Maciu 22 - Vakavakadewa Vou kei na iVola tale eso

Na Vosa Vakatautauvata ni Magiti ni Vakawati

¹ Sa qai vosa tale tiko vei ira o Jisu ena vosa vakatautauvata ka kaya,

² “E rawa ni vakatautauvatataki na matanitu vakalomalagi kei na dua na tui sa cakava na magiti ni vakawati nei luvena tagane.

³ Sa qai talai ira yani na nona tamata me ra sa la'ki kacivi ira mai era sureti ki na kana magiti ni vakawati, ia era sa qai sega ni via lako mai.

⁴ Sa qai talai ira tale eso, ka kaya, ‘La'ki kaya vei ira na sureti, Raica, sa vakarautaki oti tu na kakana; sa vakamatei kina eso na noqu bulumakau, kei na manumanu uro, ka sa vakarau tu na ka kecega, dou lako sara mai ki na magiti ni vakawati.’

⁵ Ia era sa vakawaletaka ga, ka dui lako, e dua ki na nona i teitei, ka dua ki na nona cakacaka ni veivoli;

⁶ ia o ira na kena vo era sa qai tauri ira na nona tamata, ka vakacacani ira, ka vakamatei ira.

⁷ Sa cudru sara kina na tui, ka qai tala yani na nona mataivalu ka vakamatei ira na daulaba o ya, ka vakama na nodra koro.

⁸ Sa qai kaya o koya vei ira na nona tamata, ‘Sa vakarau oti tu na magiti ni vakawati, ia sa sega ni ganiti ira era a sureti,

⁹ o koya oqo, dou lako yani ki na i bili ni koro, ka sureti ira kece mai dou sota kaya ki na magiti ni vakawati.’

¹⁰ Era sa qai lako yani o ira na tamata oqori ki na veigaunisala, ka vakasoqoni ira kece mai era sa kunea, se ra vinaka se ra ca, ka sa sinai na vale levu ni vakawati vei ira na tamata.

¹¹ “Ni sa curu mai na tui me raici ira na nona vulagi sureti, sa qai raica kina e dua na tamata ka sega ni vakaisulu tu ena i sulu ni vakawati,

¹² ka sa qai kaya vua, ‘Noqu i tau, o curu vakacava tu mai ki ke ni sega vei iko na i sulu ni vakawati?’ Ia, sa vagagalu toka ga o koya.

¹³ Sa qai kaya na tui vei ira na nona tamata, ‘Dou vesuka na yavana kei na ligana ka biuti koya ki na butobuto e tautuba; ena dau tagi kina ka vakasequruquru bati.’

¹⁴ “Ni ra sa kacivi e lewe vuqa, ia sa lewe lailai ga era sa digitaki.”

Na Taro me Baleta na Saumi i Vakacavacava

¹⁵ Era sa qai lako na Farisi, ka ra bosea me ra coriti Jisu vaka e vei ena nona vosa.

¹⁶ Era sa mani talai ira yani na nodra tisaipeli kei ira na i lawalawa i Eroti, ka kaya, “Vakavuvuli, keimami kila ni o sa dau tukuna na ka dina. O ni sa vakavuvulitaka na ka dina me baleta na lewa ni Kalou ena vukudra na tamata, ka o ni sega ni bau lomaleqataka na veika era nanuma na tamata baleta ni sa ka wale vei iko na nodra i tutu na tamata.

¹⁷ Mo ni tukuna mada kina vei keimami se cava na nomuni vakasama? Sa dodonu li me da saumi i vakacavacava vei Sisa, se segai?”

¹⁸ A raica rawa na ca ni yalodra o Jisu, ka kaya, “A yavu tamata dauveivakaisini oi kemudou! Na cava dou sa via veretaki au kina?

¹⁹ Dou vakaraitaka mai vei au e dua na i lavo ni soli vakacavacava!” Era sa qai kauta mai e dua na i lavo siliva.

²⁰ Sa qai tarogi ira o koya, “A mata i cei kei na yaca i cei e volai tu oqo?”

²¹ Era sa kaya, “A nei Sisa.” Sa qai kaya vei ira o Jisu, “Dou solia vei Sisa na ka sa nei Sisa, ki vua na Kalou na ka sa nona na Kalou.”

²² Ia ni ra sa rogoca, era sa kurabui ga ka biuti koya ka lako yani.

Na Taro me Baleta na Tu Cake Tale Mai na Mate

²³ Ena siga vata o ya, era sa lako mai vei Jisu eso na Setoki, ka ra mai kaya voli ni ra na sega ni tucake tale mai na mate na tamata, ka ra sa tarogi Jisu ena dua na taro, ka kaya,

²⁴ “Vakavuvuli, e kaya o Mosese ni kevaka sa mate e dua na tagane ka sega na luvena, me qai vakawatitaka na nona yada o tacina, me rawa ni vakawa kina ka me wili na luvena vua na tuakana.’

²⁵ Ia e ratou dau bula voli eke e ratou lewe vitu na veitacini; sa vakawati o koya na i matai, ka mate; ia a sega na luvena ka laiva tu mai na watina vua na tacina.

²⁶ E a vakakina na i karua, kei na i katolu, me yacovi koya sara na i kavitu.

²⁷ A sa qai mate duadua e muri na yalewa.

²⁸ Ni sa gauna ni tucake tale mai na mate, ena qai wati cei vei iratou na lewe vitu o koya? E ratou a watina kece sara.”

²⁹ Sa sauma o Jisu, ka kaya vei ira, “Dou sa qai cala sara! Baleta ni dou sa lecava ga na i Vola Tabu, se na kaukauwa ni Kalou.

³⁰ Ni ra sa na tucake tale mai na mate, era sa na sega ni vakawati, se veimusumusuki, ka ra sa na vakataki ira ga na agilosi mai lomalagi.

³¹ Ia me baleta na nodra tucake tale na mate, dou sa sega li ni wilika na ka sa tukuna na Kalou vei kemudou? Ni a kaya,

³² ‘Oi au na Kalou i Epara-ama, na Kalou i Aisake, kei na Kalou i Jekope.’ O koya e sega ni nodra Kalou na mate, sa nodra ga na bula.”

³³ Ni ra sa rogoca na lewe vuqa, era sa kurabui sara ena nona i vakavuvuli.

Na i Vakaro Levu

³⁴ Ia ni ra sa rogoca na Farisi ni sa vagalui ira na Setoki o koya, era sa qai soqoni vata mai,

³⁵ ka dua vei ira, e dua na daunilawa, sa qai taroga me vakatovolei koya, ka kaya;

³⁶ “Vakavuvuli, na cava na i vakaro levu duadua ena Lawa?”

³⁷ Sa qai kaya vua o Jisu, “Mo lomana na Turaga na nomu Kalou ena lomamu taucoko, kei na yalomu taucoko, kei na nomu vakasama taucoko.

³⁸ Sa i koya oqo na i matai ka i vakaro levu duadua.

³⁹ Na i karua e vakaoqo: Mo lomana na kai nomu me vakataki iko.

⁴⁰ Sa vakatau ki na i vakaro e rua oqo na Lawa kecega kei ira na parofita.”

Na Taro me Baleta na Mesaia

⁴¹ Ni ra sa vakasoqoni vata tikoga na Farisi, sa qai tarogi ira o Jisu,

⁴² ka kaya, “A cava dou sa nanuma me baleta na Mesaia? Na luve i cei o koya?” Era sa qai kaya vua, “Na luve i Tevita.”

⁴³ Sa qai kaya vei ira o koya, “Ia sa qai vakatokai koya rawa ga vakacava o Tevita ena Yalo Tabu, me Turaga? Ni a kaya,

⁴⁴ ‘Sa kaya na Turaga ki vua na noqu Turaga, Ni mai dabe ena yasaqu i matau, Me yacova ni'u sa vakatikori ira na nomu meca ena ruku ni yavamu.’

⁴⁵ Kevaka sa vakatokai koya vakaoqo o Tevita me Turaga, me qai kawa i Tevita vakacava li na Mesaia?”

⁴⁶ E sega e dua me kaya rawa vua e dua na ka, ka sega tale e dua e doudou me tarogi koya tale me tekivu mai na siga o ya.