Maciu 28 - Vakavakadewa Vou kei na iVola tale eso

Na Tu Cake Tale Mai na Mate

¹ Ni sa oti na Siga ni Vakacecegu, ka sa kida cake mai na mataka ni Siga Tabu, a sa lako yani o Maria na yalewa ni Makitala kei na Maria kadua me rau la'ki raica na i bulubulu.

² A vakasauri ni sa yaco e dua na uneune levu; a sa lako sobu mai lomalagi e dua na agilosi ni Turaga, a sa vaqiqica tani na vatu, ka mai dabe toka e delana.

³ Na nona rairai mai sa vaka na tibi ni liva, ka sa vulavula me vaka na uca vulavula na nona i sulu.

⁴ Ena vuku ni rere levu e tarai ira na yadra, era sa sautaninini ka cibati iratou me vaka ga eratou sa mate.

⁵ Sa qai vosa na agilosi ka kaya vei rau na yalewa, “Drau kakua ni rere. Au kila ni o drau vakasaqarai Jisu tiko, o koya ka vakoti ki na kauveilatai.

⁶ Sa sega eke o koya; o koya sa vakaturicake tale mai na mate, me vaka ga na nona vosa. Drau lako mai ka raica na yasana ka a davo koto kina.

⁷ Drau lako vakatotolo sara yani, ka tukuna vei iratou na nona tisaipeli ni sa tucake tale mai na mate o koya, ka raica, sa liu vei kemudou o koya ki Kalili; dou na raici koya mai kea. Drau nanuma na veika ka'u sa tukuna oqo vei kemudrau.”

⁸ E rau sa biuta sara mai na i bulubulu ka rau sa rere, ia e rau sa vakasinaiti talega ena reki, ka rau cici yani me rau la'ki tukutuku vei iratou na nona tisaipeli.

⁹ Ia, sa qai tavaki rau mai o Jisu, ka kaya, “Me nomudrau na vakacegu.” E rau sa qai toro vua, ka tara na yavana, ka cuva ena vakarokoroko ki vua.

¹⁰ A qai kaya vei rau o Jisu, “Drau kakua ni rere, drau la'ki tukuna ga vei iratou na taciqu me ratou lako ki Kalili, eratou na raici au mai kea.”

Era mai Tukutuku na Yadra

¹¹ Ni rau sa lako yani, era sa qai lako eso vei ira na yadra ki na koro ka tukuna vei ira na bete levu na veika kece ka a yaco.

¹² Era sa qai soqoni vata kei ira na qase ka nakita vata e dua na ka; era a solia e dua na i wase ni lavo levu vei ira na sotia,

¹³ ka kaya, “Dou kaya vakaoqo, Era a lako mai na nona tisaipeli ena bogi ka butakoci koya ni dou moce tu.

¹⁴ Ia kevaka e mani la'ki rogoca na kovana, keitou na vakaraitaka na kena dina vua, ka dou na galala mai kina.”

¹⁵ Era sa mani taura na i lavo na yadra ka cakava me vaka era sa vakasalataki kina. Sa vakadewataki tikoga na i tukutuku oqo vei ira na Jiu me yacova edaidai.

Rairai Tale o Jisu Vei Iratou na Nona Tisaipeli

¹⁶ E ratou sa qai lako ki Kalili na tisaipeli e lewe tinikadua, ki na ulunivanua ka a dusimaki iratou kina o Jisu.

¹⁷ Ni ratou sa raici koya e ratou a qai cuva sobu vua ena vakarokoroko; ia eso e ratou sa vakatitiqa ga.

¹⁸ Sa qai toro voleka mai o Jisu ka tukuna vei iratou, “Sa soli mai vei au na kaukauwa kecega mai lomalagi kei vuravura.

¹⁹ Ia mo dou qai lako kivei ira kece sara na tamata ena veivanua kecega, ka vakalotutaki ira me ra noqu tisaipeli; dou papitaisotaki ira ena yaca ni Tamamudou, kei na Luvena, kei na Yalo Tabu;

²⁰ ka vakavulici ira me ra talairawarawa ki na veika kecega ka'u sa vakarota vei kemudou. Ka mo dou nanuma ni'u sa tiko vata kei kemudou ena veigauna kece, me yacova na i vakataotioti kei vuravura.”