Maciu 1 - Vakavakadewa Vou kei na iVola tale eso

Na i Vola ni Kawa i Jisu Karisito

¹ Na i vola ni kawa i Jisu Karisito, na luve i Tevita, na luve i Epara-ama.

² E tama i Aisake o Epara-ama, ka tama i Jekope o Aisake, ka tama i Juta kei iratou na tuakana kei iratou na tacina o Jekope,

³ e tama i Veresi kei Sera o Juta, ka tinadrau o Tema, ka tama i Eseroma o Veresi, ka tama i Erami o Eseroma,

⁴ ka tama i Amenatave o Erami, ka tama i Nasoni o Amenatave, ka tama i Salimoni o Nasoni,

⁵ ka tama i Poasa o Salimoni, ka tinana o Reapi, ka tama i Opeti o Poasa, ka tinana o Ruci, ka tama i Jese o Opeti,

⁶ ka tama i Tevita na tui o Jese. E tama i Solomoni o Tevita na tui, ka tinana na wati Uraia,

⁷ ka tama i Reopoama o Solomoni, ka tama i Apaijia o Reopoama, ka tama i Asa o Apaijia,

⁸ ka tama i Josefata o Asa, ka tama i Jorame o Josefata, ka tama i Usaia o Jorame,

⁹ ka tama i Jocami o Usaia, ka tama i Aasi o Jocami, ka tama i Esekaia o Aasi,

¹⁰ ka tama i Manasa o Esekaia, ka tama i Emoni o Manasa, ka tama i Josaia o Emoni,

¹¹ ka tama i Jekonaia kei iratou na tuakana kei iratou na tacina o Josaia, donuya na gauna ni nodra kau yani ki Papiloni.

¹² Ia ni ra sa kau ki Papiloni sa qai sucu o Salacieli na luve i Jekonaia, ka tama i Serupepeli o Salacieli,

¹³ ka tama i Apiuta o Serupepeli, ka tama i Elaiakimi o Apiuta, ka tama i Asori o Elaiakimi,

¹⁴ ka tama i Setoki o Asori, ka tama i Akeimi o Setoki, ka tama i Iliuta o Akeimi,

¹⁵ ka tama i Iliasa o Iliuta, ka tama i Matani o Iliasa, ka tama i Jekope o Matani,

¹⁶ ka sai Jekope na tama i Iosefo na wati Maria, ka a sucu mai vua o Jisu, o koya ka vakatokai na Mesaia.

¹⁷ O koya oqo, sa tinikava taucoko kina na i tabatamata mai vei Epara-ama kivei Tevita, ka tinikava na i tabatamata mai vei Tevita ki na gauna ni tiko vakabobula mai Papiloni, ka tinikava na i tabatamata ni oti na gauna o ya ki na sucu ni Mesaia.

Na Sucu i Jisu Karisito

¹⁸ Sa vakaoqo na sucu i Jisu Karisito. A sa musuki o Maria na tinana vei Iosefo, ia ni se bera ni rau vakawati, a sa votu na nona bukete mai vua na Yalo Tabu.

¹⁹ Ia o Iosefo, ena nona yalododonu, a sa sega ni vinakata me vakamadualaki Maria, ka sa mani lomana kina me sa tamusuka lo ga na nodrau veimusumusuki.

²⁰ Ia ni sa vakananuma tiko o koya na ka oqo, sa qai rairai vua ena tadra e dua na agilosi ni Turaga, ka kaya, “I Iosefo na luve i Tevita, kakua ni rere ni tauri Maria me watimu, ni sa mai vua na Yalo Tabu na gone sa kunekunetaka.

²¹ Ena vakasucuma o koya e dua na gonetagane, ka mo vakayacani koya o Jisu, ni sai koya ena vakabulai ira na nona tamata mai na nodra i valavala ca.”

²² A sa yaco na ka kecega oqo me vakayacori kina na vosa ni Turaga, ka a tukuna na parofita:

²³ “Raica, ena bukete e dua na goneyalewa ka na vakasucuma e dua na gonetagane, Ka na vakayacani o Imanueli,” a kena i balebale, “Na Kalou sa tiko vata kei keda.”

²⁴ Ni sa yadra mai na moce o Iosefo, sa vakayacora sara na ka sa vakarota vua na agilosi ni Turaga; ka sa tauri Maria me watina.

²⁵ Ia e rau sa sega ni veiyacovi, ka yacova ni sa vakasucuma oti o Maria na luvena tagane. A sa vakayacana na gone o Iosefo me o Jisu.