Maciu 25 - Vakavakadewa Vou kei na iVola tale eso

Na Vosa Vakatautauvata ni Goneyalewa e Lewe Tini

¹ “Ena rawa ni vakatautauvatataki na matanitu vakalomalagi kei na goneyalewa e lewe tini ka a kauta na nodratou cina ka la'ki veitavaki kei na tagane sa qai vakawati vou.

² E lewe lima vei iratou e lialia ka lewe lima e vuku.

³ E ratou sa kauta ga na nodratou cina na lialia ka sega ni kauta vata tiko kei na waiwai;

⁴ ia, o iratou na vuku e ratou sa kauta na nodratou cina kei na tavaya waiwai.

⁵ Ia ni sa bera ga mai na tagane vou, e ratou sa sosovu kecega ka moce.

⁶ “Ni sa bogilevu tutu, sa qai rogo mai na kacikaci, ‘Sa lako mai oqo na tagane vou! Dou lako mai ka tavaki koya!’

⁷ E ratou sa qai tucake kece sara na goneyalewa e tini, ka vakarautaka na nodratou cina.

⁸ E ratou sa qai kaya na lialia vei iratou na vuku, ‘Dou solia mada mai vei keitou eso na nomudou waiwai, ni sa voleka ni boko na neitou cina.’

⁹ E ratou sa qai sauma na vuku, ka kaya, ‘E segai, de sega ni rauti keda vata. Dou lako ga ki na sitoa ka volia eso me nomudou.’

¹⁰ Ni ratou sa lako yani ki volivoli, sa yaco sara mai na tagane vou, ka ratou curu vata kaya sara ki na kana magiti ni vakawati o iratou ka sa vakarau tu, ka sogo sara na katuba.

¹¹ “E ratou sa qai lako talega mai e muri o iratou na goneyalewa lialia o ya, ka kaya, ‘Turaga, isa turaga, ni dolava vei keitou na katuba!’

¹² A sa sauma na tagane vou ka kaya, ‘Au sa kaya vakaidina vei kemudou, au sa sega ni kilai kemudou.’

¹³ Sa qai kaya o Jisu, “Mo dou tu vakarau kina, baleta ni dou sa sega ni kila na siga se na kena aua.

Na Vosa Vakatautauvata ni Tolu na Tamata Dauveiqaravi

¹⁴ “Ena gauna o ya, ena vakaoqo na matanitu vakalomalagi. A sa dua na tamata ka sa lako yani ki na dua na vanua tani; a sa kacivi iratou mai na nona dauveiqaravi ka lesi iratou ki na qaravi ni nona i yau.

¹⁵ A sa solia vei iratou yadua na i yau me veiganiti kei na veika e ratou rawa ni cakacakataka: ki vua e dua sa solia kina e 5,000 na tiki ni siliva, ki vua tale e dua sa solia kina e 2,000, ka sa solia e 1,000 vua tale edua. A sa qai lako sara yani.

¹⁶ Sa mani lako yani na dauveiqaravi ka taura e 5,000, ka la'ki cakacakataka ka rawata mai e lima tale na udolu.

¹⁷ E vaka talega kina o koya ka a taura e rua na udolu, a sa rawata mai e rua tale na udolu.

¹⁸ Ia o koya ka a taura e dua na udolu, sa lako ga ka kelia e dua na qara ka vunia kina na i lavo ni nona turaga.

¹⁹ “Sa dede sara, sa qai lako mai na nodratou turaga na tamata oqori, ka taroga na nodratou cakacaka.

²⁰ Sa qai lako mai vua o koya ka a taura e 5,000 na tiki ni siliva ka sa solia lesu e lima tale na udolu, ka kaya, ‘Turaga, o ni a solia vei au e 5,000. Raica, au sa rawata tale e 5,000.’

²¹ Sa qai kaya vei koya na nona turaga, ‘Daumaka dina, tamata vinaka ka dina. Ni o sa dina ena veika e vica walega, ka'u na lesi iko kina mo lewa na veika e vuqa. Curu ki na marau ni nomu turaga.’

²² “Sa qai lako talega mai o koya ka a taura e 2,000, ka kaya, ‘Turaga, o ni a solia vei au e 2,000. Raica, au sa rawata e rua tale na udolu.’

²³ Sa qai kaya vei koya na nona turaga, ‘Daumaka dina, tamata vinaka ka dina. Ni o sa dina ena veika e vica walega, ka'u na lesi iko kina mo lewa na veika e vuqa. Curu ki na marau ni nomu turaga.’

²⁴ “A sa qai lako mai na dauveiqaravi ka a taura e 1,000, ka kaya, ‘Turaga, au sa kilai kemuni; o ni sa turaga dredre, ka dau tatamusuki ena vanua o ni sega ni kaburaka kina, ka dau kumukumuni mai na vanua o ni sega ni veibiuyaka kina na i tei.

²⁵ Ena noqu rere, au a la'ki vunia kina na nomuni udolu ki na qele. Raica, oqo ga na ka sa nomuni.’

²⁶ Sa qai vosa na nona turaga ka kaya, ‘Tamata ca ka vucesa! Oi, o sa kila ni'u dau tatamusuki ena vanua au sega ni kaburaka kina, ka dau kumuna mai na vanua ka'u a sega ni veibiuyaka kina?

²⁷ Sa dodonu kina mo biuta na noqu i lavo vei ira na i taukei ni baqe, ni'u sa lako mai me'u qai taura tale na noqu i lavo kei na kena tubu.

²⁸ Dou taura tani mai vua na dua na udolu o ya ka solia vei koya e tiko vua e tini na udolu.

²⁹ O koya ga sa tu vua na ka, ena qai soli vakalevu tale yani vua; ia o koya e sega ni tu vua na ka, ena kau tani talega mai vua na ka e sa bau toka vua.

³⁰ Dou biuti koya yani na tamata tawa yaga oqo ki na butobuto e tautuba; ena dau tagi kina ka vakasequruquru bati.’

Na Nodra Lewai na Veimatanitu

³¹ “Ni sa na lako mai na Luve ni Tamata ena nona lagilagi, vata kei ira na agilosi, ena qai tiko o koya ena nona i tikotiko lagilagi,

³² ka ra na soqoni vata e matana na lewe ni veivanua kecega. Sa na qai tawasei ira rua o koya, me vaka na i vakatawanisipi e tawasei ira na sipi mai vei ira na me.

³³ O koya ena biuti ira na tamata yalododonu ena yasana i matau ka biuti ira na kena vo ena yasana i mawi.

³⁴ “Ena qai kaya na Tui vei ira sa tiko ena yasana i matau, ‘Ni lako mai, oi kemuni ka sa vakalougatataki mai vei Tamaqu, mo ni taukena na matanitu sa vakarautaki tu me nomuni mai na i vakatekivu kei vuravura.

³⁵ Ni'u a viakana, o ni a solia vei au na kakana; au a viagunu, o ni a vagunuvi au; au a vulagi voli, o ni a kauti au ki vale;

³⁶ au a luvawale, o ni a vakasulumi au; au a tauvimate, o ni a qaravi au; au a tiko e valeniveivesu, o ni a sikovi au.’

³⁷ Era na qai vosa vua na yalododonu ka kaya, ‘Turaga, keimami a raici kemuni mada e naica ni o ni a viakana ka vakani kemuni, se viagunu ka vagunuvi kemuni.

³⁸ Keimami a raici kemuni e naica ni o ni a vulagi voli ka kauti kemuni ki vale, se luvawale ka vakasulumi kemuni?

³⁹ Keimami a raici kemuni e naica ni o ni a tauvimate, se tiko e valeniveivesu, ka la'ki sikovi kemuni?’

⁴⁰ Ena qai sauma na Tui ka kaya vei ira, ‘Au sa kaya vakaidina vei kemuni, ena nomuni dau cakava na ka oqo vei ira sa muri au voli ka ra sega soti ni dau kauwaitaki vakalevu, o ni sa cakava tiko oqo vei au!’

⁴¹ “Ena qai tukuna talega o koya vei ira ena yasana i mawi, ‘Ni lako tani vei au, oi kemuni sa cudruvi! Ni lako sara ki na bukawaqa tawamudu sa vakarautaki tu vua na tevoro kei ira na nona agilosi!

⁴² Au a viakana, ia o ni a sega ni solia vei au na kakana; niu a viagunu, o ni a sega ni vagunuvi au;

⁴³ au a vulagi voli, ia o ni a sega ni kauti au ki vale; luvawale, ia o ni a sega ni vakasulumi au; tauvimate, ka tiko ena valeniveivesu, ia o ni a sega ni mai sikovi au.’

⁴⁴ Era na qai vosa tale vua, ka kaya, ‘Turaga, keimami a raici kemuni e naica ni o ni a viakana, se viagunu, se vulagi voli, se luvawale, se tauvimate, se tiko ena valeniveivesu, ka sega ni qaravi kemuni?’

⁴⁵ Ena qai sauma vei ira o koya, ka kaya, ‘Au sa kaya vakaidina vei kemuni, ena nomuni a bese ni vukea ira na tamata era dau sega tu ni kauwaitaki vakaoqo, o ni sa bese talega kina ni vukei au.’

⁴⁶ Era na qai lako tani o ira oqo ki na cudruvi tawamudu, ia o ira na yalododonu ki na bula tawamudu.”