Luke 23 - Vakavakadewa Vou kei na iVola tale eso

O Jisu ena Mata i Pailato

¹ Era sa qai tucake kece sara ka kauti Jisu kivei Pailato.

² Sa tekivu me ra beitaki koya, ka kaya, “Keimami sa kunea na tamata oqo ni sa vagolei ira vakatani na noda tamata, ka sa tarova me keimami soli i vakacavacava vei Sisa, ka sa kaya voli ni sai koya na Mesaia, e dua na tui.”

³ Sa qai tarogi koya o Pailato, “Sa i iko li na nodra Tui na Jiu?” Sa qai sauma o Jisu, ka kaya, “Oqori na ka o sa kaya.”

⁴ Sa mani kaya o Pailato vei ira na bete levu kei ira na lewe vuqa, “Au sa sega ni raica e dua na cala vua na tamata oqo.”

⁵ Ia era sa qai cike ga vakaukauwa ka kaya, “Sa vakayavalati ira tiko na tamata e Jutia taucoko o koya ena nona i vakavuvuli, mai Kalili ka yaco sara mai ki na vanua oqo.”

Sa Kau o Jisu vei Eroti

⁶ Ni sa rogoca o ya o Pailato, sa mani taroga sara se sa kai Kalili o koya se segai.

⁷ Ia ni sa rogoca ni sa lewe ni yasana e veiliutaki kina o Eroti o Jisu, sa mani vakauti koya sara vei Eroti, ka a tiko voli e Jerusalemi ena gauna vata o ya.

⁸ Ia ni sa raici Jisu o Eroti sa marau sara, ni sa dede na gauna e via raici koya tiko kina. A sa dau rogoca voli ga o Eroti na ka e baleti koya, ka nuitaka talega me na raici koya ni cakava eso na caka mana.

⁹ E a mani vakatarogi koya kina vakabalavu, ia sa sega ga ni bau sauma e dua na ka o Jisu.

¹⁰ Era a tu voleka tu e kea na bete levu kei ira na daunilawa, ka beitaki koya vakaukauwa.

¹¹ Era sa qai vakasewasewani koya ka vakalialiai koya, o Eroti kei ira na nona sotia, ka ra vakasuluma ena dua na i sulu totoka, ka vakauti koya tale vei Pailato.

¹² A mani yaco me rau sa qai veivinakati tale o Eroti kei Pailato ena siga o ya, ka ni rau a veicati tu e liu.

Sa Tau na Lewa me Mate o Jisu

¹³ Sa qai soqoni ira vata na bete levu o Pailato, kei ira na i liuliu kei ira na tamata,

¹⁴ ka kaya vei ira, “O ni kauta mai vei au na tamata oqo me vaka e dua e vagolei ira vakatani na tamata, ia ni'u sa vaqaqai koya oti ena matamuni, mo ni kila, ni'u a sega ni raica ni cala na tamata oqo ena dua na ka o ni beitaki koya kina.

¹⁵ E a sega talega ni kunea vakakina e dua nona cala o Eroti, ni sa vakauti koya tale mai vei au. Sa sega sara ni dua na ka cala sa cakava o koya oqo me vakamatei kina.

¹⁶ O koya oqo ka'u na vakanakuitataka ga ka sereki koya me lako.”

¹⁷ (A sa dau sereka vei ira o Pailato e dua na kaivesu ena veigauna kece ni Solevu ni Lakosivia.)

¹⁸ Era sa qai kailavaka kece yani, “Vakamatei koya! Sereki Parapa mai vei keimami!”

¹⁹ (Sa i Parapa oqo na tamata ka a biu ki na valeniveivesu ena vuku ni dua na veisei ka a tubu ena koro levu o ya, kei na dua talega na laba.)

²⁰ Ia ni sa gadreva tiko o Pailato me sereki Jisu sa vosa tale kina vakadua vei ira o koya.

²¹ Ia era sa qai kaila ga ka kaya, “Vakota ga ki na kauveilatai! Vakota ga ki na kauveilatai!”

²² Sa qai kaya tale vei ira o Pailato ena i katolu ni gauna, “A ca cava e kitaka o koya? Au sega ni kunea vua e dua na ka sa dodonu me mate kina. O koya oqo au sa na vakanakuitataki koya ga kina ka sereka.”

²³ Ia era a cikevi koya matua ena domolevu, ka kerea me lauvako ga o Jisu ena kauveilatai. Sa mani rogoci na domodra.

²⁴ Sa qai lewa o Pailato me sa vakayacori ga na ka era kerea na tamata.

²⁵ A sa sereka o koya na tamata era a kerea; o koya ka a biu ki na valeniveivesu ena vuku ni veisei kei na laba, ia sa soli Jisu vei ira me ra cakava vua na ka e lomadra.

Sa Vakoti o Jisu ki na Kauveilatai

²⁶ Ia ni ra sa kauti Jisu tiko, era sa qai tauri Saimoni, e dua na kai Kirini, (ni a se qai lako tiko mai loma ni vanua me curu ki na koro,) ka vakataqara vua na kauveilatai, me colata ka muri Jisu.

²⁷ Era sa qai muri Jisu e lewe vuqa sara; ka maliwai ira eso na yalewa era a tagi ka osivaki koya voli.

²⁸ Sa qai vuki kivei ira o Jisu ka kaya, “Oi kemudou na yalewa ni Jerusalemi, dou kakua ni tagicaki au, ia dou tagicaki kemudou ga kei ira na luvemudou.

²⁹ Dou kila, sa voleka mai na gauna era na kaya kina na tamata, ‘Sa kalougata o ira na yalewa sa sega ni vakaluveni, kei na kete sa sega ni sucu mai kina na gone, kei na matanisucu sa sega ni qarava na gone!’

³⁰ Oqori na gauna era na tekivu kaya kina na tamata ki na veiulunivanua, ‘Baleti keimami mai!’ ka kaya talega ki na veidelana, ‘Ubi keimami mai.’

³¹ Ni kevaka era sa cakava na veika oqo ni se drokadroka tu na kau, na cava li ena qai yaco ena gauna sa madu kina?”

³² E lewe rua talega na tamata, ka rau kaivesu, e rau a la'ki vakamatei vata kei koya.

³³ Ni ra sa yaco ki na vanua sa vakatokai “Na Qavokavoka”, era sa mani vakoti koya e kea kei rau na kaivesu; e dua ena yasana i matau ka dua ena yasana i mawi.

³⁴ Sa qai kaya o Jisu, “I Tamaqu, ni vosoti ira! Era sa sega ni kila na ka era sa vakayacora tiko oqo.” Era sa qai vakawiri madigi me ra wase na nona i sulu.

³⁵ Era a tu cake tu e kea na tamata, ka vakararai tu; ia o ira na nodra i liuliu na Jiu, era a vakalialiai koya, ka ra kaya, “Sa dau vakabulai ira na tani o koya; ia me tei vakabulai koya mada kevaka sai koya dina na Mesaia ka sa digitaka na Kalou!”

³⁶ Era a vakalialiai koya talega na sotia, ka ra lako cake yani ka solia vua na wai wiwi,

³⁷ ka kaya, “Mo vakabulai iko mada kevaka sai iko dina na nodra tui na Jiu!”

³⁸ A sa volai toka e cake vua na vosa oqo, “Oqo na nodra Tui na Jiu.”

³⁹ Sa qai vosa vakacataki koya e dua vei rau na kaivesu ka ratou rube vata tu, ka kaya, “E sega li ni o iko na Mesaia? Mo vakabulai iko mada vata kei keirau!”

⁴⁰ Ia sa qai vunauci koya o koya kadua, ka kaya, “O sega beka ni rerevaka na Kalou, ni o sa lewai mo mate talega vakataki koya o iko?

⁴¹ Sa dodonu na lewa e tau vei kedaru, ni sa rauti kedaru ga na i sau ni nodaru i valavala, ia na tamata oqo sa sega ni dua na cala e vakayacora.”

⁴² Sa qai kaya vei Jisu, “Mo ni qai nanumi au mai, Jisu, ni o ni sa lako mai ena nomuni kaukauwa vakatui!”

⁴³ Sa qai kaya vua o Jisu, “Au sa yalataka oqo vei iko ni edaidai ga e daru na tiko vata kina mai Parataisi.”

Na Mate i Jisu

⁴⁴ Ni rauta toka na tinikarua na kaloko ena sigalevu tutu, a sa solega na vuravura taucoko na butobuto me la'ki yacova na tolu na kaloko ena yakavi;

⁴⁵ ni sa sega ni dua na rarama mai na matanisiga ka sa kasei rua na i latilati ni Valenisoro.

⁴⁶ Sa qai kaci ena domo levu o Jisu, ka kaya, “I Tamaqu! Au sa solia na yaloqu ki na ligamuni!” Ni sa cavuta oti ga o ya, sa qai cavuka sara na nona i cegu.

⁴⁷ E a raica na veika kece sa yaco oqo na turaganivalu, ka sa vakacaucautaka na Kalou, ka kaya, “Sa dina sara ni oqo e dua na tamata vinaka!”

⁴⁸ Vei ira kece na lewe vuqa era a soqoni yani ki kea, era sa tavia ga na lomaseredra ena rarawa ka lesu tale ki vale ni ra sarava oti na veika kece sa yaco.

⁴⁹ Era a tu cake vakayawa tu ga yani ka raica na veika o ya o ira kece na i tokani voleka i Jisu kei iratou na yalewa ka muri koya voli mai Kalili.

Na Bulu i Jisu

⁵⁰ O Iosefo e dua na lewe ni bose; e tamata vinaka ka dodonu.

⁵¹ E a sega ni lomavata o koya kei na nodra i naki kei na ka era cakava o ira na kena vo. E kai Arimacea o koya; o Arimacea e dua na koro ena yasana o Jutia. A bau waraka voli talega o koya na yaco mai ni matanitu ni Kalou.

⁵² Sa qai lako na tamata oqo vei Pailato ka la'ki kerea na yago i Jisu.

⁵³ Sa qai luvata ki ra na yago o Iosefo ka solega ena dua na i sole lineni, ka la'ki vakotora ena dua na i bulubulu ta ena vatu, ka sa bera ni bau vakotori kina e dua e liu.

⁵⁴ Ia na siga o ya na siga ni Vakaraubuka, ka sa toso voleka mai na Siga ni Vakacecegu.

⁵⁵ Sa qai lako vata kei Iosefo o iratou na yalewa ka muri Jisu mai Kalili ka ratou la'ki raica sara na i bulubulu kei na kena vakotori na yago i Jisu.

⁵⁶ E ratou sa mani lesu ka vakarautaka na i saluwaki kei na waiwai boi vinaka. E ratou a vakacegu ga ena Siga ni Vakacecegu me vaka sa vakaroti ena Lawa.