Maciu 20 - Vakavakadewa Vou kei na iVola tale eso

O Ira ka La'ki Cakacaka ena Loganivaini

¹ “Ni sa tautauvata na matanitu vakalomalagi kei na i taukei ni vale ka sa sou vakamataka yani me la'ki kauti ira mai eso na tamata me ra mai cakacaka saumi ena nona loganivaini.

² Ni sa lomavata kei ira na tamata cakacaka me ra tauyadua na i lavo siliva ena dua na siga me kedra i sau, sa qai talai ira yani ki na loganivaini.

³ Sa qai lako yani ena ciwa na kaloko ki na makete ka raici ira eso ni ra tu walega kina.

⁴ Sa qai kaya vei ira, ‘Dou lako talega ki na loganivaini, ka'u na saumi kemudou ena i sau sa veirauti.’ Era sa mani lako yani.

⁵ Sa lako tale yani o koya ena tinikarua kei na tolu na kaloko, ka cakava vakakina.

⁶ Ni sa rauta na lima ena yakavi, sa lako yani ki na makete ka raici ira eso tale era tu walega, sa qai tarogi ira, ‘A cava dou sa vakaoti gauna voli ga kina eke ka sega ni cakava e dua na ka?’

⁷ Era sa qai kaya vua, ‘Ni sega e dua e soli cakacaka vei keimami.’ Sa qai kaya vei ira o koya, ‘Dou lako talega ki na loganivaini ka cakacaka kina.’

Na Nodra Saumi na Tamata Cakacaka

⁸ “Ia ni sa yakavi mai, sa qai kaya na i taukei ni loganivaini vua na nona tamata, ‘Kacivi ira mai na tamata cakacaka, ka saumi ira, tekivu yani vei ira na muri ka qai vakaoti vei ira sa liu.’

⁹ Ni ra sa lako mai o ira ka saumi mai na lima na kaloko, era sa mai tauyadua na i lavo siliva.

¹⁰ Ni ra sa lako mai o ira era tekivu e liu, era sa nanuma ga ni ra na taura vakalevu cake, ia era sa tauyadua talega na i lavo siliva.

¹¹ Ni ra sa taura na kedra i sau, era sa qai didi vua na i taukei ni vale,

¹² ka kaya, ‘O ira oqo ka qai vakacakacakataki sara e muri era cakacaka ga ena dua na aua, ia o sa vakatautauvatataki ira vata kei keimami sa colata na bibi ni siga taucoko kei na katakata ni siga.’

¹³ Ia, sa qai sauma vua na i taukei ni loganivaini ka kaya, ‘Na wekaqu, mo rogoca vinaka oqo. Au sa sega ni veidabuitaki iko. E daru a sega li ni lomavata me kemu i sau e dua na i lavo siliva?

¹⁴ Taura na kemu i sau ka lako; sa lomaqu me'u solia vua sa vakacakacakataki e muri na levu ni i sau vata ga ka'u sa solia vei iko.

¹⁵ E sega li ni tu vei au na dodonu me'u lewa ga se cava au cakava ki na ka e noqu? Se o sa vuvu ga baleta ni'u sa rui lomasoli?’

¹⁶ Era na liu vakakina o ira sa muri, ka ra na muri o ira sa liu.”

Na i Katolu ni Nona Tukuna na Ka e Baleta na Nona Mate o Jisu

¹⁷ Ni sa lako cake ki Jerusalemi o Jisu, sa qai kauti iratou vakatikitiki na tisaipeli mai gaunisala, ka kaya vei iratou,

¹⁸ “Raica, tou sa lako cake tiko ki Jerusalemi; ka na soli yani na Luve ni Tamata vei ira na bete levu, kei ira na daunilawa, ka ra na lewai koya me mate,

¹⁹ ka soli koya vei ira na kai matanitu tani, me ra vakalialiai koya, ka vakanakuitataka, ka vakota ki na kauveilatai, ka na qai vakaturi cake tale mai na mate o koya ena i katolu ni siga.”

Na Nona Kerekere e Dua na Tina

²⁰ Sa qai lako mai vua na tinadrau na luve i Sepeti, kei rau na luvena tagane, ka mai cuva e matana, ka kerea vua e dua na ka.

²¹ Sa kaya vua na yalewa o Jisu, “Na cava o vinakata?” Sa qai kaya vua, “Mo ni yalataka mada vei au me rau na tiko na luvequ oqo, e dua ena ligamuni i matau, ka dua ena ligamuni i mawi ena nomu matanitu.”

²² Sa sauma o Jisu vei rau na veitacini, ka kaya, “Drau sa sega ni kila na ka drau sa kerea tiko: drau sa rawata li mo drau gunuva na bilo ka'u sa vakarau gunuva oqo?” E rau sa kaya vua, “Keirau rawata.”

²³ Sa qai kaya vei rau, “Drau na gunu vakaidina ena mequ bilo, ia mo drau tiko ena ligaqu i matau se ligaqu i mawi, e sega ni tu vei au na dodonu me'u digitaka. Na veitikina oqo sa baleti ira ga sa vakarautaka tu o Tamaqu me nodra.”

²⁴ Ni ratou sa rogoca na vo ni tisaipeli e tini na ka oqo, e ratou sa cudruvi rau sara kina na veitacini.

²⁵ Sa qai kacivi iratou kece vata mai o Jisu, ka kaya, “Dou sa kila ni ra dau vakacolasau vei ira na kai veimatanitu tani o ira na nodra i liuliu, ka ra dau vakataulewa vei ira ena lewa kaukauwa o ira na nodra turaga dokai.

²⁶ Ia, oqo, ena sega ni vakakina vei kemudou. Kevaka e dua vei kemudou sa vinakata me levu cake, ia me na dauveiqaravi o koya vei iratou na kena vo;

²⁷ kei koya vei kemudou sa vinakata me na liu duadua e dodonu me nomudou dauveiqaravi,

²⁸ ka me vaka na Luve ni Tamata, ni sa sega talega ni lako mai me qaravi, ia me veiqaravi ga, ka solia na nona bula me kedra i voli vakadua na lewe vuqa.”

Vakabulai Rau e Lewe Rua na Mataboko o Jisu

²⁹ Ni ratou sa biuti Jeriko, era sa muri koya mai e dua na i lala levu.

³⁰ Ka raica, e rau sa dabe toka e yasa ni gaunisala e lewe rua na tamata mataboko, ni rau sa rogoca ni sa lako voli yani o Jisu, e rau sa qai kacikaci mai, ka kaya, “Kemuni na Turaga, na Luve i Tevita, ni lomani keirau mai.”

³¹ Era sa vosataki rau o ira na lewe vuqa me rau tiko lo. Ia e rau sa qai kailavaka yani ena domo e levu cake sara, “Turaga! Na Luve i Tevita! Ni lomani keirau saka mai!”

³² Sa qai tu vakadua o Jisu, ka kacivi rau, ka kaya, “Na cava drau vinakata me'u cakava vei kemudrau?”

³³ E rau sa qai kaya vua, “Turaga, me rai rawa na mata i keirau.”

³⁴ Ena loloma levu sa qai tara na matadrau, ka rau sa rai rawa sara ka muri koya.