Maciu 15 - Vakavakadewa Vou kei na iVola tale eso

Na Nodra i Vakavuvuli na Qase

¹ Era sa qai lako mai vei Jisu na Farisi kei ira na daunilawa mai Jerusalemi, ka kaya,

² “Na cava e ratou sega kina ni muria na nomu tisaipeli na nodra i vakavuvuli na neimami qase? Ni ratou sa sega ni dau vuluvulu mada ni bera ni ratou kana!”

³ Sa qai sauma o Jisu ka kaya, “Na cava talega na vuna dou sa sega kina ni muria na i vakaro ni Kalou ka muria ga na nomudou i vakavuvuli ga vakai kemudou?

⁴ Ni sa vakarota vakaoqo na Kalou, ‘Mo dokai rau na tamamu kei na tinamu,’ kei ‘O koya e vosa vakacacataki tamana se tinana e dodonu me vakamatei.’

⁵ Ia dou sa vakatavulica ni kevaka sa kaya e dua na tamata vei tamana se tinana, ‘Na ka e noqu, ka a nanumi mo taura me yaga vei iko, e sa soli tu vua na Kalou,’

⁶ ia me qai kakua ni dokai tamana kina na tamata o ya. Ena veika oqo, dou sa vakatanitaka kina na lewa ni Kalou, me rawa ga kina ni dou muria na nomudou i vakavuvuli.

⁷ Dou tamata dauveivakaisini! Sa donu vinaka sara ga na parofisai nei Aisea me baleti kemudou, ni sa kaya,

⁸ ‘Era vakarokorokotaki au na tamata oqo ena tebenigusudra, Ia sa yawa sara mai vei au na lomadra.

⁹ Sa ka wale na nodra sokalou vei au, Ni ra sa vakatavuvulitaka na vakasama vakatamata me i vakavuvuli vakalou.’ ”

Na Veika e Vakadukadukalitaka na Tamata

¹⁰ Sa qai kacivi ira yani na tamata ki vua, ka kaya vei ira, “Dou rogoca mada, ka kila sara,

¹¹ e sega ni ka e curu ki na gusu e dau vakadukadukalitaka na tamata, ia, na ka ga e lako mai na gusu, oqori e vakadukadukalitaka na tamata.”

¹² E ratou sa qai lako mai na tisaipeli ka kaya vua, “O ni sa kila li ni ra sa loma ca na Farisi ena nodra rogoca na nomuni vosa?”

¹³ Sa qai sauma o koya ka kaya, “Ena cavu laivi na kau kecega e sega ni tea o Tamaqu vakalomalagi.

¹⁴ Dou laivi ira ga. Era sa dauveituberi mataboko. Kevaka e tubera na mataboko e dua na mataboko, e rau sa sikalutu ruarua.”

¹⁵ Sa qai sauma o Pita ka kaya vua, “Mo ni vakamacalataka mada na vosa vakatautauvata vei keitou.”

¹⁶ Sa qai kaya vei iratou o koya, “Oi kemudou talega, dou sa sega tikoga ni kila rawa, ne?

¹⁷ Dou sega tiko li ni kila ni ka ga e curu yani ki na gusu e lutu ki na kete ka curu tani yani?

¹⁸ Ia na ka e curu tani mai na gusu e lako sara mai loma ni tamata, ka sai ira na veika ga oqo e vakadukadukalitaka na tamata.

¹⁹ Ni sa dau lako mai na loma ni tamata na vakanananu ca ka ia kina na daulaba, na dauyalewa, na dauveibutakoci, na daubutako, na veibeitaki vakailasu, kei na dauvakaucacataki ira na tamata eso.

²⁰ Sa i ira na veika ga oqo e vakadukadukalitaka na tamata; ia e sega ga ni vakadukadukalitaka na tamata na nona kana ka sega mada ni vuluvulu.”

Na Nona Vakabauta e Dua na Yalewa

²¹ Sa qai biuta na vanua o ya o Jisu ka lako yani ki na yasayasa vaka Taia kei Saitoni.

²² E dua na yalewa ni Kenani ka cavutu mai na yasayasa o ya e mai tagi vua ka kaya, “Ni yalololoma mai na Turaga, na Luve i Tevita. E curumi tevoro vakaukauwa sara tikoga na luvequ yalewa.”

²³ Ia e sega sara ni dua na vosa e sauma kina o koya ki vua. E ratou sa qai lako mai vua na tisaipeli ka mai kerekere tikoga vua, ka kaya, “Ni vakatalai koya tani, ni sa mai tagi muri keda tikoga.”

²⁴ Ia, sa qai vosa vua ka kaya, “Au sa sega ni talai mai kivei ira na tani, vei ira ga na sipi yali ni mataqali i Isireli.”

²⁵ Ia, sa lako ga mai na yalewa ka cuva vakarokoroko e matana, ka kaya, “Turaga, ni vukei au mada.”

²⁶ Sa qai sauma o koya, ka kaya, “E sega ni vinaka me kau na kedra madrai na gone ka biu yani vei ira na koli.”

²⁷ A sa qai kaya ga na yalewa, “Io, Turaga, o ira talega na koli era dau kania na meme ni kakana sa lutu mai na teveli ni nodra turaga.”

²⁸ A qai sauma o Jisu ka kaya, “Yalewa, sa levu dina na nomu vakabauta. Me yaco sara vei iko me vaka na ka o vinakata.” Sa bula sara na luvena yalewa ena tiki ni gauna ga o ya.

Sa Vakabulai Ira e Lewe Vuqa o Jisu

²⁹ Sa qai lako tani mai kea o Jisu, ka lako yani ena baravi ni wasawasa o Kalili, ka qai cabe ki na vanua veidelana, ka tiko sobu kina.

³⁰ Era sa qai lako mai vua e lewe vuqa sara ka ra kauti ira mai na lokiloki, na gera, na mataboko, na galu, kei ira na lewe vuqa tale, ka ra mai vakotori ira ena yava i Jisu, ka mani vakabulai ira o koya.

³¹ Era sa qoroqoro kina na lewe vuqa, ni ra raica ni ra sa vosa na galu, era sa bula na gera, ka ra sa lako na lokiloki, ka ra sa rai rawa na mataboko, ka ra vakacaucautaka na Kalou ni Isireli.

Sa Vakani Ira na Lewe Va na Udolu o Jisu

³² Sa qai kacivi iratou mai na nona tisaipeli o Jisu, ka kaya, “Au sa lomani ira dina na lewe vuqa, ni sa siga tolu mai oqo na nodra tiko vata voli kei au, ka sa sega na ka me ra kania, ia au sega ni via vakasukai ira yani ka ra sega mada ni kana, de ra la'ki malumalumu e gaunisala.”

³³ E ratou sa qai kaya vua na tisaipeli, “Edatou na rawata li mai vei na kakana ena vanua lala oqo, me rauti ira na lewe vuqa oqo?”

³⁴ Sa qai kaya vei iratou o Jisu, “E vica na i buli madrai e tiko vei kemudou?” E ratou sa qai kaya, “E vitu ka vica ga na ika lalai.”

³⁵ Sa qai vakaroti ira na lewe vuqa me ra tiko sobu ena qele.

³⁶ Sa qai taura na i buli madrai e vitu kei na ika, ia ni sa vakavinavinaka oti, sa qai dovidovia ka solia yani vei iratou na nona tisaipeli, me ra wasea o iratou na tisaipeli kivei ira na lewe vuqa.

³⁷ Era sa qai kana kecega ka mamau, ka ra tomika vata na i vovo ni ka sa dovi, ka mani sinai kina e vitu na basikete.

³⁸ O ira era sa kana oqo era lewe 4,000 na tagane, ka sega ni wili kina o ira na yalewa kei ira na gone.

³⁹ Sa qai vakasukai ira yani na lewe vuqa o Jisu ka sa vodo ki waqa, ka lako yani ki na yasayasa vaka-Makitala.