Luke 21 - Vakavakadewa Vou kei na iVola tale eso

Na Nona i Solisoli na Yada

¹ A sa vakarairai wavoki o Jisu ka raici ira na vutuniyau ni ra biuta tiko na nodra i solisoli ki na kato ni lavo ni valenisoro.

² A raica talega o koya e dua na yada dravudravua ni biuta kina e rua na i lavo lalai sara.

³ Sa qai kaya, “Au sa tukuna vakaidina vei kemudou, sa levu cake sara na ka e solia na yada dravudravua oqo mai vei ira na kena vo;

⁴ ni ra sa solia o ira kece na kena vo eso ga na ka mai na levu ni veika e bini tu vei ira; ia na yada oqo, ni sa dravudravua sara, sa solia na vo ni veika e se bau toka vua me bula kina.”

Sa Tukuna o Jisu na Vakarusai ni Valenisoro

⁵ E ratou a veitalanoataka tiko na Valenisoro eso vei iratou na tisaipeli, me baleta na kena ukutaki tu ena veivatu totoka kei na veimataqali i loloma era tu kina. Sa qai kaya o Jisu,

⁶ “Me baleta na veika dou sa raica tiko oqo, ena yaco mai na gauna ena sega ni vo tale eke eso na vatu me ra veitaqataqai tu; era na talaraki sobu kecega.”

Na Leqa Eso kei na Veivakacacani

⁷ E ratou sa qai tarogi koya ka kaya, “Na i Vakavuvuli, ena yaco e naica na ka oqo, ka na cava na kena i vakatakilakila ni sa vakarau vakayacori?”

⁸ Sa qai kaya o koya, “Dou qarauna mo dou kakua ni vakacalai; ni ra na lako mai e lewe vuqa ena yacaqu, ka ra mai kaya, ‘Sa i au ga o koya!’ ka ra na kaya talega, ‘Sa i koya oqo na kena gauna!’ Dou kakua ni muri ira.

⁹ Ni dou sa rogoca na veivaluvaluti kei na tiko veisei, dou kakua ni kidroa, ni sa dodonu me ra yaco mada na veika oqori; ia ena sega mada ni se yaco sara mai na i vakataotioti.”

¹⁰ Sa qai kaya vei iratou o koya, “Era na veivaluvaluti na veivanua, kei na veimatanitu;

¹¹ ena yaco na uneune lelevu, kei na dausiga, kei na mate ca ena veivanua eso, ka na rairai na veika vakadomobula kei na i vakatakilakila lelevu eso mai lomalagi.

¹² Ia ni bera ni yaco na veika o ya, era na tauri kemudou ka vakacacani kemudou, ka soli kemudou yani ki na veivalenilotu kei na veivaleniveivesu, ka dou na kau ki na matadra na tui kei na kovana eso ena vuku ni yacaqu.

¹³ Sa i koya oqo na gauna mo dou na tukuna kina na i Tukutuku Vinaka.

¹⁴ O koya oqo mo dou qai vakataudeitaka toka ena lomamudou mo dou kakua ni vakananuma e liu na ka mo dou kaya;

¹⁵ ni'u na solia vei kemudou na gusu kei na vuku, ka na sega ni dua na nomudou meca me vorata rawa se veiletitaka.

¹⁶ Ia era na soli kemudou yani na nomudou qase, kei ira na tacimudou, kei ira na wekamudou kei ira na nomudou i tokani, ka ra na vakamatei eso vei kemudou.

¹⁷ Era na cati kemudou o ira kecega na tamata ena vuku ni yacaqu.

¹⁸ Ia ena sega sara ni bau yali kina e dua na drauniulumudou.

¹⁹ Dou na rawata na nomudou bula dina, kevaka dou sa yalodei tiko.

E Tukuna o Jisu na Vakarusai kei Jerusalemi

²⁰ “Ia ni dou sa raica ni ra sa vakavolivoliti Jerusalemi na veimataivalu, dou kila sara ni sa voleka mai na kena vakarusai.

²¹ Me ra qai dro o ira na tiko e Jutia ki na veiulunivanua; me ra qai laivi mai loma ni koro o ira era tiko kina, ka me ra kakua talega ni qai curu kina o ira era tu ena veivanua ena kena taudaku.

²² Ni sai koya o ya na gauna ni veisausaumi, me vakayacori kina na veika sa volai tu ena i Vola Tabu.

²³ Sa na dua na gauna vakaloloma dina na gauna o ya vei ira na yalewa bukete kei ira ka sa vakasucu gone tiko! Ni na ka vakaitamera na rarawa ena yaco ki na vanua oqo, ka na tau na cudru ni Kalou vei ira na tamata oqo.

²⁴ Era na vakamatei ena i seleiwau, ka ra na kau vakabobula ki na veivanua eso; ka ra na buturaki Jerusalemi sobu na veimatanitu tani, me yacova ni sa oti na nodra gauna.

Na Lako Tale Mai ni Luve ni Tamata

²⁵ “Ena yaco eso na ka veivakurabuitaki ena matanisiga kei na vula kei na veikalokalo. E vuravura, era na veilecayaki na veivanua, ka ra na kidroa ena vakadomobula ni vadugu ni wasawasa kei na biau.

²⁶ Era na kaniyatedra na tamata ena rere ni ra sa waraka tiko na veika sa voleka ni yaco e vuravura, ni ra na kureitaki na veika kaukauwa ni lomalagi.

²⁷ Era na qai raica na Luve ni Tamata ni sa lako mai ena o ena kaukauwa kei na i serau levu.

²⁸ Ia ni sa tekivu me yaco na veika oqo, dou tacake, ka vagelegelei kemudou, ni sa voleka mai na nomudou vakabulai.”

Na Lesoni Mai na Vunilolo

²⁹ Sa qai tukuna vei iratou o Jisu e dua na vosa vakatautauvata, ka kaya, “Dou raica mada na vunilolo kei na veivunikau kecega.

³⁰ Ena gauna ga dou raica kina ni sa basika mai na drauna, dou sa kila sara ni sa voleka na vula i katakata.

³¹ Sa vakakina, ni dou sa raica ga ni ra sa yaco na veika oqo, dou kila sara ni sa voleka mai na matanitu ni Kalou.

³² Au sa kaya vakai dina vei kemudou, era na yaco kece sara mada na veika oqo ni bera ni takali yani na i tabatamata oqo.

³³ Ena takali o lomalagi kei vuravura, ia na noqu vosa ena sega ni takali.”

Me Kakua na Moce

³⁴ “Dou qarauni kemudou mo dou kakua ni vakasinaita na nomudou bula ena kana kei na marau vakalialia, kei na mateni, kei na lomaocaocataka na ka ni bula oqo, de na qai yaco vakidacala vei kemudou na siga o ya

³⁵ me vaka na cariba ni dai; ka ni na yaco mai vei ira kece era tiko e dela i vuravura raraba.

³⁶ O koya oqo mo dou qai yadra tikoga kina, ka masu me soli vei kemudou na kaukauwa mo dou kakua ni rawai ena veika oqo, ka tu ena mata ni Luve ni Tamata.”

³⁷ A sa veivakatavulici tiko o koya ena veisiga ena Valenisoro, ia ena bogi, sa dau lako ka la'ki moce ena Ulunivanua ni Veiolive.

³⁸ Ena mataka lailai ni siga ka tarava, era sa dau lako ki vua ki na Valenisoro na tamata kecega me ra vakarogoci koya.