Luke 19 - Vakavakadewa Vou kei na iVola tale eso

O Jisu kei Sakiusa

¹ A sa lako sara ki Jeriko o Jisu ka sa curuma yani na loma ni koro.

² E a tiko kina e dua na tamata o Sakiusa na yacana; o koya e dua na nodra i liuliu na daukumuni i vakacavacava, ka sa tamata vutuniyau sara.

³ A tovolea voli o koya me raica se vaka tu evei na i rairai kei Jisu, ia sa mani sega ni raici koya rawa ena vukudra na lewe vuqa, ni sa tamata lekaleka.

⁴ Sa qai cici ki liu o koya ka kabata e dua na vunilolo me raici Jisu kina, ka ni na lako volekata yani o koya.

⁵ Ia ni sa yacova yani na vanua o ya o Jisu, sa qai raici koya cake ka tukuna vua, “Mo siro sobu mai vakatotolo, i Sakiusa, baleta ni'u na tiko ena nomu vale edaidai.”

⁶ A siro sara vakatotolo ki ra o Sakiusa ka la'ki kidavaki koya ena marau.

⁷ Era sa tekivu me ra vosa kudrukudru na tamata kecega era raica oqo, ka kaya, “Na tamata oqo sa lako ki na vale ni tamata i valavala ca me la'ki nona vulagi!”

⁸ Sa qai tu cake o Sakiusa ka kaya vua na Turaga, “Ni rogoca saka mada oqo! Au na solia na veimama ni noqu i yau vei ira na dravudravua, ia kevaka au a lawakitaka e dua, au na sauma lesu vakava vua na veika ka'u a taura.”

⁹ Sa qai kaya vua o Jisu, “Sa yaco edaidai na bula ki na vale oqo, ni sa dua talega na luve i Epara-ama o koya oqo.

¹⁰ Ni sa lako mai na Luve ni Tamata me vakasaqara ka vakabula na ka sa yali.”

Na Vosa Vakatautauvata me Baleta na Paodi

¹¹ Ia ni ra sa rogoca tiko na veika o ya o ira na tamata, sa qai tukuna o Jisu e dua na vosa vakatautauvata. Sa voleka sara tiko ni yaco ki Jerusalemi o koya, ka ra sa nanuma na tamata ni sa vakarau basika vakasauri ena gauna o ya na matanitu ni Kalou.

¹² O ya na vuna sa mani kaya kina o koya, “E a lako e dua na turaga ki na dua na vanua yawa me la'ki buli kina me tui, ka me qai lesu tale mai.

¹³ Sa qai kacivi iratou e lewe tini na nona tamata, ka solia vei iratou yadudua e tau yadua na i lavo koula, ka kaya, ‘Dou caka bisinisi ena i lavo oqo me yacova na noqu lesu mai.’

¹⁴ Ia era a cati koya na nona lewe ni koro, ka ra a tala e dua na mata me muri koya, ka la'ki kaya, ‘Keimami sa sega ni vinakata me lewai keimami na tamata oqo.’

¹⁵ “Ia ni sa buli oti me tui, a sa qai lesu tale mai. Sa qai vakarota me ratou kacivi yani vua na nona tamata ka a soli i lavo vei iratou; me kila kina se cava e ratou sa dui rawata mai na nodratou veivoli.

¹⁶ Sa qai lako yani na i matai ni tamata, ka kaya, ‘Turaga, au sa rawata e tini tale na i lavo koula mai na kena o ni a solia vei au.’

¹⁷ Sa qai kaya vua o koya, ‘Vinaka vakalevu! O iko na tamata vinaka ka gugumatua! Ni o sa yalodina ena ka lailai sara, au sa lesi iko mo lewa e tini na koro.’

¹⁸ Sa qai lako yani na i karua ni tamata, ka kaya, ‘Turaga, au sa rawata e lima tale na i lavo koula mai na kena o ni a solia vei au.’

¹⁹ Sa qai kaya vua o koya, ‘O iko talega, au sa lesi iko mo lewa e lima na koro.’

²⁰ “Sa qai lako tale yani e dua, ka kaya, ‘Turaga, oqo na nomuni i lavo koula; ka'u a vunia tani toka ga ena dua na i tavoi.

²¹ Sa dua na ka na noqu rerevaki kemuni, baleta ni o ni sa rui tamata dredre. O ni sa dau taura na ka e sega ni nomuni ka tamusuka na ka o ni a sega ni kaburaka.’

²² Sa qai kaya vua o koya, ‘Tamata ca! Au na lewai iko ena vuku ni nomu vosa! O sa kila ni'u tamata dredre, ka dau la'ki taura na ka au a sega ni biuta koto, ka tamusuka na ka au a sega ni kaburaka.

²³ Na cava ga o a sega ni biuta kina na noqu i lavo ki na baqe, me rawa ni'u qai taura lesu kina kei na kena tubu ni'u sa lesu mai?’

²⁴ “Sa qai kaya o koya vei ira na tu voleka e kea, ‘Dou taura mai na i lavo koula e tiko vua ka solia vei koya e tu vua e tini.’

²⁵ Era sa qai kaya vua, ‘Turaga sa tu rawa tu vua e tini na i lavo koula!’

²⁶ ‘Au sa kaya vei kemudou, o koya yadua sa tu vua na ka, ena qai soli vakalevu tale yani vua; ia o koya e sega ni tu vua na ka, ena kau tani talega mai vua na ka e sa bau toka rawa vua.

²⁷ Ia me baleti ira na noqu meca oqo ka ra sega ni vinakata me'u lewai ira, kauti ira mai ki ke, ka vakamatei ira e mataqu!’ ”

Na Curu Vakatui ki Jerusalemi

²⁸ Ia ni sa cavuta oti na veika oqo o Jisu, sa mai lako sara yani ena nona i lakolako ki Jerusalemi, ka ra mai muri koya yani na kena vo.

²⁹ Ni sa toro voleka ki Pecifaki kei Pecani, ena delana sa vakatokai na Ulunivanua ni Veiolive, sa tala e lewe rua vei iratou na tisaipeli,

³⁰ ka kaya, “Drau lako ki na koro o ya; ni drau sa curu kina, drau na raica e dua na luve ni asa ni vesu tu, ka sa sega ni bau vodoki mada e liu, drau sereka ka kauta mai ki ke.

³¹ Kevaka e tarogi kemudrau e dua ka kaya, ‘Na cava drau sereka tiko kina?’ mo drau na kaya, ‘E vinakata na Turaga.’ ”

³² E rau sa mani lako sara oi rau ka a talai ka kunea me vaka ga sa tukuna vei rau o koya.

³³ Ia ni rau sa sereka tiko na luve ni asa, e ratou a qai kaya vei rau o iratou na kena i taukei, “Na cava drau sereka kina na luve ni asa?”

³⁴ E rau sa qai kaya, “E vinakata mai na Turaga.”

³⁵ E rau sa mani kauta vei Jisu, ka rau tevuka na nodrau i sulu ena daku ni luve ni asa, ka vakavodoki Jisu kina.

³⁶ Ia ni sa toso tiko yani ki liu o koya, era sa qai tevuka na nodra i sulu ena gaunisala o ira na tamata.

³⁷ Ia ni sa toro voleka yani ki Jerusalemi, ka yacova yani sa sala sa sirova sobu na Ulunivanua ni Veiolive, era sa tekivu me ra reki na i lala tisaipeli levu o ya ka vakacaucautaka na Kalou ena domo levu, ena vuku ni cakacaka mana kecega era sa raica oti.

³⁸ Era sa kaya, “Me vakalougatataka na Kalou na tui sa lako mai ena yaca ni Turaga! Sa yaco na tiko sautu mai lomalagi kei na vakarokoroko ena yasana cecere sara!”

³⁹ Era sa qai kaya vua eso na Farisi ka ra tiko ena kedra maliwa na lewe vuqa, “Na i Vakavuvuli, tarovi iratou mada na nomuni tisaipeli.”

⁴⁰ Sa qai sauma o koya, ka kaya, “Au sa tukuna vei kemuni, kevaka era tiko lo o ira oqo, era na qoqolou mai na veivatu!”

Sa Tagicaki Jerusalemi o Jisu

⁴¹ Ia ni sa toro voleka sara yani o Jisu, ka raica na koro, sa qai tagicaka,

⁴² ka kaya, “Isa, ke o kila wale mada ga edaidai na veika ena vuna na nomu vakacegu! Ia oqo era sa vunitaki e matamu.

⁴³ Ni na yaco mai vei iko na gauna era na viribaiti iko kina na nomu meca, ka vakavolivoliti iko, ka sogoti iko ena veiyasana kecega,

⁴⁴ ka talaraki iko ki ra; o iko kei ira na luvemu era tiko vei iko, ka ra na sega ni laiva me vo vei iko na veivatu era veitaqataqai tu, baleta ni o a sega ni kila na gauna sa mai sikovi iko kina na Kalou me vakabulai iko!”

Sa Lako ki na Valenisoro o Jisu

⁴⁵ Sa qai curu ki na Valenisoro o Jisu ka vakatekivu vakasavi ira tani era veivoli tiko kina,

⁴⁶ ka kaya vei ira, “Sa volai tu, ena i Vola Tabu ni kaya na Kalou, ‘A noqu vale ena vakatokai me vale ni masu!’ Ia o ni sa cakava me nodra qara na daubutako.”

⁴⁷ A sa veivakatavulici voli o Jisu ena Valenisoro ena veisiga. Era sa qai saga tiko o ira na bete levu, kei ira na daunilawa, kei ira na nodra qase na tamata me ra vakamatei koya,

⁴⁸ ia era a sega ga ni kunea rawa e dua na sala me ra cakava kina, baleta ni ra sa vinakata kecega na tamata me ra rogoci koya.