Luke 2 - Vakavakadewa Vou kei na iVola tale eso

Na Sucu i Jisu

¹ Ena gauna o ya, a sa vakarota na tui (Sisa) o Akusito me caka e dua na wili lewenivanua ena matanitu taucoko vaka-Roma.

² Na i matai ni wili lewenivanua oqo sa vakayacori ena gauna e kovana tiko kina mai Siria o Kirinio.

³ Era a dui lako kece na tamata ki na nodra koro me ra volai kina.

⁴ A sa lako cake talega o Iosefo mai na koro o Nasareci e Kalili ki na koro o Peceliema e Jutia, na koro ni sucu nei Tevita na tui. A sa lako ki kea o Iosefo baleta ni sa kawa i Tevita o koya.

⁵ E rau la'ki volai vata kei Maria, o koya ka sa musuki tu vua me watina, ka sa bukete tiko.

⁶ Ena gauna e rau tiko kina mai Peceliema, a sa yaco mai na nona siga ni vakasucu.

⁷ A sa vakasucuma na nona ulumatua gonetagane, ka sa viviraki vua na i sulu ni gone ka vakadavora ena nodra i kanakana na manumanu; ni sa sega na tiki ni bure ni vulagi e lala me ratou tiko kina.

O Iratou na i Vakatawa ni Sipi kei Ira na Agilosi

⁸ E ratou a tiko voli ena vanua veico ena yasayasa o ya eso na i vakatawanisipi, ka ratou veivuke vakatawa sipi tiko ena bogi.

⁹ Sa qai rairai vei iratou e dua na agilosi ni Turaga, ka cila vakavolivoliti iratou na i serau ni Turaga; ka ratou sa rere vakalevu sara kina.

¹⁰ Sa qai kaya vei iratou na agilosi, “Dou kakua ni rere, dou rogoca mada, au sa kauta tiko mai vei kemudou e dua na i tukutuku vinaka, ka ra na reki vakalevu kina o ira kecega na tamata,

¹¹ ni sa sucu vei kemuni edaidai, ena koro i Tevita, na i Vakabula, o koya na Karisito, na Turaga!

¹² Oqo na kena i vakatakilakila vei kemudou: dou na kunea na gone ni sa viviraki tu vua na i sulu ni gone, ka davo koto ena nodra i kanakana na manumanu.”

¹³ E ratou qai kidacala ni sa rairai vata mai kei na agilosi o ya e dua na i lala levu mai lomalagi, ka ra sa vakacaucautaka na Kalou vakaoqo,

¹⁴ “Sa nona na Kalou na lagilagi ena veiyasana cecere sara, Ka sa veisaututaki rawa e vuravura o ira sa vinakata o koya!”

¹⁵ Ia ni ra sa biuti iratou na agilosi ka lesu tale i lomalagi, e ratou sa qai veitukunitaka vakai iratou na i vakatawanisipi, “Tou lako i Peceliema, ka la'ki raica na veika sa qai yaco oqo, me vaka sa vakaraitaka oti vei kedatou na Turaga.”

¹⁶ E ratou sa mani lako vakatotolo sara yani, ka kunei Maria kei Iosefo kei na gone ni davo koto ena nodra i kanakana na manumanu.

¹⁷ Ia ni ratou sa raici koya, e ratou sa qai tukuna na vosa sa tukuni vei iratou me baleta na gone o ya.

¹⁸ Era sa kurabui kecega o ira era sa rogoca na veika e ratou tukuna o iratou na i vakatawanisipi.

¹⁹ A taura matua sara na ka kecega o ya o Maria, ka vakananuma voli e lomana.

²⁰ E ratou sa mani lesu tale na i vakatawanisipi, ka ratou sa vakarokorokotaka, ka vakacaucautaka na Kalou ena vuku ni veika kecega e ratou a rogoca ka raica; era a yaco kece me vaka sa tukuni vei iratou.

Sa Vakayacani o Jisu

²¹ Ni sa oti na bogi walu me qai cilivi kina na gone, sa mani vakatokai me yacana o Jisu, me vaka ga ka a vakatoka na agilosi ni sa bera ni kunekunetaki.

Sa Vakacabori o Jisu ena Valenisoro

²² Ia ni sa oti na gauna ni vakasavasavataki i tinana me vaka e tu ena Lawa i Mosese, e rau sa qai kauta na gone ki Jerusalemi me rau vakacabori koya vua na Turaga.

²³ Me vaka ga e volai tu ena lawa ni Turaga, “Na gonetagane kecega e sucu ulumatua, era na vakatabui me ra nona na Turaga.”

²⁴ Ia, me rau vakacabora talega na i soro me vaka na ka e kaya na lawa ni Turaga o ya, “me rua na soqe, se rua na luve ni ruve.”

²⁵ Ia e tiko voli mai Jerusalemi ena gauna o ya e dua na tamata yalo dodonu ka lotu dina, a yacana o Simione. Sa bula ka waraka wale tu ga o koya na nodra vakacegui na Isireli, ka sa tiko vua na Yalo Tabu.

²⁶ A sa vakatakila oti vua na Yalo Tabu ni na raica rawa mada o koya na Mesaia sa yalataka na Turaga ni bera na nona mate.

²⁷ A sa vakauqeti koya na Yalo Tabu ka sa lako ki na Valenisoro. Ni rau sa kauta yani ki na Valenisoro na gone o Jisu oi rau na nona i tubutubu me qaravi vua na valavala ni Lawa,

²⁸ sa qai keveta cake na gone e ligana o Simione ka vakavinavinaka vua na Kalou, ka kaya,

²⁹ “Kemuni na Turaga, o ni sa maroroya na nomuni vosa ni yalayala, Ia mo ni qai laiva na nomuni tamata me lako ena vakacegu.

³⁰ Ni sa qai raica na mataqu na nomuni vu-ni-bula,

³¹ O koya o ni sa vakarautaka e matadra na tamata kecega:

³² A rarama me vakatakila na lomamuni vei ira na kai matanitu tani, Ka kauta mai na lagilagi vei ira na nomuni tamata na Isireli!”

³³ Ia e rau sa kurabui o tamana kei tinana ena vuku ni veika sa tukuni me baleti koya.

³⁴ Sa qai vosa vakalougatataki rau o Simione ka kaya vei Maria na tinana, “Raica, na gone oqo sa digitaka na Kalou me kauta mai na veivakarusai kei na veivakabulai ki na lewe vuqa e Isireli. Ena yaco o koya me nona i vakatakilakila na Kalou ka ra na lewe vuqa era na vosa vakacacataka,

³⁵ me vakavotui kina na nanuma vuni ni lomadra. Na rarawa talega, ni sa vaka na i seleiwau yame gagata, ena suaka talega na yalomu.”

³⁶ A sa tiko talega e kea ena gauna o ya e dua na parofita yalewa; a yacana o Ana, ka luve i Fanueli ena yavusa i Aseri. A sa qase sara o koya. A vakawati ena gauna ni nona goneyalewa donu, ka rau a tiko vata voli kei na watina me vitu na yabaki,

³⁷ ia sa yada tu oqo o koya ka sa yabaki 84. E sega ni dau lako tani mai na Valenisoro o koya ni sa dau lotu, ka lolo masumasu ena siga kei na bogi.

³⁸ A sa yaco mai o koya ena gauna vata o ya ka ia na vakavinavinaka vua na Kalou, ka tukuna na veika me baleta na gone kivei ira kece era waraka tiko na vakabulai nei Jerusalemi mai vua na Kalou.

Lesu Tale ki Nasareci

³⁹ Ia ni rau sa qarava oti o Iosefo kei Maria na veika kece me vaka e tu ena lawa ni Turaga, e ratou sa lesu tale ki Kalili, ki na nodratou koro o Nasareci.

⁴⁰ Sa qai tubu cake na gone me levu ka kaukauwa mai; sa sinai ena vuku, ka sa tu vua na veivakalougatataki ni Kalou.

Na Cauravou Lailai o Jisu ena Valenisoro

⁴¹ E rau dau lako na i tubutubu i Jisu ena veiyabaki ki Jerusalemi ki na Solevu ni Lakosivia.

⁴² Ena gauna sa yabaki tinikarua kina o Jisu, e ratou sa lako yani ki na solevu me vaka na kena i vakarau.

⁴³ Ni sa oti na solevu me ratou sa lesu tale, sa mani tiko laivi ga na cauravou lailai o Jisu mai Jerusalemi, ka rau sega ni kila na nona i tubutubu.

⁴⁴ Ia ni rau sa nanuma ga ni tiko o koya ena dua na matailakolako ka ra lako vata tiko, e rau sa mani lako tu ga ena siga taucoko o ya ni bera ni rau tekivu vakasaqarai koya vei ira na wekadrau kei na nodrau i tokani.

⁴⁵ Ni rau sa sega ni kunei koya, e rau sa qai lesu tale ki Jerusalemi ka la'ki vakasaqarai koya kina.

⁴⁶ Ena i katolu ni siga, e rau sa qai kunei koya ena Valenisoro ni dabe tiko ena kedra maliwa na i vakavuvuli, a sa vakarogoci ira tiko, ka vakatarogi ira talega.

⁴⁷ Era sa kurabuitaka na nona vuku kei na nona i sau ni taro o ira na tamata kecega era sa rogoci koya.

⁴⁸ Ni rau sa raici koya o rau na nona i tubutubu, e rau sa kurabui, ka sa kaya vua o tinana, “Na luvequ, na cava na vuna o sa cakava kina na ka oqo vei keirau? Raica, keirau sa vakasaqarai iko tiko kei tamamu ka keirau sa loma taqaya vakalevu.”

⁴⁹ Sa qai kaya vei rau o koya, “Na cava o drau vakasaqarai au kina? Drau sega ni kila ni sa dodonu me'u tiko ena vale nei Tamaqu?”

⁵⁰ Ia e rau a sega ni kila rawa na i balebale ni vosa e cavuta vei rau o koya.

⁵¹ Sa qai lako sobu vata kei rau o koya ka yaco ki Nasareci; sa dau talairawarawa vei rau, ka sa maroroya e lomana na vosa kecega o ya o tinana.

⁵² A sa tubu cake tikoga me levu o Jisu, ka sa toro cake tikoga na nona vuku; a sa vinakati koya vakalevu na Kalou ka vaka talega kina o ira na tamata.