Maciu 12 - Vakavakadewa Vou kei na iVola tale eso

Na Taro me Baleta na Siga ni Vakacecegu

¹ Ena gauna o ya sa qai lako o Jisu ena loma ni veiloga ni sila ena dua na Siga ni Vakacecegu. E ratou sa viakana na tisaipeli, ka vakatekivu doloka na veisola ni sila, ka kania.

² Ni ra sa raica o ira na Farisi era sa qai kaya vua, “Raica, e ratou cakava tiko na nomu tisaipeli na ka e sega ni tara me caka ena Siga ni Vakacecegu.”

³ Ia sa qai kaya vei ira o koya, “Dou sa sega beka ni wilika na ka sa cakava o Tevita ni sa viakana o koya kei iratou ka tiko vata kaya?

⁴ E a curu ki na vale ni Kalou ka kania na veibuli madrai tabu, na ka e sega ni vakatarai vei koya me kania, se vei ira ka tiko vata kaya, ia vei ira duadua ga na bete?

⁵ Se dou sa sega beka ni wilika ena Lawa i Mosese na nodra dau vakacacana o ira na bete ena Valenisoro ena veisiga ni vakacecegu na vakatatabu ni Siga ni Vakacecegu, ka ra sa sega ni cala kina?

⁶ Au sa kaya vei kemudou ni sa tu eke e dua sa uasivi vakalevu mai na Valenisoro.

⁷ Ia, kevaka dou sa kila na i balebale ni vosa oqo, ‘Au vinakata ga na yaloveivosoti ka sega na i soro,’ ke dou a sega beka ni vakacacani ira era sa tawa cala.

⁸ Ni sa Turaga ni Siga ni Vakacecegu na Luve ni Tamata.”

Na Tamata ka Mate e Dua na Ligana

⁹ Sa qai lako tani mai kea o Jisu ka curu ki na nodra valenilotu.

¹⁰ E tiko kina e dua na tamata ka mate tu e dua na ligana. Era sa qai tarogi koya, ka kaya, “E tara li me caka na veivakabulai ena Siga ni Vakacecegu?” Era sa taroga o ya me rawa ni ra beitaki koya kina.

¹¹ Sa qai kaya vei ira o Jisu, “O cei vei kemudou sa dua na nona sipi, ka mani lutu ki na dua na qara ena Siga ni Vakacecegu, ena sega li ni la'ki taura ka vueta mai?

¹² Sa qai wacava li na uasivi cake ni tamata mai na sipi! Sa i koya oqo e tara kina me caka na ka vinaka ena Siga ni Vakacecegu.”

¹³ Sa qai kaya vua na tamata o ya, “Dodoka mai na ligamu.” Sa qai dodoka yani, ka mani vakabulai me vaka na ligana kadua.

¹⁴ Era sa qai curu ki tautuba na Farisi ka la'ki bosei koya me ra vakamatea.

Na Tamata Digitaki ni Kalou

¹⁵ Ni sa kila o Jisu, sa lako tani sara mai kea, ka ra muri koya na lewe vuqa, ka sa vakabulai ira kecega.

¹⁶ Sa vakarota matua vei ira me ra kakua sara ni tukuni koya,

¹⁷ me vakayacori sara kina na vosa ka tukuna o Aisea na parofita, ka kaya,

¹⁸ “Raica, na noqu tamata, o koya au sa digitaka, Na noqu daulomani, sa vinakati koya dina na yaloqu. Au na solia vua na Yaloqu, ka na vunautaka na Lewa dodonu vei ira na veimatanitu tani.

¹⁹ Ena sega ni veileti se kaila, Se vosavosa e cake ena saqata ni koro.

²⁰ Ena sega ni musuka na gasau sa vakalairoro, Se bokoca na cina sa waqa lailai sara. Ena gumatua tikoga me yacova ni sa vakatauci na lewa dodonu.

²¹ Era na vakanuinui ki na yacana o ira na kai veimatanitu tani.”

O Jisu kei Pielisepupi

²² Eso na tamata era sa qai kauta mai vei Jisu e dua na tamata mataboko ka sa galu tu baleta ni curumi koya tu e dua na tevoro. A sa vakabulai koya o Jisu, ka sa vosa rawa kina ka rai rawa talega.

²³ Era sa qoroqoro na lewe vuqa, ka kaya, “Sa i koya beka oqo na Luve i Tevita?”

²⁴ Ia, ni ra sa rogoca o ira na Farisi, era sa qai kaya, “E vakasavi ira tiko na tevoro na tamata oqo ena kaukauwa duadua ga i Pielisepupi na nodra i liuliu na tevoro.”

²⁵ Ni sa kila na nodra vakasama o Jisu, sa qai kaya vei ira, “Na matanitu e veisei tu vaka i koya ena dau rusa ga, kei na koro se vale ga e veisei tu vaka i koya ena sega ni tu dei.

²⁶ Ia kevaka e vakasavi Setani o Setani, sa qai veisei vaka i koya; ena tu dei vaka e vei na nona matanitu?

²⁷ Ia, kevaka au dau vakasavi ira tani na tevoro ena kaukauwa i Pielisepupi, ia ena kaukauwa ga i cei era vakasavi ira tani kina o ira na luvemudou. Ena vuku ni ka oqo, era sa na qai nomudou turaganilewa ga kina.

²⁸ Ia kevaka ga au dau vakasavi ira tani na tevoro ena kaukauwa ni Yalo ni Kalou, sa qai yacovi kemudou dina mai na Matanitu ni Kalou.

²⁹ “Ena sega ni rawa vua e dua na tamata me curuma yani na nona vale na tamata qaqa me la'ki kovea tani mai kina na nona i yaya ka vakavo duadua ga kevaka me vesuki koya taumada na tamata qaqa o ya e liu; ena qai kovea rawa kina na nona i yaya.

³⁰ “O koya e sega ni tovata kei au sa noqu meca, kei koya e sega ni kumuna vata kei au sa veibiuyaka.

³¹ O koya oqo au sa kaya kina vei kemudou, ena bokoci rawa vei ira na tamata na i valavala ca kecega kei na vosa vakacaca kecega, ia ena sega ga ni bokoci rawa na vosa vakacacataka na Yalo Tabu.

³² O koya e vosa vakacacataka na Luve ni Tamata ena rawa ni vosoti; ia o koya e vosa vakacacataka na Yalo Tabu ena sega ni vosoti, ena gauna oqo se na gauna mai muri.

Na Kau kei na Vuana

³³ “Dou lewa ga mai, se e kau vinaka ka vinaka talega kina na vuana, se e kau ca ka ca talega kina na vuana; ni sa dau kilai na kau ena vuana.

³⁴ Dou kawa ni gata! Dou sa tukuna rawa vakacava na ka vinaka ni dou tamata ca tu? Ni sa dau tukuna na gusuda na ka ga sa sinai tu kina na lomada.

³⁵ Sa dau kauta mai na ka vinaka na tamata vinaka mai na nona lololo vinaka, ka sa dau kauta mai na tamata ca ena veika ca mai na nona lololo ca.

³⁶ “Au sa kaya vei kemudou ni ra na tarogi na tamata ena siga ni lewa ena vuku ni vosa vakatani kece era sa cavuta;

³⁷ ni o na vakadonui ena vuku ni nomu vosa, o na cudruvi talega ena vuku ni nomu vosa.”

Na Vinakati ni Dua na Caka-Mana

³⁸ Era sa qai vosa eso na Farisi ka kaya, “Na i Vakavuvuli, keimami via raica e dua na i vakatakilakila mai vei iko.”

³⁹ Sa qai sauma o koya ka kaya vei ira, “Sa dau vakasaqara e dua na i vakatakilakila na i tabatamata ca ka dauyalewa, ia, ena sega ni soli kina e dua na i vakatakilakila, na i vakatakilakila ga i Jona na parofita.

⁴⁰ Me vaka ga ni a siga tolu ka bogi tolu o Jona ena kete ni ika levu, ena siga tolu ka bogi tolu vaka talega kina na Luve ni Tamata ena loma ni qele.

⁴¹ Era na tucake ena veilewai na kai Ninive kei na i tabatamata oqo ka beitaka, ni ra a veivutuni ena vunau i Jona, ia, sa tu oqo e dua e levu cake vei Jona.

⁴² Ena tucake mai na Ranadi ni Sipa ena veilewai kei na i tabatamata oqo ka beitaka, ni a lako mai o koya mai na i yalayala sara kei vuravura me mai rogoca na vuku i Solomoni, ia, sa tu oqo e dua e levu cake vei Solomoni.

Na Lesu Tale Mai ni Yalo Velavela

⁴³ “Ni sa takali mai vua na tamata na yalo velavela, sa na veilakoyaki voli ena vanua veitalasiga, me vaqara i vakavakacegu, ia ka sega ni kunea.

⁴⁴ Sa qai kaya, ‘Au na lesu tale ki na noqu vale ka'u a lako mai kina.’ Sa qai kunea ni sa lala tu, ka samaki tu ka tuvani vinaka tu.

⁴⁵ Sa qai lako o koya ka kauta mai e vitu tale na tevoro ca cake mai vua, ka ratou curu ka tiko kina; ka mani yaco e muri me ca cake sara na tamata o ya mai na nona bula e liu. Ena yaco vaka talega kina ki na i tabatamata ca oqo.”

Na Tinai Jisu kei Iratou na Tacina

⁴⁶ Ni sa vosa tikoga o Jisu vei ira na lewe vuqa, sa tu e tautuba na tinana kei iratou na tacina, ka ratou via vosa tiko vua.

⁴⁷ Sa qai kaya vua e dua, “Raica, e ratou tu e tautuba na tinamu kei iratou na tacimu, e ratou via vosa vei iko.”

⁴⁸ A sa sauma o Jisu ka kaya, “O cei na tinaqu? O cei o iratou na taciqu?”

⁴⁹ Sa qai dusi iratou na nona tisaipeli, ka kaya, “Raica! Sa i iratou oqo na tinaqu kei ira na taciqu!

⁵⁰ O koya ga sa vakayacora na loma i Tamaqu mai lomalagi, sai koya oqo na taciqu, kei na ganequ, kei na tinaqu.”