Maciu 18 - Vakavakadewa Vou kei na iVola tale eso

O Cei e ka Levu Duadua

¹ Ena gauna tikoga o ya e ratou sa lako mai kina na tisaipeli kivei Jisu ka tarogi koya, “O cei e ka levu duadua ena matanitu vakalomalagi?”

² Sa qai kaciva mai e dua na gone lailai o Jisu ka vakaturi koya ena kedratou maliwa,

³ ka kaya, “Au sa kaya vakaidina vei kemudou, kevaka dou sega ni veisau, ka yaco me vaka e dua na gone lailai, dou na sega sara ni curu ki na matanitu vakalomalagi.

⁴ O koya sa levu duadua ena matanitu vakalomalagi sai koya na tamata sa yalomalumalumu ka sa vakataka e dua na gone lailai vakaoqo.

⁵ O koya vakayadua sa kidavaka e dua na gone lailai vakaoqo ena yacaqu, sa kidavaki au vakakina.

Na Veitemaki ki na i Valavala Ca

⁶ “Kevaka e dua sa vakavuna me cala e dua vei ira na lalai oqo, e vinaka cake vua me vesu ki domona e dua na i qaqi vatu levu ka vakadromuci ena wasawasa titobu.

⁷ Sa ca vakalevu o vuravura ena veika e vakavuna na malumalumu ni nodra vakabauta na tamata! A veika oqo sa yaco tikoga, ia ena ca vakalevu o koya sa vakavuna!

⁸ “Kevaka sa vakacalai iko na ligamu se na yavamu, muduka tani ka viritaka laivi! Ena vinaka cake vei iko mo curu ki na bula ka yava dua se liga dua tu ga, ka ca ni tiko ruarua na ligamu kei na yavamu ka qai biu ki na bukawaqa tawamudu.

⁹ Kevaka e vakacalai iko tiko na matamu, leuta tani, ka biuta laivi mai vei iko: e vinaka cake vei iko mo curu ki na bula ka mata dua ga, mai na nomu biu mata rua ki na buka mai eli.

Na Vosa Vakatautauvata ni Sipi ka a Yali

¹⁰ “Dou qarauna mo dou kakua ni beca e dua vei ira na lalai oqo; ni'u sa kaya vei kemudou, ni ra sa dau raica tikoga na mata i Tamaqu mai lomalagi o ira na nodra agilosi.

¹¹ Ni sa lako mai na Luve ni Tamata me vakabulai koya sa yali.

¹² “A cava dou sa nanuma? Kevaka e dua na tamata sa dua na drau na nona sipi, ka sa mani yali e dua vei ira, ena sega li ni biuti ira tu mai na ciwasagavulu kaciwa ena veidelana ka la'ki vakasaqarai koya sa yali?

¹³ Kevaka sa kunea, au sa kaya vei kemudou, ena rekitaka vakalevu cake sara o koya na kunei ni dua na sipi oqo mai na ciwasagavulu kaciwa ka ra sega ni yali.

¹⁴ Sa vaka talega kina oqo na Tamamudou mai lomalagi, ni sa sega ni vinakata me yali e dua vei ira na lalai oqo.

O Koya na Wekamu sa Caka Cala

¹⁵ “Kevaka sai valavala ca vei iko na wekamu, mo lako vua ka vakaraitaka vua na nona cala ena gauna o drau tiko taurua ga kina. Kevaka ena rogoci iko, o sa rawai koya lesu tale na wekamu.

¹⁶ Ia kevaka e bese ni rogoci iko, kauta yani e dua se rua tale me rawa ni vakadinadinataki na ka kecega ena vosa ni lewe rua se lewe tolu na i vakadinadina.

¹⁷ Ia, kevaka e bese ni rogoci iratou, tukuna ki na i soqosoqo ni lotu; ia kevaka e bese talega ni rogoci ira na i soqosoqo ni lotu, mo sa okata me vaka e dua na kai tani se dau kumuni i vakacavacava.

Na ka sa Vauci sa Vakadonui e Vuravura

¹⁸ “Au sa kaya vakaidina vei kemudou, ni ka kecega dou vauca e vuravura ena vauci talega mai lomalagi, kei na ka kecega dou sereka e vuravura ena sereki talega mai lomalagi.

¹⁹ “Au sa kaya talega vakaidina vei kemudou, kevaka e lewe rua vei kemudou e rau sa lomavata e vuravura me rau kerea e dua na ka, ena vakayacora vei rau o Tamaqu mai lomalagi.

²⁰ Ni tikina ga e soqoni kina e lewe rua se ratou lewe tolu ena yacaqu, au sa tiko ena kedratou maliwa.”

Na Vosa Vakatautauvata ni Tamata ka Sega ni Veivosoti

²¹ Sa qai lako mai vua o Pita ka kaya, “Turaga me i valavala ca vakavica vei au na wekaqu ka me'u vosoti koya tiko mada ga? Me vakavitu?”

²² Sa kaya vua o Jisu, “Au sega ni kaya vei iko me vakavitu walega, me vakavitusagavulu na vitu, oqo e kena i balebale me kakua ni vakaiyalayala.

²³ O koya oqo, sa vakatautauvatani kina na matanitu vakalomalagi kei na dua na tui ka sa via taroga nodra dinau na nona tamata.

²⁴ Ni sa tekivu vakatataro, sa qai kau mai vua e dua sa dinautaka tu vua e sivia e milioni na dola.

²⁵ Ia ni sa sega vua na ka me sauma kina, sa qai vakarota na nona turaga me volitaki o koya, kei na watina, kei iratou na luvena, kei na ka kecega e tu vua, me saumi kina.

²⁶ Sa qai cuva sobu na tamata ka vakamasuti koya, ka kaya, ‘Mo ni vosoti au mada ga, au na sauma kece vei kemuni.’

²⁷ Sa qai tuburi koya na loloma na nona turaga na tamata o ya ka mani sereki koya, ka laiva me sa kakua ga ni sauma.

²⁸ “Ia, sa qai lako ga ki tautuba na tamata o ya ka raica e dua na nona i tokani dauveiqaravi ka dinautaka tu vei koya e vica walega na dola. Sa qai tauri koya ka kidomoka, ka kaya, ‘Sauma mai na nomu dinau.’

²⁹ Sa qai cuva sobu na nona i tokani ki yavana, ka vakamasuti koya, ka kaya, ‘Mo ni vosoti au mada ga, au na sauma vei kemuni.’

³⁰ Ia sa bese ga o koya, ka lako ga yani ka biuti koya ki na valeniveivesu me yacova ni sa na sauma rawa na dinau.

³¹ Ni ra sa raica o ira na nona i tokani na ka sa caka, era sa rarawa dina vakalevu, ka la'ki tukuna sara vua na nodra turaga na ka kecega sa yaco.

³² Sa qai kacivi koya mai na nona turaga ka kaya vua, ‘Tamata i vakarau ca, au a sereki iko mai na dinau levu o ya, ni o a vakamasuti au;

³³ e sega li ni sa dodonu kina vei iko mo yaloveivosoti vua na nomu i tokani me vaka na noqu a yaloveivosoti vei iko?’

³⁴ Sa cudru sara na nona turaga ka soli koya yani vei ira ki na valeniveivesu me totogitaki kina me yacova ni sa na sauma rawa na dinau kece.”

³⁵ A tinia o Jisu ka kaya, “Ena cakava talega vakakina vei kemudou o Tamaqu mai lomalagi ka vakavo ga kevaka dou sa vosoti ira na wekamudou mai na vu ni yalomudou.”