Luke 9 - Vakavakadewa Vou kei na iVola tale eso

Sa Talai Iratou na Tisaipeli e Tinikarua o Jisu

¹ Sa qai kacivi iratou vata na lewe tinikarua o Jisu, ka solia vei iratou na kaukauwa mana kei na lewa me ratou rawai ira kecega na tevoro, ka vakabula talega na veimataqali tauvimate.

² Sa qai talai iratou yani me ratou vunautaka na matanitu ni Kalou, ka veivakabulai.

³ Sa qai kaya vei iratou, “Dou kakua ni kauta e dua na ka ena nomudou i lakolako; me kua na i titoko, se na taga, se na kakana, se na i lavo, se me yarua na nomudou sote.

⁴ Na vale kecega dou sa curu kina, dou tiko ga kina, ka yacova ni dou sa cavutu tale mo dou lako.

⁵ Ia na veikoro kecega era sega ni vakacegui kemudou, dou kuretaka laivi kina na kuvu ni qele mai na yavamudou ni dou sa biuta na koro o ya, me i vakatakilakila vei ira.”

⁶ E ratou sa qai cavutu ka vakalakova na veikoro kecega ka vunautaka kina na i Tukutuku Vinaka, ka ia na veivakabulai ena veivanua kecega.

Na Veilecayaki i Eroti

⁷ Sa qai rogoca na i liuliu o Eroti na ka kecega sa yaco tiko, ka sa kidroa kina na yalona, ni ra sa tukuna eso ni sa tucake tale mai na mate o Joni,

⁸ ka so tale ni sa rairai tale mai o Ilaijia, ka so tale, ni sa tucake tale e dua vei ira na parofita e liu.

⁹ Sa qai kaya o Eroti, “Au a tamusuka na ulu i Joni, ia o cei beka au sa mai vakarogoca tiko oqo na kena i tukutuku?” A sa saga sara me raici koya.

Sa Vakani Ira na Lewe Lima na Udolu o Jisu

¹⁰ Ia ni ratou sa lesu tale yani na i apositolo, e ratou sa tukuna vei Jisu na veika e ratou a cakava. Sa qai kauti iratou o koya ka lako vakatikitiki ki na koro o Pecisaita.

¹¹ Ia ni ra sa rogoca na ka o ya na lewe vuqa, era sa qai muri koya; ka sa vakacegui ira o koya, ka vunautaka vei ira na i tukutuku ni matanitu ni Kalou, ka vakabulai ira era via vakabulai.

¹² Ia ni sa kala na siga, e ratou sa qai lako na lewe tinikarua ka kaya vua, “Ni vakatalai ira mada oqo me ra lako ki na veikoro kei na veitikotiko voleka me ra moce ka qara kina na kedra, ni da sa tiko oqo ena vanua lala.”

¹³ Sa qai kaya vei iratou o Jisu, “Dou solia eso na ka me ra kania.” E ratou sa qai kaya, “E tu walega vei keitou e lima na i buli madrai kei na rua na ika. O ni vinakata me keitou la'ki voli kakana me baleti ira kece oqo?”

¹⁴ (Sa rauta ni ra lewe 5,000 na tagane era sa tiko e kea.) Sa qai kaya vei iratou na nona tisaipeli o Jisu, “Dou raici ira na tamata me ra dabedabe yalimasagavulu.”

¹⁵ E ratou sa mani cakava vakakina na tisaipeli, ka ra sa dabe kece na tamata.

¹⁶ Sa qai taura o koya na i buli madrai e lima kei na ika e rua, ka sa qai tacake ki lomalagi, ka vakavinavinakataka ka dovia, ka solia vei ira na tisaipeli me ra tauca vei ira na lewe vuqa.

¹⁷ Era sa qai kana ka mamau kecega. Era sa kumuna vata na veika sa vo ka sa sinai kina e tinikarua na basikete.

Na Ka e Tusanaka o Pita me Baleti Jisu

¹⁸ Ena dua na gauna sa masu taudua tiko kina o Jisu, ka ratou sa qai lako yani vua na tisaipeli. Sa qai tarogi iratou o koya, ka kaya, “O cei beka era kaya tiko na tamata ni oi au?”

¹⁹ E ratou sa qai sauma ka kaya, “O Joni na Dauveipapitaisotaki; eso era kaya, ni o Ilaijia; ka so tale, ni sa tu cake tale mai e dua vei ira na parofita e liu.”

²⁰ Sa qai kaya vei iratou o koya, “Ia o cei ga dou sa kaya oi kemudou me baleti au?” Sa qai sauma o Pita, “Sa i kemuni na Mesaia ni Kalou.”

Sa Tukuna o Jisu na Nona Vakararawataki kei na Nona Mate

²¹ Ia sa vakadreta ka vakarota vei iratou o Jisu me ratou kakua ni tukuna na ka o ya vua e dua,

²² ka kaya, “Sa kena dodonu ga me na sota kaya mada na veika rarawa e vuqa na Luve ni Tamata, ka me ra na sega ni via vakabauti koya o ira na qase, kei ira na bete levu, kei ira na daunilawa ka me na vakamatei, ka qai vakaturi cake tale ena i katolu ni siga.”

²³ Sa qai kaya vei ira kecega na tamata, o koya, “Kevaka e dua sa via muri au, me kakua ni muria na lomana, ia me colata ga na nona kauveilatai ena veisiga; ka muri au.

²⁴ Ni o koya yadua e via maroroya na nona bula ena vakayalia, ia o koya yadua e vakayalia na nona bula ena vukuqu ena maroroya.

²⁵ Na cava na kena yaga vua na tamata kevaka e rawati vuravura taucoko ka vakayali koya kina vakai koya?

²⁶ Ni o koya yadua ena maduataki au kei na noqu vosa, ena maduataki koya na Luve ni Tamata ni sa lako mai ena nona lagilagi, kei na lagilagi nei Tamana kei ira na agilosi tabu.

²⁷ Ia au sa kaya vakaidina vei kemudou, era sa tucake tu oqo eso era na sega mada ni mate, me yacova ni ra sa raica na matanitu ni Kalou.”

Sa Tavuki na i Rairai kei Jisu

²⁸ Ia ni sa oti e walu beka na siga na kena a tau na veivosa o ya, sa qai kauti Pita kei Joni kei Jemesa o Jisu, ka lako cake ki na ulunivanua me masu kina.

²⁹ Ia ni sa masu tiko, sa qai tavuki na i rairai ni matana, ka sa vulavula lumilumisa na nona i sulu.

³⁰ E ratou qai kurabui ni sa veivosaki tiko kei koya e lewe rua na tamata: o Mosese kei Ilaijia.

³¹ E rau a vakaiserau tu oi rau ka ratou veivosakitaka na i lakolako ni nona vakarau biuti vuravura kina o Jisu, me vaka sa lesia oti tu na Kalou me na yaco mai Jerusalemi.

³² A sa biti Pita vakalevu kei rau na tiko kaya na via moce, ia e ratou a yadra tikoga, ka ratou a raica kina na i serau i Jisu kei rau na rua ka ratou tu vata tu.

³³ Ni rau sa takali tiko yani mai vei koya, sa qai kaya o Pita vei Jisu, “Turaga, sa daumaka dina na nodatou tiko eke, me keitou tara mada e tolu na vale vakacevaceva, e dua me nomuni, ka dua me nei Mosese, ka dua me nei Ilaijia.” (Ia sa sega tiko ni kila o koya na ka e kaya.)

³⁴ Ni sa vosa tiko ga vaka o ya, sa lako yani e dua na o ka vakarurugi iratou, ka ratou sa rere ni sa solegi iratou na o.

³⁵ Sa qai rogo mai e dua na domo mai na o ka kaya, “Oqo na noqu Gone ni Toko, dou rogoci koya.”

³⁶ Ia ni sa rogo oti na domo, sa qai laurai duadua ga o Jisu. E ratou sa qai vunia voli ga na ka e ratou a raica ka sega ni bau tukuna vua e dua ena gauna o ya.”

Sa Vakabula o Jisu na Gone Tagane Curumi Yalo Velavela

³⁷ Ena siga ka tarava, ni ratou sa lako sobu mai na ulunivanua, era a sota kei koya e dua na i lala levu.

³⁸ Ka raica, sa kaci e dua vei ira na lewe vuqa ka kaya, “Vakavuvuli! Au sa masuti kemuni, mo ni raica mada na luvequ tagane, na luvequ tagane e dua bauga!

³⁹ Sa dau curumi koya e dua na yalo ka sa dau qoqolou vakasauri kina o koya; na yalo oqo sa dau yavalati koya vakaukauwa sara me vaka na manumanusoni, ni sa dau vuso mai na gusuna; ka sa vakamavoataki koya tikoga ka dredre me lako tani mai vua!

⁴⁰ Au sa vakamasuti iratou oti na nomuni tisaipeli me ratou vakasava tani, ia e ratou sa sega ni rawata.”

⁴¹ A sa sauma o Jisu, ka kaya, “Sa dua dina na i tabatamata tawa vakabauta ka yalo vakatani oi kemuni oqo! A cava soti na dede ni gauna me'u tiko vata kina kei kemuni?” Sa qai kaya vua na tamata o ya, “Kauta mai ki ke na luvemu.”

⁴² Ni sa lako tiko vua na gone, sa qai viriviritaki koya tale ki ra na tevoro ka kureitaki koya vakaukauwa me vaka na manumanusoni. Sa qai vakarota na yalo velavela o Jisu me biuta na gone, a sa vakabulai sara na gone, ka soli koya lesu tale vei tamana.

⁴³ Era a qoroqoro kecega na tamata ena vuku ni kaukauwa levu ni Kalou. Ni ra se vaqoroqoroya kece tikoga na veika kece sa cakava o Jisu, sa qai kaya vei iratou na nona tisaipeli,

E Tukuna Tale o Jisu na Ka e Baleta na Nona Mate

⁴⁴ “Dou nanuma vakavinaka sara tiko na vosa oqo; ena soli yani na Luve ni Tamata ki na ligadra na tamata.”

⁴⁵ Ia e ratou a sega ni kila na i balebale ni vosa o ya. A sa vunitaki vei iratou, me ratou kakua ni kila, ka ratou a rere talega ni tarogi koya kina.

O Cei e Levu Duadua?

⁴⁶ Sa qai tubu na veiba ena kedratou maliwa se o cei mada e liu duadua vei iratou.

⁴⁷ Ia ni sa kila o Jisu na nanuma ni lomadratou, a sa tubera e dua na gone lailai ka vakatikori koya e yasana,

⁴⁸ ka qai kaya vei iratou, “O koya yadua sa ciqoma na gone lailai oqo ena yacaqu sa ciqomi au vakakina; kei koya yadua sa ciqomi au sa ciqomi koya talega sa talai au mai; ni o koya e lailai duadua vei kemudou kece sai koya sa uasivi duadua.”

O Koya e Sega ni Veimecaki kei Kemudou sa To Vata kei Kemudou

⁴⁹ Sa qai kaya o Joni, “Turaga, keitou a raica e dua na tamata ni vakasavi ira tani na tevoro ena yacamuni, ka keitou a via tarovi koya, ni sega ni dua vei kedatou o koya.”

⁵⁰ Ia sa qai kaya o Jisu, “Kakua ni tarovi koya, ni o koya ga e sega ni veimecaki kei kemudou sa to vata kei kemudou.”

E Sega ni Kidavaki Jisu e Dua na Koro vaka-Samaria

⁵¹ Ia ni sa voleka mai na gauna me kau cake kina o Jisu, sa vagolea matua na matana me lako ki Jerusalemi,

⁵² ka talai iratou na nona i talai me ratou liu vua. E ratou sa lako ka curuma e dua na nodra koro na kai Samaria me ratou vakarautaki koya kina.

⁵³ Ia era a sega ni ciqomi koya na lewe ni koro o ya, baleta ni sa matata vinaka vei ira ni sa lako tiko o koya ki Jerusalemi.

⁵⁴ Ia ni rau sa raica oqo na nona tisaipeli o Jemesa kei Joni, e rau sa qai kaya, “Turaga, o ni vinakata me keirau kaciva na bukawaqa me lako sobu mai lomalagi me vakamai ira?”

⁵⁵ Sa qai vuki ga ka vunauci rau, [ka kaya “Drau sa sega ni kila na yalo sa tiko vei kemudrau:

⁵⁶ ni sa sega ni lako mai na Luve ni Tamata me vakamatei ira na tamata, ia me vakabulai ira ga.”] E ratou sa mani lako sara ki na dua tale na koro.

O Ira Era Via Muri Jisu

⁵⁷ Ni ratou sa lako tiko e sala, sa qai kaya e dua vei Jisu, “Au na muri kemuni ki na veivanua kecega o ni lako kina.”

⁵⁸ Sa qai kaya vua o Jisu, “Era vaqara na fokisi, ka ra vakasova na manumanu vuka, ia na Luve ni Tamata e sega na nona tikina me vakadavora kina na uluna.”

⁵⁹ Sa qai kaya o Jisu vua e dua tale, “Muri au.” Ia sa qai kaya o koya, “Turaga, me'u lako mada, ka buluti tamaqu rawa.”

⁶⁰ Ia sa qai kaya vua o Jisu, “Laivi ira na mate me ra buluta na nodra mate; ia o iko mo lako ga ka vunautaka na matanitu ni Kalou.”

⁶¹ Sa qai kaya e dua tale, “Au na muri kemuni Turaga, ia me'u la'ki veitataunaki mada kei iratou mai neitou.”

⁶² Sa qai kaya vua o Jisu, “E sega ni dua sa taura na i siviyara ka qai rai tale tiko ki muri me veiganiti kei na matanitu ni Kalou.”