Maciu 6 - Vakavakadewa Vou kei na iVola tale eso

Vakavuvuli me Baleta na Ka ni Loloma

¹ “Dou qarauna mo dou kakua ni vakayacora na nomudou ka ni loloma vakalotu ena matadra na tamata me ra raica kina na veika dou cakava. Kevaka dou sa vakayacora vakakina, ena sega na kemudou i sau mai vua na Tamamudou mai lomalagi.

² “O koya oqo, ni o sa soli ka ni loloma, kakua ni uvu davui e matamu me vaka era dau cakava na dauveivakaisini ena veivalenilotu kei na veigaunisala, me ra dokai ira kina na tamata. Au sa kaya vakaidina vei kemudou, era sa taura oti na kedra i sau.

³ Ia ni dou sa soli ka ni loloma, me kakua ni kila na ligamu i mawi na ka e cakava tiko na ligamu i matau,

⁴ me ka vuni kina na nomu i loloma. Ia na Tamamu, o koya sa raica na veika e sa vakayacori lo, ena qai sauma vei iko.

Na i Vakavuvuli me Baleta na Masu

⁵ “Ni dou sa masu, mo dou kakua ni vakataki ira na dauveivakaisini; ni ra dau vinakata me ra masu ni ra tucake tu ena veivalenilotu kei na veitutu ni sala, me raici ira kina na tamata. Au sa kaya vakaidina vei kemudou, era sa taura oti na kedra i sau taucoko.

⁶ Ia o iko, ni o sa masu, curu ki na nomu rumu, ka sogota na nomu katuba, ka qai masu vua na Tamamu sa tabogo; ia, na Tamamu o koya sa raica na ka e vuni ena qai sauma ga vei iko.

⁷ “Ia ni dou sa masu, kakua ni vosa balavu walega me vakataki ira na kai veimatanitu tani, ni ra nanuma era na rogoci ena nodra vosa balavu.

⁸ Mo dou kakua ni vakataki ira, ni sa kila tu na Tamamudou na ka e yaga vei kemudou ni bera ni dou kerea vua.

⁹ Mo dou qai masu kina vakaoqo: ‘Tama i keimami mai lomalagi, Me vakarokorokotaki na yacamuni,

¹⁰ Me yaco mai na nomuni matanitu; Me caka na lomamuni e vuravura Me vaka sa caka tiko mai lomalagi.

¹¹ “Ni solia mai vei keimami ena siga oqo Na kakana e rauti keimami.

¹² Ni bokoca mada na neimami i valavala ca, Me vaka keimami sa bokoca oti na nodra Era sai valavala ca vei keimami.

¹³ Ni kakua ni kauti keimami ki na vere; Ka mo ni vakabulai keimami mai na ca. (Ni sa nomuni na matanitu, Kei na kaukauwa, kei na lagilagi Ka sega ni mudu. Emeni.)

¹⁴ “Kevaka dou sa vosota na nodra cala era sa caka cala vei iko, ena vosoti kemudou vakakina na Tamamudou mai lomalagi;

¹⁵ Ia kevaka dou sega ni vosota na nodra cala na tamata, ena sega talega ni vosota na nomudou cala na Tamamudou.

Na i Vakavuvuli me Baleta na Lolo

¹⁶ “Ni dou sa lolo, kakua ni vakaveveku mata me vakataki ira na dauveivakaisini, ni ra dau vukica vakatani na matadra, me laurai vei ira na tamata na nodra lolo voli. Au sa kaya vakaidina vei kemudou, era sa taura oti na kedra i sau.

¹⁷ Ia o iko, ni o sa lolo, lumuta na ulumu, ka tavoya na matamu,

¹⁸ me kakua kina ni laurai vei ira na tamata na nomu lolo voli, ia ki vua ga na Tamamu sa tabogo me kila. Ia na Tamamu, o koya sa raica na ka e vuni, ena qai sauma ga vei iko.

Na i Yau mai Lomalagi

¹⁹ “Dou kakua ni kumuna vata vei kemudou na i yau e vuravura ena vanua e dau vakacacana na sarasara kei na veveka, ka ra dau curu botea kina na daubutako ka butakoca,

²⁰ ia dou kumuna ga na nomudou i yau mai lomalagi ena tikina e sega ni vakacacana kina na sarasara se na veveka, ka sega ni dau curu botea kina na daubutako me butakoca.

²¹ Ni vanua ga e tiko kina na nomudou i yau, ena tiko talega kina na yalomudou.

Na Cina ni Yago

²² “Sa cina ni yago na mata. Kevaka e vinaka tu na matamu, ena rarama tu kina na yagomu taucoko;

²³ ia, kevaka sa ca na matamu, ena butobuto na yagomu taucoko. Ia, kevaka sa butobuto tu na rarama e lomamu, sa wacava na levu ni butobuto o ya!

Na Kalou kei na i Yau

²⁴ “E sega ni dua na tamata me qarava rawa e le rua na turaga. Ni na cata e dua ka lomana ga e dua, se ena kabita sara e dua ka beci koya ka dua. Dou sega ni qarava rawa na Kalou kei na i yau.

²⁵ “Oqo na vuna au sa kaya kina vei kemudou mo dou kakua ni lomaocaoca me baleta na nomudou bula ena ka mo dou kania, se na ka mo dou gunuva, se me baleta na yagomudou, se na ka mo dou vakaisulu kina. E sega li ni bibi cake na bula mai na kakana, kei na yago mai na i sulu?

²⁶ Dou saravi ira mada na manumanu vuka: era sa sega ni dau kakaburaki, se tatamusuki, se daukumuna vata ki na lololo; ia, sa vakani ira tikoga na Tamamudou vakalomalagi. Dou sa sega li ni yaga vakalevu cake sara mai vei ira?

²⁷ O cei vei kemudou, ni sa lomaocaoca, ena rawa ni vakuria kina vakalailai ga na siga ni nona bula?

²⁸ “A cava na vuna dou sa lomaocaocataka kina na i sulu? Dou saravi ira mada na senikau ni veikau kei na nodra tubu; era sa sega ni cakacakataka se talia vakataki ira na nodra i sulu.

²⁹ Ia au sa kaya vei kemudou ni o Solomoni, ena nona i ukuuku kecega, a sa sega ni vakaisulu totoka sara me vakataki ira na senikau oqo.

³⁰ Ia kevaka sa vakasuluma vakaoqo na Kalou na co ni veivanua, na co ka sa bula edaidai ka sa yali tale yani ni mataka ni sa vakamai ena lovo, ena sega li ni qai levu cake sara na nona kauwai me vakasulumi kemudou, Oi kemudou sa lailai na nomudou vakabauta?

³¹ “O koya oqo, mo dou kakua kina ni lomaocaoca, ka kaya, ‘Na cava eda na kania?’ se ‘Na cava eda na gunuva?’ se ‘Na cava eda na vakaisulu kina?’

³² Ni ra dau vakasaqara na veika kecega oqo na kai veimatanitu tani, ia sa kila tu na Tamamudou vakalomalagi na yaga ni veika kecega oqo vei kemudou.

³³ Ia dou vakasaqara taumada ga na matanitu ni Kalou kei na nona dodonu, ka na soli me kena i kuri vei kemudou na veika kecega oqo.

³⁴ O koya oqo mo dou qai kakua kina ni lomaocaoca me baleta na siga ni mataka, ka ni na qai tiko talega na lomaocaoca ena yaco mai kina. Sa kua soti ni da vakuria na lomaocaoca vakaoqo ki na siga yadua.