Maciu 19 - Vakavakadewa Vou kei na iVola tale eso

Na i Vakavuvuli i Jisu me Baleta na Veisere

¹ Ni sa tukuna oti o Jisu na veika oqo, sa qai biuti Kalili ka yaco yani ki na yasayasa vaka-Jutia na tai kadua ni Joritani.

² Era sa lewe vuqa sara sa muri koya, ka sa vakabulai ira mai kea o koya.

³ Era sa qai lako mai vei koya o ira na Farisi ka vakatovolei koya, ka kaya vua, “Sa tara li vua na tagane me veisere kei na watina kevaka e vuna e dua ga na ka?”

⁴ A sauma o koya ka kaya, “Dou sa sega beka ni wilika ni sa buli rau ga me dua e tagane ka dua e yalewa o koya na Dauveibuli mai na i vakatekivu,

⁵ ka kaya, ‘Ena vuku ni ka oqo sa na biuti tamana kei tinana kina na tagane ka kabita na watina, ka rau sa yaco me duabau ga na lewe rua?’

⁶ E rau sa qai sega ni lewe rua tikoga, e rau sa duabau ga. Na ka sa vauca vata na Kalou me kakua ni tawasea na tamata.”

⁷ Era sa qai kaya vua, “Na cava ga sa qai vakarota kina o Mosese me solia ga vua na i vola vakadinadina ni veisere, ka qai sereki koya?”

⁸ Sa qai kaya vei ira o koya, “Ena vuku ga ni nomudou yalo kaukauwa, sa vakatarai kemudou kina o Mosese mo dou veisere kei na watimudou, ia sa sega tu ni vakakina mai na i vakatekivu.

⁹ Ia, au sa kaya vei kemudou, o koya sa veisere kei na watina, kevaka e sega ni vuna na dautagane, ka la'ki veiwatini kei na dua tale, sa dauyalewa.”

¹⁰ E ratou sa qai kaya vua na nona tisaipeli, “Kevaka sa vakaoqo na ka e yaco vua na tagane kei na watina, e vinaka cake me sa kakua ga na vakawati.”

¹¹ Sa qai kaya vei iratou o koya, “E sega ni ra na vinakata na tamata kece na vosa oqo, ia o ira ga sa soli vei ira.

¹² Ni ra sa tu ga eso sa sega ni vakawati ni ra a sucu vakakina mai na kete i tinadra, eso sa sega ni vakawati ni ra tarovi ira vakakina na tamata, ka so sa sega ni vakawati ni ra sa lewa vakakina ena vuku ni matanitu vakalomalagi. O koya sa rawata me muria oqori, me muria ga.”

Sa Vakalougatataki Ira na Gone Lalai o Jisu

¹³ Era sa qai kau mai vua na gone lalai me tabaki ira o koya ena ligana, ka masulaki ira. Era sa qai vosataki ira na tamata na tisaipeli.

¹⁴ Ia, sa qai kaya o Jisu, “Dou laivi ira na gone lalai me ra lako mai vei au ka kakua ni tarovi ira, baleta ni sa nodra o ira era sa vakaoqo na matanitu vakalomalagi.”

¹⁵ Sa qai tabaki ira ena ligana, ka sa qai lako sara yani.

Na Cauravou Vutuniyau

¹⁶ Sa qai lako mai vei koya e dua ka kaya, “Vakavuvuli, na cava mada na ka vinaka me'u cakava me noqu kina na bula tawamudu?”

¹⁷ Sa qai kaya vua o koya, “A cava o tarogi au kina me baleta na ka vinaka? Sa dua ga o koya e vinaka. Ia, kevaka o via curu ki na bula, muria ga na i vakaro.”

¹⁸ Sa qai kaya vua na cauravou, “A cava soti?” Sa qai kaya o Jisu: “Mo kakua ni laba, mo kakua ni dauveibutakoci, mo kakua ni butako, mo kakua ni veibeitaki vakailasu,

¹⁹ dokai rau na tamamu kei na tinamu, mo lomana na kai nomu me vakataki iko.”

²⁰ Sa qai kaya vua na cauravou, “Au sa dau muria mai na veivakaro kecega oqo. Na cava tale e sa vo tiko vei au?”

²¹ Sa qai kaya vua o Jisu, “Kevaka o vinakata me sa vinaka sara, mo lako, ka volitaka na nomu i yau ka solia vei ira na dravudravua, o na qai vakaiyau mai lomalagi, lako mai ka muri au.”

²² Ia, ni sa rogoca na vosa oqo na cauravou, sa lako yani ena yalo rarawa; ni sa ka levu sara na nona i yau.

²³ Sa qai kaya vei ira na nona tisaipeli o Jisu, “Au sa kaya vakaidina vei kemudou ena dredre vua na tamata vutuniyau me curu ki na matanitu vakalomalagi.

²⁴ Au sa kaya vei kemudou, e rawarawa cake vua na kameli me curuma na mata ni cula, mai vua na tamata vutuniyau me curu ki na matanitu ni Kalou.”

²⁵ Ia, ni ratou sa rogoca na tisaipeli, e ratou sa kurabui sara, ka kaya, “O cei ga ena qai vakabulai rawa?”

²⁶ Sa qai rai yani vei iratou o Jisu, ka kaya vei iratou, “Sa dredre sara vei ira na tamata, ia sa rawarawa vua na Kalou na veika kecega.”

Na i Sau ni Muri Jisu

²⁷ Sa qai sauma o Pita ka kaya vua, “Ni raica mada, keitou sa biuta na ka kecega ka muri kemuni; na cava keitou na rawata kina?”

²⁸ Sa qai kaya vei iratou o Jisu, “Au sa kaya vakaidina vei kemudou, ni sa dabe tiko na Luve ni Tamata ena nona i tikotiko lagilagi, ena vuravura vou, dou na qai tiko talega oi kemudou ka muri au voli ena i tikotiko vakaturaga e tinikarua, ka lewai ira na mataqali e tinikarua ni Isireli.

²⁹ O koya ga sa biuta na nona veivale, kei iratou na tacina kei na tuakana kei na ganena, se na tamana se tinana, se o iratou na luvena, se tiki ni qele, ena vuku ni yacaqu ena yayadrau sara tale na ka e taura kina, ka na taukena talega na bula tawamudu.

³⁰ Ia, e lewe vuqa vei ira sa liu era na muri, ka lewe vuqa vei ira sa muri era na liu.