena dokadoka.

⁴ Ni sa yaco mai na gauna o ya, era na qai dautukuna na tamata na kemudou i talanoa me i vakaraitaki ni dua na veivakarusai ka yaco, era na lagata na sere ni rarawa kei na yaluma o ni sa curuma, me vakaoqo: Eda sa vakarusai vakadua! Sa kauta tani o Jiova na noda vanua, Ka sa solia vei ira sa tauri keda vakavesu.”

⁵ O koya oqo, ni sa yaco mai na gauna me vakalesui tale kina na vanua vei ira na tamata i Jiova, sa na sega kina ni dua na nomudou i votavota.

⁶ Era sa qai vunauci au na tamata, ka ra kaya, “Kakua ni vunauci keimami. Kakua ni vunautaka mai na veika kece oqori. Ena sega sara ni vakamaduataki keimami na Kalou.

⁷ Sa dodonu li me tukuni na veika oqo: Dou sa nanuma beka ni ra sa tiko vesuki na kai Isireli? E sa rui yalototolo beka o Jiova? Sa rawa beka vua me cakava na veika kece oqo? E sega beka ni dauvosa vinaka o koya vei ira era sa dau cakava na ka vinaka?”

⁸ A sa qai sauma o Jiova ka kaya, “Oi kemudou sara ga vakai kemudou sa vakavuna mo dou kedra meca na noqu tamata. Ni ra sa suka mai na i valu na tamata ka ra sa nanuma ni sa vanua vinaka duadua ni tiko vakacegu na nodra veivalevale, ia dou sa qai dau waraki ira toka mo ni butakoca na nodra kote.

⁹ Dou sa vakasevi ira tani na nodra yada na noqu tamata mai na veivale era sa daulomana, ka dou sa butakoca vakadua mai vei ira na luvedra na noqu i solisoli vinaka kecega.

¹⁰ Dou tucake ka lako yani; sa sega ni qai vanua vinaka ni tiko vakacegu na vanua oqo. Sa vakavuna ga na nomudou i valavala ca me rusa vakadua na vanua oqo.

¹¹ “O ira na tamata oqo era sa vinakata ga na mataqali parofita sa lako wavoki ka sinai tu ena lasu kei na veivakalaboci, ka vakatukuna voli, ‘Au sa parofisaitaka ni na drodro vakalevu yani vei kemuni na waini kei na gunu kaukauwa ni mateni eso.’

¹² “Ia ka'u na vakasoqoni kemuni vata, oi kemuni kece sara na Isireli sa vo tiko. Au na kauti kemuni vata mai me vaka na sipi era sa lesu ki na kedra bai. Me vaka na i kanakana sa sinai ena sipi, ena qai yaco me sinai tale vakakina na nomudou vanua vei ira na lewenivanua.”

¹³ Ena qai dolava vei ira na Kalou na sala ka liutaki ira tani mai na tiko vakabobula. Era na basuka yani na veimatamata ni koro ka lako yani ena galala. Na nodra tui, o Jiova, ena liutaki ira yani ki tautuba.