Maciu 2 - Vakavakadewa Vou kei na iVola tale eso

O Iratou na Vulagi mai na Tokalau

¹ A sa sucu o Jisu mai Peceliema e Jutia ena gauna i Eroti na tui. Ni oti ga o ya, e ratou sa yaco yani ki Jerusalemi eso na tamata vuku mai na yasana vaka ki na tokalau,

² ka taroga, “E vei o koya sa sucu me nodra tui na Jiu? Keitou a raica na nona kalokalo mai na tokalau, ka keitou sa lako mai oqo me sokalou vua.”

³ Ni sa rogoca na ka oqo o Eroti na tui, sa leqa na lomana ka vakakina o Jerusalemi taucoko.

⁴ Sa qai vakasoqoni ira vata kecega na bete levu kei ira na nodra daunilawa na tamata, ka vakataroga vei ira, “Ena sucu beka evei na Mesaia?”

⁵ Era sa qai kaya vua, “Mai na koro o Peceliema e Jutia, ni sa vola tu vakaoqo na parofita:

⁶ ‘O iko Peceliema, ena vanua o Juta, O sa sega ni lailai sobu mai vei ira na veikoro e Juta; Ni na tubu mai vei iko e dua na dauveiliutaki Me na liutaki ira na noqu tamata na Isireli.’ ”

⁷ Sa qai kacivi iratou na tamata vuku o Eroti ka taroga matua vei iratou na gauna ka a rairai kina na kalokalo.

⁸ Sa qai talai iratou ki Peceliema, ka kaya, “Dou la'ki vakasaqara matua sara na gone lailai; ia, ni dou sa kunea, dou qai tukuna mai vei au, me'u bau la'ki vakarokoroko talega vua.”

⁹ Ni ratou sa rogoca oti na vosa ni tui, e ratou sa mani lako sara. Ia ni ratou sa lako tiko e ratou sa raica na kalokalo ga e ratou a raica mai na tokalau. E toso tiko ki liu na kalokalo ka la'ki tu vakadua donuya na vanua e koto kina na gone.

¹⁰ Sa levu dina na nodratou marau ena gauna e ratou raica kina na kalokalo.

¹¹ Ia ni ratou sa curu ki vale, e ratou sa raica na gone kei Maria na tinana. E ratou sa tekiduru ka vakarokoroko vua. E ratou sa qai dolava na nodratou taga ka cabora vua na nodratou i loloma; na koula, na ferekiniseni, kei na mura.

¹² E ratou sa qai lesu tale ki na nodratou vanua ena dua tani tale na sala; me vaka ni a kaya vei iratou na Kalou ena dua na tadra me ratou kakua ni lako tale vei Eroti.

Dro ki Ijipita

¹³ Ia ni ratou sa lesu tale, sa qai rairai vei Iosefo e dua na agilosi ni Turaga, ka kaya, “Mo cavutu, ka kauta na gone lailai kei tinana, ka dro ki Ijipita, ka mo tiko ga kina me yacova ni'u sa tukuna tale vei iko e dua na ka; ni sa vakarau oqo me vakasaqara na gone lailai o Eroti me vakamatea.”

¹⁴ Sa cavutu o koya ka kauta na gone lailai kei tinana ena bogi, ka lako ki Ijipita,

¹⁵ ka tiko kina me yacova na mate i Eroti. Sa yaco o ya me vakayacori kina na vosa ni Turaga ka a kaya na parofita, “Au a kaciva na Luvequ mai Ijipita.”

Na Nodra Vakamatei na Gone Lalai

¹⁶ Ia o Eroti, ni sa qai kila ni ratou sa vakaisini koya o iratou na tamata vuku, sa cudru vakalevu sara. A vakarota me ra vakamatei o ira kece na gonetagane lalai era yabaki rua ka lako sobu mai Peceliema kei na veivanua vakavolivolita, ka yaco oqo me veidonui kei na gauna ka a vaqaqai iratou matua kina na tamata vuku o koya.

¹⁷ Sa qai vakayacori sara kina na vosa i Jeremaia na parofita, ni a kaya,

¹⁸ “Sa rogo e dua na domo mai Rama, A qoqolou kei na tagi lagalaga, E tagicaki ira na luvena o Rejieli; Ka bese ni vakacegui kina, ni ra sa yali.”

Lesu mai Ijipita

¹⁹ Ni sa mate o Eroti, sa rairai vei Iosefo ena tadra mai Ijipita e dua na agilosi ni Turaga,

²⁰ ka kaya, “Cavutu, ka kauta na gone lailai kei tinana, ka lako ki na nodra vanua na Isireli, ni ra sa mate o ira era a via vakamatea na gone.”

²¹ A sa qai cavutu o koya ka kauta na gone lailai kei tinana, ka lako ki na nodra vanua na Isireli.

²² Ia ni sa rogoca ni sa tui tiko mai Jutia o Arikeleo me i sosomi kei Eroti na tamana, sa rere ni lako kina; ia ni sa vakasalataki kina ena tadra, sa mani lako sara ki na yasayasa vaka-Kalili,

²³ ka la'ki tiko ena koro ka yacana o Nasareci, ka me vakayacori sara kina na vosa era a kaya na parofita, “Ena vakatokai o koya me kai Nasareci.”