Maciu 27 - Vakavakadewa Vou kei na iVola tale eso

Sa Kau vei Pailato o Jisu

¹ Ni sa mataka mai, era sa qai bosei Jisu o ira kecega na bete levu kei ira na nodra qase na tamata, me ra vakamatea.

² Era sa qai vesuki koya ka kauti koya tani, ka soli koya vei Pailato, na kovana mai Roma.

Na Mate i Jutasa

³ Ia o Jutasa, o koya ka bukiveretaki koya, ni sa raica ni sa lewai o koya me mate, sa qai veivutuni, ka vakasuka na tiki ni siliva e tolusagavulu vei ira na bete levu kei ira na qase,

⁴ ka kaya, “Au sa cala ni'u sa bukiveretaka e dua na tamata sa tawa cala me mate.” Era sa qai kaya ga, “A cava oqori vei keimami? Oqori sa baleti iko ga!”

⁵ Sa qai biuta tu ga na i lavo mai Valenisoro o koya; a sa qai lako yani ka kukunataki koya.

⁶ Era sa qai kauta na i lavo o ira na bete levu, ka kaya, “E tabu ni biu ki na kato ni soli ni Valenisoro ni sai sau ni dra.”

⁷ Ni ra sa bosea oti, era sa qai vakayagataka na i lavo me voli kina na Vanua ni Dautulikuro me nodra i bulubulu na vulagi.

⁸ Oqori na vuna sa vakatokai kina na tiki ni vanua o ya na “Vanua ni Dra” me yacova tu edaidai.

⁹ Sa qai vakayacori sara kina na veika ka a tukuna o Jeremaia na parofita, ni a kaya, “Era sa qai kauta na tolusagavulu na tiki ni siliva, na levu ni i lavo era sa vakadonuya na Isireli me ra sauma vua,

¹⁰ ka volia kina na vanua ni dautulikuro, me vaka ka vakarota vei au na Turaga.”

Vakatarogi Jisu o Pailato

¹¹ A sa tucake tu o Jisu ena mata i koya na kovana ni Roma, ka sa tarogi koya, “O iko li na nodra Tui na Jiu?” Sa qai kaya o Jisu, “Oqori na ka o sa kaya.”

¹² Ia sa sega ga ni sauma e dua na ka ki na nodra veibeitaki na bete levu kei ira na qase.

¹³ Sa qai kaya vua o Pailato, “O sa sega li ni rogoca na levu ni ka era sa beitaki iko kina?”

¹⁴ Ia sa sega ni sauma o koya, ka sega mada ga ni bau tukuna e dua na vosa, ka sa qai kurabui ga kina vakalevu na kovana.

Sa Tauci na Lewa me Mate o Jisu

¹⁵ Ena Veisolevu ni Lakosivia kece, sa nona i valavala na kovana ni Roma me dau sereka vei ira na lewe vuqa e dua ga na kaivesu era digitaka.

¹⁶ E tiko voli vei ira e dua na kaivesu vakairogorogo o Parapa na yacana.

¹⁷ Ia ni ra sa soqoni vata mai na lewe vuqa, sa qai kaya vei ira o Pailato, “O cei o ni vinakata me'u sereka vei kemuni, o Parapa se o Jisu o koya sa vakatokai na Mesaia?”

¹⁸ A sa kila o koya ni ra sa soli Jisu yani ki vua o ira na nodra qase na Jiu ena vuku ni nodra yalo vuvu.

¹⁹ Ni sa dabe toka ena nona i tikotiko ni veilewai, sa qai tala yani e dua na tamata vua o na watina, ka kaya, “Mo kakua ni cakava e dua na ka vua na tamata tawa cala oqori, ni'u sa kune rarawa vakalevu edaidai ena dua na tadra ka baleti koya.”

²⁰ Era sa qai vakauqeti ira na lewe vuqa o ira na bete levu kei ira na qase me ra kerei Parapa ka me mate o Jisu.

²¹ Sa qai vosa na kovana ka kaya vei ira, “O cei vei rau na lewe rua o ni vinakata me'u sereka vei kemuni?” Era sa qai kaya, “O Parapa.”

²² Sa qai kaya vei ira o Pailato, “Ia na cava ga me'u qai cakava vei Jisu o koya sa vakatokai na Mesaia?” Era sa qai kaya kecega, “Vakota ki na kauveilatai!”

²³ Sa qai kaya o koya, “Ena vuku ni cava, na cava na ka ca e cakava o koya?” Era sa qai qoqolou vakalevu cake ga kina, ka kaya, “Vakota ki na kauveilatai!”

²⁴ Ni sa raica o Pailato ni sa sega ni dua na ka e rawata, ka sa rawa ni yaco na tiko yavavala ena kedra maliwa na tamata, a sa qai kauta mai e dua na wai, ka vuluvulu e matadra na lewe vuqa, ka kaya, “Sa sega ni bale vei au na nona mate na tamata oqo! Sa baleti kemuni ga!”

²⁵ Era sa qai sauma mai o ira kecega na tamata ka ra kaya, “Laiva me baleti keimami kei ira na luve i keimami na nona mate!”

²⁶ Sa mani sereki Parapa kina vei ira o Pailato. Ia sa vakanakuitataki Jisu ga, ka sa qai soli koya yani me vakoti ki na kauveilatai.

Era Vakalialiai Jisu na Sotia

²⁷ Era sa qai kauti Jisu ki na loma ni bai ni kovana o ira na sotia ni kovana, ka vakasoqoni ira vata kina na matasotia taucoko.

²⁸ Era sa luvata tani na nona i sulu ka vakadarama vua e dua na i sulu vakatui roka damudamu.

²⁹ Era sa qai talia e dua na i sala wavakavotona ka tokara ki uluna, ka ciqira e ligana i matau e dua na gasau, ka ra tekiduru e matana, ka vakalialiai koya, ka kaya, “Me bula balavu na nodra Tui na Jiu!”

³⁰ Era sa qai kasiviti koya, ka taura mai na gasau ka mokulaka kina na uluna.

³¹ Ni sa oti na nodra vakalialiai koya, era sa qai luvata laivi mai vua na i sulu vakatui roka damudamu, ka vakadarama lesu tale ki vua na nona i sulu ga, era sa qai kauti koya yani me ra vakoti koya ki na kauveilatai.

Sa Vakoti ki na Kauveilatai o Jisu

³² Ni ra sa lako yani, era sa sota kaya e dua na kai Kirini, o Saimoni na yacana; ka sa mani vakasaurarataki koya na sotia me colata na kauveilatai i Jisu.

³³ Ia ni ra sa yaco ki na vanua e vakatokai o Kolikoca (ka kena i balebale, na Vanua ni Qavokavoka),

³⁴ era sa qai solia vua me gunuva na waini e veiwaki tu kei na wai gaga; ia ni sa tovolea, a sa qai bese ni gunuva.

³⁵ Era sa qai vakoti koya ki na kauveilatai, ka ra vota na nona i sulu ena vakawirimadigi.

³⁶ Era sa qai dabe toka mai kea ka vakaraici koya.

³⁷ Era sa qai vakota e cake me donuya na uluna na i tukutuku ka sa beitaki kina, “Oqo o Jisu na nodra Tui na Jiu.”

³⁸ A sa qai vakoti vata kaya e lewe rua na daubutako, e dua ena yasana i matau, ka dua ena yasana i mawi.

³⁹ Era sa vosavosa o ira era sa lako yani e kea, ka ra kureitaki ulu,

⁴⁰ ka kaya, “O iko, o kaya ni o na vakarusa na Valenisoro ka tara vou tale ena tolu na siga, vakabulai iko mada! Lako sobu mai na kauveilatai kevaka o sa Luve ni Kalou!”

⁴¹ E vaka talega kina o ira na bete levu kei ira na daunilawa kei ira na qase, era sa vakalialiai koya ka kaya,

⁴² “E dau vakabulai ira na tani; e sega ga ni vakabulai koya rawa! Sa i koya na nodra Tui na Isireli! Me lako sobu mada mai na kauveilatai, ka da na qai vakabauti koya.

⁴³ Sa vakararavi tu o koya vua na Kalou; ia, me vakabulai koya sara mada oqo kevaka e vinakati koya; ni a kaya, ‘Oi au na Luve ni Kalou.’ ”

⁴⁴ E rau sa bau vosa vakacacataki koya talega oi rau na daubutako e rau vakoti vata kaya ki na kauveilatai.

Na Mate i Jisu

⁴⁵ Sa qai butobuto na vanua taucoko mai na sigalevu tutu ka yacova na tolu na kaloko ena yakavi.

⁴⁶ Ia ni rauta na tolu na kaloko ena yakavi, sa qai kaci ena domo levu o Jisu, ka kaya, “Ilai, Ilai, lamasapakacani?” na kena i balebale, “Noqu Kalou, noqu Kalou, o ni sa biuti au ena vuku ni cava?”

⁴⁷ Era sa mani rogoca eso vei ira ka tu voleka, era sa kaya, “Sa kacivi Ilaijia tiko o koya!”

⁴⁸ Sa qai cici e dua vei ira ka taura e dua na vutovuto ka tonisua ena wai wiwi, ka viviga ki na dua na gasau, ka vagunuvi koya.

⁴⁹ Ia era sa kaya na kena vo, “Laiva mada me da raica se ena sobu mai o Ilaijia me vakabulai koya!”

⁵⁰ Sa qai kaci tale ena domo levu o Jisu, ka solia yani na yalona.

⁵¹ Ena gauna vata o ya, a sa kasei rua na i latilati ni Valenisoro, mai cake ka kauta ki ra, ka uneune na vanua, ka kakavidavida na veivatu lelevu;

⁵² a sa tadola mai na veibulubulu, ka vakaturi cake tale mai na mate e vuqa na tamata ni Kalou era sa mate tu.

⁵³ Era sa qai biuta na nodra i bulubulu; ia ni sa tucake tale mai na mate o Jisu, era sa qai lako ki na koro tabu, ka ra sa raici ira e lewe levu na tamata.

⁵⁴ Ni sa raica na uneune kei na veika kecega sa yaco oqo o koya na turaganivalu kei iratou na sotia ka yadravi Jisu voli, a ratou sa rere vakalevu, ka kaya, “Sa i koya dina oqo na Luve ni Kalou!”

⁵⁵ Era sa lewe vuqa talega na yalewa e kea era sa rai tale tu ga mai vakayawa, o ira ka muri Jisu mai Kalili, ka dau qaravi koya,

⁵⁶ ka maliwai ira o Maria na yalewa ni Makitala, kei Maria na tina i Jemesa kei Iosefo, kei na wati i Sepeti.

Na Bulu i Jisu

⁵⁷ Ni sa yakavi, sa qai lako mai e dua na tamata vutuniyau mai Arimacea, o Iosefo na yacana, ka sa bau yaco talega o koya me tisaipeli i Jisu.

⁵⁸ Sa lako vei Pailato, ka la'ki kerea na yago i Jisu. Sa qai vakarota o Pailato me soli vua na yagona.

⁵⁹ Sa qai kauta na yagona o Iosefo ka solega ena dua na i sulu lineni savasava,

⁶⁰ ka vakotori koya ena i bulubulu vou ka a taya e loma ni vatu, ka qai vaqiqica yani e dua na vatu levu ki na katuba ni bulubulu, ka qai lako yani.

⁶¹ E rau sa tiko kina o Maria na yalewa ni Makitala kei Maria ka dua, ka rau dabe donuya toka na i bulubulu.

Yadravi na Mata ni Bulubulu

⁶² Ena siga ka tarava, o ya na siga ni oti na Vakaraubuka, era sa qai soqoni vata vei Pailato o ira na bete levu kei ira na Farisi,

⁶³ ka ra kaya, “Turaga, keimami sa nanuma tiko ni a kaya na dauveivakacalai o ya ni a sa bula voli, ‘Ni oti ga e tolu na siga, au na tucake tale!’

⁶⁴ Mo ni vakarota mada kina me yadravi matua sara na i bulubulu me yacova na i katolu ni siga, de ra lako mai na nona tisaipeli ka butakoci koya ka kaya vei ira na tamata, ‘Sa tucake tale mai na mate o koya.’ Ena qai ca vakalevu cake na veivakacalai e muri mai na kena e liu.”

⁶⁵ Sa mani kaya vei ira o Pailato, “Dou kauta e dua na yadra, ka dou cakava ena nomudou i gu taucoko me sogoti ka taqomaki vinaka sara na i bulubulu.”

⁶⁶ Eratou sa qai lako ka sogota vakaukauwa na i bulubulu ena nodratou dregata na kena i sogo vatu, ka laivi koya na yadra me vakatawana.