Maciu 3 - Vakavakadewa Vou kei na iVola tale eso

Na Vunau Voli nei Joni na Dauveipapitaisotaki

¹ Ena gauna o ya, a sa lako voli mai o Joni na Dauveipapitaisotaki ka dau vunau ena loma ni vanua mai Jutia, ka kaya,

² “Ni veivutuni ni sa voleka na matanitu vakalomalagi!”

³ Ni sai koya ga oqo ka a vosa kina o Aisea na parofita, ka kaya, “Na domona e dua sa kacikaci voli e loma ni vanua: Dou caramaka na sala ni Turaga; Cakava me dodonu na nona gaunisala!”

⁴ Ia sa vakaisulu o Joni ena i sulu vuti ni kameli, ka vau na tolona ena i oro kuli-ni-manumanu, ka kena kakana na vodre kei na oni ni veikau.

⁵ Era sa qai lako yani vua o ira mai Jerusalemi kei Jutia taucoko, kei na yasana kece e volekata na Joritani,

⁶ ka sa papitaisotaki ira o koya ena uciwai na Joritani, ni ra sa vakatusa tiko kina na nodra i valavala ca.

⁷ Ia ni sa raici ira e lewe vuqa na Farisi kei na Setoki ni ra sa lako tiko yani vua me ra papitaisotaki, sa kaya vei ira, “Oi kemuni na kawa ni gata! O cei sa vakasalataki kemuni mo ni dro tani mai na cudru sa lako tiko mai?

⁸ Ni vuataka na vua e kilikili kaya na veivutuni,

⁹ ka kakua ni via nanuma mo ni kaya e lomamuni, ‘A tama i keimami o Epara-ama’, ni'u sa kaya vei kemuni, sa rawa vua na Kalou me vakatubura me ra luve i Epara-ama na veivatu oqo.

¹⁰ Sa toka sara ga oqo na matau ena veivunikau me tatalaki sobu kina na kau kecega e sega ni vuataka na vua vinaka, ka ra biu ki na buka.

¹¹ Au sa papitaisotaki kemuni ena wai ena nomuni sa veivutuni; ia o koya e muri au mai e levu cake vei keirau, ka sega ni rauti au me'u i kaukau ni nona i vava; ena papitaisotaki kemuni o koya ena Yalo Tabu kei na bukawaqa.

¹² Sa taura tu e ligana na nona i sivi ni sila me vakasavasavataka kina na nona buturara ni caka sila, ka binia vata na sila ki na nona lololo; ia na qana ena vakama ena buka e sega ni bokoci rawa.”

Na Papitaisotaki i Jisu

¹³ Sa qai lako o Jisu mai Kalili ki na Joritani me la'ki papitaisotaki koya o Joni.

¹⁴ A via tarovi koya o Joni, ka kaya, “E dodonu me'u papitaisotaki mai vei kemuni, ia oqo o ni sa qai lako tale mai vei au!”

¹⁵ A sa sauma o Jisu, ka kaya vua, “Ia me yaco vakakina mada ga ena gauna oqo, ni daru na vakayacora kina na ka kece sa vinakata na Kalou.” A sa mani vakadonuya kina o Joni.

¹⁶ Ia ni sa papitaisotaki oti o Jisu sa cabe sara mai wai, ka raica, sa qai tadola mai na lomalagi, ka sa raica sara o koya na Yalo ni Kalou ni sa lako sobu mai me vaka na ruve ka mai ro toka vua.

¹⁷ Sa qai rogo mai e dua na domo mai lomalagi, ka kaya, “Oqo na Luvequ lomani e duabau ga, ka'u sa dau vinakata vakalevu.”