Luke 17 - Vakavakadewa Vou kei na iVola tale eso

Na i Valavala ca

¹ Sa qai kaya vei iratou na nona tisaipeli o Jisu, “Ena yaco dina ga na veivakacalai, ia sa na kalouca o koya e vakavuna!

² Ena vinaka cake vua kevaka sa vakarubeci e domona e dua na vatu i qaqi levu, ka biu ki wasawasa, ka ca ni vakacala e dua vei ira na lalai oqo.

³ Dou qarauni kemudou vinaka! “Kevaka e cala vei iko e dua na wekamu, vunauci koya; ia kevaka sa veivutuni, kakua ni cudruva.

⁴ Ia kevaka e cala vakavitu vei iko o koya ena dua na siga, ka saumaki vakavitu vei iko, ka kaya, ‘Au sa veivutuni,’ ia kakua ni cudruva.”

Na Vakabauta

⁵ E ratou sa qai kaya na i apositolo vua na Turaga, “Ni vakalevutaka na neitou vakabauta!”

⁶ Sa qai kaya na Turaga, “Kevaka e tu vei kemudou na vakabauta lailai sara me vaka na sore ni musita, e rawa mo dou kaya ki na vunilolo oqo, ‘Cavu i vuvu mai, ka la'ki tei ena loma ni wasawasa,’ ena talairawarawa vei kemudou na vunilolo.

Na i Tavi Vakadauveiqaravi

⁷ “O cei beka vei kemudou ena tukuna vakaoqo vua na nona dauveiqaravi ka se qai lesu tikoga mai na siviyara se vakatawa sipi, ‘Lako sara mai vakatotolo ka dabe mo kana?’

⁸ Sa segai sara! Ia, o na kaya beka ga vua, ‘Mo vakarautaka mada na kequ i vakayakavi, ka daramaka na nomu i sulu ni veiqaravi ka qaravi au me'u kana mada ka gunu; ni sa oti o ya, mo qai kana o iko’

⁹ E sega ni dau vakavinavinakataki na dauveiqaravi ena vuku ni nona muri lewa, se vakaevei?

¹⁰ Me vaka talega kina oqo vei kemudou; ni dou sa vakayacora na ka kecega sa vakaroti vei kemudou, mo dou qai kaya, ‘Keitou sa tamata dauveiqaravi ga; keitou sa cakava ga na neitou i tavi.’ ”

Sa Vakasavasavataki Iratou e Tini na Vukavuka o Jisu

¹¹ Ena i lakolako i Jisu ki Jerusalemi, sa lakova kina na loma i Samaria kei Kalili.

¹² Ia ni sa curu o koya ki na dua na koro, sa sota kina kei na lewe tini na tamata vukavuka. E ratou tu vakayawa tu yani;

¹³ ka ratou kaci vua ka kaya, “I Jisu, na Turaga, ni yalololoma mai vei keitou!”

¹⁴ A sa raici iratou o Jisu ka sa kaya vei iratou, “Dou lako ka la'ki raici ira na bete me ra vakadikevi kemudou.” Ni ratou se lako tikoga, e ratou sa qai vakasavasavataki sara.

¹⁵ Ni sa raica e dua vei iratou ni sa vakabulai, sa lesu tale vua, ka vakacaucautaka na Kalou ena domo levu.

¹⁶ A sa bale sobu ki na qele ena mata i Jisu, ka vakavinavinaka vua. A sa kai Samaria na tamata oqo.

¹⁷ Sa qai kaya o Jisu, “E sega li ni lewe tini e ratou a vakasavasavataki? Sa evei ga o iratou na lewe ciwa?

¹⁸ A cava na vuna e lesu duadua ga mai kina na kai tani oqo me vakavinavinaka vua na Kalou?”

¹⁹ Sa qai kaya vua o Jisu, “Tucake, ka lako; sa vakabulai iko na nomu vakabauta.”

Na Lako mai ni Matanitu ni Kalou

²⁰ Ena dua na gauna era a tarogi Jisu kina na Farisi se na yaco mai ena gauna cava na matanitu ni Kalou. E a qai sauma vei ira o koya, ka kaya, “Ena sega ni yaco mai na matanitu ni Kalou ena sala eso me laurai kina.

²¹ Ena sega ni rawa vua e dua me kaya, ‘Raica, sai koya oqo!’ se, ‘Sa tu mai o ya!’; baleta ni sa tu ga na matanitu ni Kalou ena lomamudou.”

²² Sa qai kaya vei iratou na tisaipeli, “Ena yaco mai na gauna dou na gadreva kina mo dou raica e dua na nona siga na Luve ni Tamata, ia dou na sega sara ni raica.

²³ Era na tiko eso era na kaya vei kemudou, ‘Raica, ena vanua o ya!’ se, ‘Raica, ena vanua oqo!’ Ia dou kakua sara ni lako ka vakasaqaqara.

²⁴ Me vaka na livaliva sa tibi kosova na lomalagi ka vakararamataka mai na dua na yasana ki na dua tale, ena vaka talega kina na Luve ni Tamata ena nona siga.

²⁵ Ia ena vosota mada e liu o koya na veika rarawa e vuqa, ka ra na besetaki koya na i tabatamata oqo.

²⁶ Me vaka sa yaco ena gauna i Noa, ena vaka talega kina ena gauna ni Luve ni Tamata.

²⁷ Era a kana tiko, ka gunu, ka vakawati, ka veimusumusuki me ra vakawati, ka yacova na siga sa vodoka kina na waqa o Noa. Sa qai lako yani na waluvu ka vakarusai ira kecega.

²⁸ Ena tautauvata talega kei na gauna i Loti. Era a kana tiko, ka gunu, ka veivoli; era a teitei, ka tara vale.

²⁹ Ia ena siga sa biuti Sotoma kina o Loti, sa tau mai lomalagi na bukawaqa kei na sulifure ka vakamatei ira kecega.

³⁰ Ena vaka o ya ena siga ena vakatakilai kina na Luve ni Tamata.

³¹ “Ena siga o ya, o koya e tiko ena dela ni vale, ka tu na nona i yaya e loma ni vale, me kakua ni lako sobu me la'ki kauta mai; ka vakakina o koya e tu mai na vanua ni teitei, me na kakua ni lesu tale ki vale.

³² Dou nanuma na wati Loti!

³³ O koya yadua sa via saga me maroroya na nona bula ena vakayalia; ia o koya sa vakayalia na nona bula ena maroroya.

³⁴ Au sa tukuna vei kemudou, ena bogi o ya, e rau na davo tu e lewe rua na tamata ena dua na i davodavo: ena kau tani e dua, ka biu tu mai na kena i karua.

³⁵ E rau na qaqi sila vata tiko e lewe rua na yalewa: ena kau tani e dua ka biu tu na kena i karua.

³⁶ E rau na tiko ena i teitei e rua na tagane, ena kau tani e dua ka biu tu mai na kena i karua.”

³⁷ E ratou sa qai kaya vua, “Turaga, ki na vanua cava?” Sa qai sauma o Jisu ka kaya, “Ena vanua sa koto kina na yago ni tamata mate, era na soqoni talega yani kina na vulituri.”