Maciu 8 - Vakavakadewa Vou kei na iVola tale eso

Sa Vakasavasavataka E Dua Na Vukavuka O Jisu

¹ Ni sa lako sobu mai na ulunivanua o koya, era sa muri koya yani e lewe vuqa sara;

² ka sa qai lako mai vei koya e dua na tamata vukavuka ka mai tekiduru e matana ka kaya, “Na Turaga, kevaka ga sa lomamuni, sa rawa ni o ni vakasavasavataki au.”

³ Sa qai dodoka yani na ligana o Jisu ka tarai koya, ka kaya, “Sa lomaqu, mo savasava mai.” A vakabulai sara mai na nona vukavuka.

⁴ Sa qai kaya vua o Jisu, “Qarauna mo kakua ni tukuna vua e dua, ia mo lako ga ka vakaraitaki iko vua na bete, ka vakacabora na i solisoli ka vakarota o Mosese, me i vakadinadina vei ira na tamata ni o sa savasava.”

Sa Vakabula na Nona Tamata na Turaganivalu ni Roma o Jisu

⁵ Ni sa curu ki Kapenaumi o Jisu sa lako mai vua e dua na turaganivalu, ka kerei koya

⁶ ka kaya, “Kemuni na Turaga, e davo koto mai vale na noqu tamata e tauvi paralasi, ka sa yaluma sara.”

⁷ Sa qai kaya vua o koya, “Au sa na la'ki vakabulai koya yani.”

⁸ A sauma na turaganivalu ka kaya, “Kemuni na Turaga, sa sega ni veiganiti kei au mo ni curu ki na noqu vale; ia, mo ni cavuta ga na vosa, ka sa na bula kina na noqu tamata.

⁹ Ka ni'u tu ga oi au ena ruku ni lewa, ka ra tu e rukuqu eso na sotia, ka'u kaya vua e dua, ‘Lako,’ ka sa lako yani, ki vua tale e dua, ‘Lako mai,’ ka sa lako mai, ki vua talega na noqu tamata, ‘Kitaka oqo,’ ka sa kitaka.”

¹⁰ Ni sa rogoca o Jisu, sa kurabui, ka kaya vei ira ka muri koya tiko, “Au sa kaya vakaidina vei kemudou, au se sega mada ni bau raica vua e dua e Isireli na mataqali vakabauta vakaoqo.

¹¹ Au sa kaya vei kemudou ni ra na lewe vuqa era na lako mai na tokalau kei na ra talega; ka tiko sobu me kana vata kei Epara-ama, kei Aisake, kei Jekope ena matanitu vakalomalagi.

¹² Ia, o ira era dodonu me ra tiko ena loma ni matanitu era na biu ki na butobuto e tautuba, era na dau tagi ka vakasequruqurubati kina.”

¹³ Sa qai kaya o Jisu vua na turaganivalu, “Mo lako, me yaco vei iko me vaka o sa vakabauta.” A bula sara na nona tamata ena tiki ni gauna o ya.

Sa Vakabulai Ira na Lewe Vuqa o Jisu

¹⁴ Ni sa curu yani o Jisu ki na vale nei Pita, sa raica na tina ni watina ni davo koto ka tauvi katakata;

¹⁵ sa mani tara na ligana, ka sa takali sara vua na katakata, ka mani tucake ka qaravi koya.

¹⁶ Ni sa yakavi mai, era sa qai kauta mai vei koya e lewe vuqa na curumi tevoro; ka sa vakasavi ira na tevoro o koya ena vosa, ka vakabulai ira kecega era tauvimate,

¹⁷ me vakayacori kina na vosa ka tukuna o Aisea na parofita, “O koya ga sa kauta vua na noda malumalumu, ka sa kauta tani na noda tauvimate.”

Eso Ka Via Muri Jisu

¹⁸ Ni sa raica o Jisu na lewe vuqa era vakavolivoliti koya, sa qai kaya me ia na lako ki tai kadua.

¹⁹ Sa qai lako mai e dua na daunilawa ka kaya vua, “Na i Vakavuvuli, au na muri kemuni ena veivanua kecega o ni na lako kina.”

²⁰ Sa qai kaya vua o Jisu, “Era vaqara na fokisi, ka ra vakasova na manumanu vuka; ia, na Luve ni Tamata sa sega na vanua me davo sobu kina ka vakacegu.”

²¹ Sa qai vosa e dua tale vei ira na tisaipeli ka kaya vua, “Turaga, laivi au taumada me'u lesu ka la'ki buluti tamaqu.”

²² Ia, sa qai kaya vua o Jisu, “Muri au mai, ka laivi ira na mate me ra buluta na nodra mate.”

Sa Vakamaravutaka na Cava o Jisu

²³ Ni sa vodo o Jisu ki waqa, e ratou sa muri koya kina na nona tisaipeli.

²⁴ Ka raica, sa tubu e dua na cava levu e wasawasa, ka sa luvu kina na waqa ena biau; ia, sa moce koto ga o koya.

²⁵ E ratou sa qai vakayadrati koya, ka kaya, “Turaga, mo ni vakabulai kedatou, edatou sa mate.”

²⁶ Sa qai kaya vei iratou, “A cava dou sa rere kina, sa lailai na nomudou vakabauta?” Sa qai duri cake ka vunauca na cagi kei na wasawasa, ka sa maravu mai.

²⁷ E ratou sa kurabui, ka kaya, “A tamata vakacava mada oqo ni bau talairawarawa vua na cagi kei na wasawasa?”

Sa Vakabulai Rau e Lewe Rua na Curumi Tevoro o Jisu

²⁸ Ni sa yaco ki tai kadua o Jisu, ki na nodra vanua na kai Katara, sa qai sota vata kaya e lewe rua na curumi tevoro e rau cavutu mai na i bulubulu; e rau sa rui vakarerevaki sara ka sa sega kina ni lako e dua ena sala o ya.

²⁹ Ka raica, e rau sa qai qoqolou mai, ka kaya, “A cava o ni via cakava vei keirau, na Luve ni Kalou? O ni sa lako li mai me vakararawataki keirau ni sa bera mai na kena gauna?”

³⁰ Ia, era kana vakayawa tu yani mai vei iratou e dua na qele ni vuaka levu.

³¹ Era sa qai kerei koya na tevoro ka kaya, “Kevaka o ni vakasavi keimami, vakatalai keimami me keimami curumi ira na qele ni vuaka.”

³² Sa mani kaya vei ira, “Dou lako.” Era sa lako tani sara ka curumi ira na vuaka. Era qai cici sobu kece sara na qele ni vuaka ena baba ki wasawasa, ka ra sa luvu kina.

³³ Era sa qai dro na i vakatawa, ka lako yani ki na koro ka tukuna na ka kecega, kei na veika e baleti rau na curumi tevoro.

³⁴ Era sa qai lako vakoro mai kina me sota kei Jisu, ia ni ra sa raici koya, era sa kerei koya me biuta na nodra vanua.