Maciu 24 - Vakavakadewa Vou kei na iVola tale eso

Sa Tukuna o Jisu na Kena Rusa na Valenisoro

¹ Sa qai biuta mai na Valenisoro o Jisu ka lako yani, ka ratou lako mai na nona tisaipeli me vakaraitaka vua na veivale ni Valenisoro.

² Sa qai kaya o koya vei iratou, “Dou sa raica na ka kece oqo? Au sa kaya vakaidina vei kemudou, ena sega ni vo tale eke e dua na vatu me taqa toka ki na dua tale, ena talaraki sobu kecega.”

Na Leqa e Vuqa kei na Veivakacacani

³ Ni sa la'ki dabe toka o koya mai na Ulunivanua ni Veiolive, e ratou sa qai lako vuni ga yani na tisaipeli, ka kaya, “Ni tukuna mada vei keitou se ena yaco ni naica na veika oqo, ka cava na kena i vakatakilakila ni nomuni lako mai, kei na i vakataotioti kei vuravura?”

⁴ Sa qai sauma, ka kaya vei ira, “Dou qarauna me kakua ni vakacalai kemudou e dua.

⁵ Ni ra na lako mai e lewe vuqa ena yacaqu, ka kaya voli, ‘Sa i au na Mesaia,’ ka ra na vakacalai ira e lewe vuqa.

⁶ Dou na rogoca na veivaluvaluti kei na rogorogo ni valu; ia mo dou kakua ni kidroa kina. Sa dodonu me yaco mada oqori, ia e sega ni kena i balebale o ya ni sa yaco mai na i vakataotioti ni gauna.

⁷ Era na veivaluvaluti na veivanua kei na veimatanitu, ka na yaco na dausiga kei na uneune ena veivanua kecega.

⁸ A veika kece oqo sa vaka na i vakatekivu ni ka rarawa sa sotava na yalewa sa voleka ni vakasucu gone.

⁹ “Era na soli kemudou yani na tamata ki na veivakararawataki ka ra na vakamatei kemudou, dou na cati mai na veivanua ena vuku ni yacaqu.

¹⁰ Ka lewe vuqa era na tarabe, ka veibukiveretaki ka veicati.

¹¹ Era na tubu mai e lewe vuqa na parofita vakailasu ka vakacalai ira e lewe vuqa.

¹² Ena kena sa tubu vakalevu na i valavala tawa dodonu, sa na batabata kina na nodra loloma e lewe vuqa.

¹³ Ia, o koya ena vosota me yacova na i vakataotioti, ena vakabulai.

¹⁴ Ka na vunautaki mada na i Tukutuku Vinaka ni matanitu ki na vuravura taucoko, me i vakadinadina ki na veivanua kecega, sa na qai yaco mai na i vakataotioti.

Na Ka Vakasisila e Dauveivakarusai

¹⁵ “O koya oqo, ni dou sa raica na ka vakasisila e dauveivakarusai ni sa toka ena yasana vakatabui, me vaka na ka sa vosa kina o Taniela na parofita (me kila o koya e wilika),

¹⁶ me ra qai dro sara ki na veiulunivanua o ira era sa tiko mai Jutia;

¹⁷ me kakua ni siro mai o koya sa toka e dela ni vale me mai kauta tani na veika era tiko e nona vale;

¹⁸ ka me kakua ni lesu tale o koya sa tiko ena i teitei me la'ki kauta mai na nona i sulu.

¹⁹ Era na kalouca na bukete kei ira era susu gonelalai tiko ena gauna o ya!

²⁰ Dou masulaka me kakua mada ga ni yaco na nomudou i valu oqori ena vula i liliwa, se ena Siga ni Vakacecegu,

²¹ ni leqa ena sotavi ena gauna o ya ena levu cake sara mai na kena e sa yaco oti, me tekivu oqo mai na i vakatekivu ni gauna me yacova na siga edaidai. Ena sega tale ni vakakina e muri.

²² Ia kevaka e qai sega ni vakalekalekataki na gauna o ya, ena sega ni bula rawa tale e dua na tamata; ia ena vukudra ga na digitaki, sa na vakalekalekataki kina na gauna oqori.

²³ “Ia ke mani dua e kaya vei kemudou, ‘Raica, sa tiko oqo na Mesaia!’ se ‘Sa i koya o ya!’ — dou kakua ni vakadinata.

²⁴ Ni ra na tubu mai na Mesaia vakailasu kei na parofita vakailasu, ka ra na vakaraitaka mai na veivakatakilakila lelevu kei na veika veivakurabuitaki me vakacalai ira kina na tamata digitaki ni Kalou.

²⁵ Dou rogoca! Au sa tukuna rawa oqo vei kemudou ni se bera ni yaco na kena gauna.

²⁶ “Kevaka era kaya vei kemudou, ‘Raica, e tiko o koya mai na vanua veitalasiga,’ kakua ni lako kina; ‘Raica, sa tiko sara ena rumu e loma,’ kakua ni vakadinata.

²⁷ Me vaka ga na tibi ni livaliva mai na tokalau ka serau yani vaka ki na ra, ena vaka talega kina na nona lako mai na Luve ni Tamata.

²⁸ “Ena vanua ga e koto kina na yago ni mate, era na vakasoqoni vata kina na manulevu.”

Na Lako Mai ni Luve ni Tamata

²⁹ “Ni sa qai oti koto ga na veika rarawa ena gauna o ya, ena qai vakabutobutotaki na matanisiga, ka na sega ni cila na rarama ni vula. Era na lulutu mai na veikalokalo mai lomalagi, ka na kureitaki na veika kaukauwa ni lomalagi.

³⁰ Sa na qai rairai mai na i vakatakilakila ni Luve ni Tamata mai lomalagi, ka ra na tagi na tamata kecega e vuravura ni ra raica na Luve ni Tamata ni sa lako mai ena veio ni lomalagi vata kei na kaukauwa kei na i serau levu.

³¹ Ena rogo vakadomoilevu na davui, ka na talai ira yani na nona agilosi o koya me ra soqoni ira vata na nona tamata digitaki mai na dua na yasa ni vuravura ki na yasana kadua.

Na Lesoni ni Vunilolo

³² “Dou vulica mada na lesoni mai na vunilolo: ni sa lavouvou mai na tabana, ka tubu mai na drauna, dou sa kila ni sa voleka na vula i katakata.

³³ Sa vaka talega kina vei kemudou, ni dou sa raica na veika oqo, dou na kila kina ni sa toso voleka mai na gauna, ka sa vakarau lako mai.

³⁴ Au sa kaya vakaidina vei kemudou, ena sega mada ni takali na i tabatamata oqo, ena yaco mada e liu na veika kecega oqo.

³⁵ Ena takali o lomalagi kei vuravura, ia na noqu vosa ena sega ni takali.

E Sega e Dua e Kila na Kena Siga se Aua

³⁶ “Ia e sega e dua e kila na siga o ya, se na aua o ya, e segai talega o ira na agilosi mai lomalagi, e segai na Luvena, ia o Tamaqu duadua ga.

³⁷ Me vaka ena siga i Noa, ena vaka talega kina na nona lako mai na Luve ni Tamata.

³⁸ Era a kana ka gunu na tamata ena siga eso ni se bera ni yaco na waluvu, ka ia na vakawati kei na veimusumusuki ni vakawati me yacova na siga sa vodo kina ki waqa o Noa;

³⁹ ia era sa sega ga ni kila na veika sa yaco tiko me la'ki yacova ni sa qai yaco mai na waluvu ka luvuci ira kece sara. Ena vaka talega oqo na nona lako mai na Luve ni Tamata.

⁴⁰ E rau na tiko ena i teitei e lewe rua na tagane; ena kau tani e dua ka biu tu mai e dua.

⁴¹ E rau na qaqi sila tiko e lewe rua na yalewa; ena kau tani e dua ka biu tu mai e dua.

⁴² O koya oqo mo dou yadra tiko, ni dou sa sega ni kila na gauna ena yaco mai kina na nomudou Turaga.

⁴³ Ia mo dou kila oqo: kevaka sa kila tiko na i taukei ni vale na gauna ena lako mai kina na daubutako, ena yadra tiko ka na sega ni laiva tu ga na nona vale me mai basu.

⁴⁴ O koya oqo mo dou tu vakarau talega, ni na yaco mai na Luve ni Tamata ena dua na gauna dou sega ni namaka.

Na Dauveiqaravi Yalo Dina se Tawa Yalo Dina

⁴⁵ “O cei mada na dauveiqaravi yalo dina ka vuku, o koya ena lesia na nona turaga me lewa na nona matavuvale, me solia vei ira na kedra kakana ena kena gauna dodonu?

⁴⁶ Sa kalougata na tamata e kunei koya na nona turaga ena gauna e yaco mai kina ni sa cakava tiko vakakina.

⁴⁷ Au sa kaya vakaidina vei kemudou, ena lesi koya me lewa na veika kece e tu vua.

⁴⁸ Ia, kevaka e mani kaya ga e lomana na dauveiqaravi ca o ya, ‘Ena yaco vakaberabera toka mai na noqu turaga,’

⁴⁹ ena tekivu me mokuti iratou na nona i tokani dauveiqaravi, ka ia talega na kana kei na gunu vata kei ira na daumateni.

⁵⁰ Ia ena qai yaco mai na nona turaga na tamata o ya ena dua na siga sa sega ni namaki koya kina kei na dua na gauna sa sega ni kila.

⁵¹ Na nona turaga ena qai musuki koya laivi ka biuta koya vata kei ira na dauveivakaisini. Ena qai dau tagi kina ka vakasequruquru bati.