Luke 7 - Vakavakadewa Vou kei na iVola tale eso

Sa Vakabula o Jisu na Nona Tamata na Turaganivalu ni Roma

¹ Ia ni sa tinia o Jisu na nona vosa vei ira na lewe vuqa, sa qai curu ki Kapenaumi.

² E tiko kina e dua na turaganivalu ka tauvimate tu e dua na nona bobula, ka dau lomana vakalevu, ka sa voleka koto ni ciba.

³ Ni sa rogoca na i tukutuku kei Jisu, sa qai tala vua eso na nodra qase na Jiu me ra kerei koya me lako mai ka vakabula na nona tamata.

⁴ Ia ni ra sa yaco vei Jisu, era sa vakamasuti koya vagumatua, ka kaya, “Na tamata oqo sa ganiti koya vakaidina na nomuni veivuke.

⁵ Sa dau lomani ira na noda tamata o koya, ka sa tara oti talega e dua na neimami valenilotu.”

⁶ Sa qai lako vata kei ira o Jisu. Ni ratou sa voleka yani ki na vale o ya, a sa tala mai eso na nona i tokani na turaganivalu me ra kaya vua, “Turaga, ni kakua ni vakaocai kemuni, ni sa sega ni ganiti kemuni mo ni curu mai ki na noqu vale,

⁷ ka sa sega talega ni ganita na i tuvaki ni noqu bula druka me'u lako yani vei kemuni. Ia ni cavuta ga na vosa, ena vakabulai kina na noqu tamata.

⁸ Ka ni oi au talega au tu ena ruku ni nodra lewa era liu, ka ra vakarorogo tu vei au na sotia eso. Au kaya vua e dua, ‘Mo lako!’ ka sa lako sara; ki vua tale e dua, ‘Lako mai!’ ka sa lako mai; ki vua na noqu bobula, ‘Kitaka oqo!’ ka sa kitaka.”

⁹ Ni sa rogoca na veika oqo o Jisu, a sa kurabuitaka, ka sa qai vuki vei ira na lewe vuqa era muri koya tiko, ka kaya, “Au sa tukuna vei kemuni, au se sega mada ni bau raica e dua na vakabauta levu vakaoqo, e sega sara tale mada ga e Isireli!”

¹⁰ Ia ni ra sa lesu tale ki vale o ira era a talai, era sa kunea ni sa bula vinaka tale na bobula koya.

Sa Vakabula Tale o Jisu e Dua na Luve ni Yada

¹¹ Ni oti o ya, sa qai lako yani o Jisu ki na dua na koro ka yacana o Neini. Era a salavata kei koya o iratou na nona tisaipeli kei ira e lewe vuqa sara na tamata.

¹² Ena gauna e yaco yani kina ki na matamata ni koro, raica, sa dua na i lakolako ni veibulu sa gole yani ki na i bili ni koro. Na tamata ka sa mate oqo e sega ni dua na tuakana se tacina, ka sa yada tu ena gauna o ya o tinana. Era lewe vuqa na lewe ni koro era sa lako vata tiko yani kei na vada.

¹³ Ia ni sa raici koya na Turaga, a sa lomana vakalevu, ka kaya vua, “Kakua ni tagi.”

¹⁴ A sa qai lako yani o koya ka tara na kisinimate, ka ratou mani tu vakadua o iratou ka colata tiko. Sa qai kaya o Jisu, “I cauravou! Au sa tukuna vei iko oqo, mo duri mai!”

¹⁵ Sa qai duri cake na tamata ka sa mate, ka vakatekivu me vosa, ka sa soli koya lesu vei tinana o Jisu.

¹⁶ A sa tuburi ira kecega na rere ka ra vakalagilagia na Kalou ka kaya, “Sa tubu cake oqo ena keda maliwa e dua na parofita levu, ka sa mai sikovi ira na nona tamata na Kalou!”

¹⁷ A sa robota na vanua taucoko o Jutia kei na veiyasana kecega e vakavolivolita na kena i rogorogo.

O Ira ka Talai mai vei Joni na Dauveipapitaisotaki

¹⁸ Era sa qai vakatakila vei Joni na ka kecega oqo o ira na nona tisaipeli.

¹⁹ Sa qai kacivi rau e lewe rua na nona tisaipeli o Joni ka talai rau vei Jisu me rau la'ki kaya, “Sa i kemuni beka o koya me lako mai, se me keitou waraka e dua tale?”

²⁰ Ni rau sa yaco vua, e rau sa kaya, “E talai keirau mai o Joni na Dauveipapitaisotaki, ka kaya, ‘Sa i kemuni beka o koya me na lako mai, se me keitou waraka e dua tani tale?’ ”

²¹ Ena gauna o ya, sa vakabulai ira kina o koya e lewe vuqa mai na kedra mate eso, kei na rarawa, kei na yalo velavela eso, ka dolava na matadra e lewe vuqa na mataboko me ra rai rawa kina.

²² Sa qai sauma o Jisu ka kaya vei rau, “Drau lako ka tukuna vei Joni na ka drau sa raica ka rogoca: era sa rai na mataboko, era sa lako na lokiloki, era sa vakabulai na vukavuka, ka ra sa rogo na didivara; era sa vakaturi cake tale na mate, ka sa vunautaki na i Tukutuku Vinaka vei ira na dravudravua.

²³ Era sa kalougata o ira sa dei tu ga na nodra vakabauta!”

²⁴ Ni rau sa lako tale oi rau ka a tala mai o Joni, sa qai tekivu vosa vei ira na lewe vuqa o Jisu me baleti Joni, ka kaya, “Na cava beka o ni a lakova ki na loma ni vanua lala mo ni raica? Na gasau sa yavalati ena cagi?

²⁵ Ia na cava beka ga o ni a la'ki raica? Na tamata vakaisulu ena i sulu malumu? Raica, o ira era dau vakaisulu ena i sulu sau levu ka ra tiko vinaka ena veika ni bula oqo era dau tiko ga ena veivale vakatui.

²⁶ Ia na cava beka ga o ni a la'ki raica? E dua li na parofita? Io, au sa kaya vei kemudou, e dua ka sa levu cake mai na parofita.

²⁷ Sa i koya ga sa volai tu vakaoqo ena vukuna: ‘Raica, au sa tala na noqu dautukutuku me liu vei iko, ena caramaka o koya na nomu sala e matamu.’

²⁸ Au sa kaya vei kemuni, vei ira kece era a sucu mai na yalewa e sega ni dua me uasivi cake mai vei Joni; ia o koya e lailai duadua ena matanitu ni Kalou e uasivi cake vua.”

²⁹ Ni ra sa rogoca oqo o ira na tamata kece kei ira na daukumuni i vakacavacava, era sa qai kaya ni sa dodonu ga na Kalou, ni sa papitaisotaki ira oti kina o Joni.

³⁰ Ia o ira na Farisi kei ira talega na daunilawa era cata na i naki ni Kalou me baleti ira, ka ra mani sega ni papitaisotaki kina mai vua.

³¹ Sa qai kaya o Jisu, “Na cava beka me'u vakatautauvatataki ira kina na tamata ena i tabatamata oqo; era tautauvata beka kei na cava?

³² Era sa vakataki ira na gone era tiko voli ena makete ka ra veikaciyaki ka kaya, ‘Keitou a uvu i vakatagi vei kemudou, ia dou a sega ni meke. Keitou a qoqolou ena rarawa, ia dou a sega ni tagi.’

³³ Ni sa lako oti mai o Joni na Dauveipapitaisotaki ka sega ni kana madrai se gunu waini, o ni qai kaya, ‘E tiko vua e dua na tevoro.’

³⁴ Sa lako oti mai na Luve ni Tamata ka dau kana ka gunu, ia o ni a kaya, ‘Raica na tamata dau kana ka dau gunu waini ka nodra i tokani na dau kumuni i vakacavacava kei ira na tamata i valavala ca!’

³⁵ Ia na vuku ni Kalou sa laurai na kena dina vei ira kece era sa ciqoma.”

O Jisu ena Vale i Saimoni na Farisi

³⁶ Sa qai sureti Jisu e dua vei ira na Farisi me rau la'ki kana vata. Sa mani lako ki na vale ni Farisi koya, ka tiko sobu me kana.

³⁷ Ia e tiko ena koro o ya e dua na yalewa i valavala ca; ni sa kila o koya ni sa kana tiko o Jisu ena vale ni Farisi, sa qai kauta kina e dua na tavaya waiwai,

³⁸ ka la'ki tucake tu e dakuna vaka ki yavana, ka sa tagi tiko. Sa qai tekivu me vakasuasuataka na yava i Jisu ena wai ni matana, ka quwa ena drauniuluna; sa qai reguregulaka na yavana, ka lumuta ena waiwai.

³⁹ Ia ni sa raica na Farisi ka a sureti Jisu sa kaya e lomana, “Ke parofita na tamata oqo, ke kila se o cei, ka yalewa vakacava talega o koya ka tarai koya tiko oqo; ni sa yalewa i valavala ca o koya.”

⁴⁰ Sa qai vosa o Jisu, ka kaya vua, “Saimoni, e dua na ka au via kaya vei iko.” Sa qai kaya o koya, “Vakavuvuli, mo tukuna ga mai.”

⁴¹ “E dua na tamata e rau dinau tu vua e lewe rua; e dua e dinautaka tu e lima na drau na tiki ni siliva, ka dua vei rau e limasagavulu.

⁴² Ni rau sa sega ni sauma rawa, sa qai bokoca wale vei rau ruarua o koya. O cei mada vei rau ena lomani koya vakalevu cake?”

⁴³ Sa qai sauma o Saimoni, “Au nanuma ni sai koya ga e levu cake na ka e bokoci vua.” Sa qai kaya vua o koya, “O sa vakataulewa vakadodonu.”

⁴⁴ Sa qai vuki vua na yalewa, ka mani kaya vei Saimoni, “O sa raica na yalewa oqo ne? Au a curu mai ki na nomu vale, ka sega na wai o solia me vui kina na yavaqu, ia sa vakasuasuataka na yavaqu o koya ena wai ni matana ka quwaraka ena drauniuluna.

⁴⁵ O a sega ni bau reguci au, ia mai na noqu yaco mai ki ke, a sa sega ni mudu na nona reguca tiko na yavaqu.

⁴⁶ O a sega ni bau lumuta na uluqu ena waiwai olive, ia sa lumuta o koya na yavaqu ena i lumu sau levu.

⁴⁷ O koya oqo au sa kaya kina vei iko, na loloma levu sa vakaraitaka oqo o koya sai vakadinadina ni sa vosoti na nona i valavala ca e vuqa. Ia o koya yadua sa vosoti ga vakalailai sa loloma talega vakalailai.”

⁴⁸ Sa qai kaya o koya vua na yalewa, “Sa bokoci na nomu i valavala ca.”

⁴⁹ Ia o ira era kana vata kaya tiko era veikayaka vakai ira, “O cei beka oqo me bokoca rawa talega na i valavala ca?”

⁵⁰ Sa qai kaya o Jisu vua na yalewa, “Sa vakabulai iko na nomu vakabauta; mo lako ga ena vakacegu.”