Luke 14 - Vakavakadewa Vou kei na iVola tale eso

Sa Vakabula o Jisu e Dua na Tauvimate

¹ Ena dua na Siga ni Vakacecegu, a la'ki kana o Jisu ena nona vale e dua na i liuliu ni Farisi, ka ra vakaraici koya matua sara eso na tamata.

² E a qai lako yani vua e dua na tamata e vuce levu tu na yavana vata kei na ligana.

³ Sa qai vosa vei ira na Farisi kei na daunilawa o Jisu, ka kaya, “Sa tara li me caka na veivakabulai ena Siga ni Vakacecegu se segai?”

⁴ Ia era a sega ni kaya rawa e dua na ka. Sa qai tauri koya na tamata o ya o Jisu, ka vakabula, ka kaya me lako.

⁵ Sa qai kaya vei ira o koya, “Ke dua vei kemuni e lutu na luvena se na nona bulumakau ki na dua na tobu wai ena Siga ni Vakacecegu, ena sega beka li ni la'ki vueta mai vakatotolo ena siga vata ga o ya?”

⁶ Ia era a sega ni sauma rawa na taro o ya.

Na Yalomalumalumu kei na Cakacaka Loloma

⁷ Sa qai tukuna o Jisu e dua na vosa vakatautauvata vei ira ka a sureti yani, ni sa raica na nodra digitaka ga na veitikina dokai; ka sa kaya vei ira,

⁸ “Ni sa sureti iko e dua ki na dua na kana ni vakamau, kakua ni la'ki dabe ena dua na tikina dokai, de sa sureti talega e dua e cecere cake mai vei iko,

⁹ ka na qai lako yani o koya sa sureti kemudrau ka kaya vei iko, ‘Solia mada vua na tamata oqo me dabe ena nomu tikina.’ O na qai madua kina ka la'ki dabe ena tikina sara mai ra.

¹⁰ Ia ni o sa sureti, la'ki tiko ena tikina sara mai ra, me na qai lako mai o koya ka sureti iko, ka na qai kaya vei iko, ‘Noqu i tokani, lako yani ki cake.’ O na qai dokai e matadra kece era sa sureti vata kei iko.

¹¹ O koya yadua sa vakalevulevui koya ena vakamalumalumutaki, ia o koya yadua sa vakamalumalumutaki koya ena vakalevulevui.”

¹² Sa qai kaya talega o Jisu vua na tamata ka a sureti koya, “Ni o sa cakava e dua na magiti me i vakasigalevu se i vakayakavi, kakua ni sureti ira na nomu i tokani, se na tuakamu, se na tacimu, se o ira na wekamu, se o ira na kai nomu vutuniyau — de ra na sureti iko tale e muri me kena i dole, ka sa na saumi lesu kina vei iko na ka o a cakava.

¹³ Ia ni o sa caka magiti, sureti ira na dravudravua, na lokiloki, na gera, na mataboko;

¹⁴ o na qai kalougata kina, ka ni ra na sega ni dolea rawa vei iko e dua na ka. Ena qai dolea vei iko na Kalou ena siga ni nodra tucake tale mai na mate na yalododonu.”

Na Vosa Vakatautauvata ni Kanavata Levu

¹⁵ Ia ni sa rogoca na ka oqo e dua vei ira era kana vata tiko kei Jisu, sa qai kaya vei Jisu, “Sa kalougata o ira era tiko ena kanavata ni Matanitu ni Kalou!”

¹⁶ Sa qai kaya vua o Jisu, “A sa dua na tamata sa cakava e dua na magiti levu ni kanavata, ka sureti ira kina e lewe vuqa.

¹⁷ Ia ni sa yaco na gauna me caka kina na vakayakavi, sa qai talai ira na nona tamata dauveiqaravi me ra tukuna vei ira sa sureti oti tu, ‘Mo ni lako mai, ni sa vakarau oti tu na veika kece sara!’

¹⁸ Ia era sa qai soli ulubale yadudua kece sara. A kena i matai sa tukuna vua na tamata dauveiqaravi, ‘Au sa volia e dua na tiki ni qele, ka dodonu me'u la'ki raica mada; ka'u sa kerea kina mo vosota ni'u na sega ni lako yani!’

¹⁹ E dua tale e kaya, ‘Au a volia e tini na bulumakau, ka'u sa lako sara tikoga oqo me'u la'ki vakatovolei ira; au sa kerea me'u vosoti ni'u na sega ni tiko.’

²⁰ E dua tale e kaya, ‘Au se qai vakamau walega oqo, sai koya o ya na vuna ka'u na sega ni lako rawa yani kina.’

²¹ “Sa qai lesu tale na tamata dauveiqaravi ka tukuna na veika o ya vua na nona turaga. A sa cudru vakalevu na i taukei ni vale, ka kaya vua na nona tamata dauveiqaravi, ‘Lako vakatotolo ki na veigaunisala kei na veisaqata ni koro ka kauti ira mai na dravudravua, kei ira na lokiloki, kei ira na mataboko, kei ira era sa sega ni lako rawa vakavinaka.’

²² Ni oti o ya, sa qai mai kaya tale na tamata dauveiqaravi, ‘Sa vakayacori oti saka na nomuni lewa, ia se lala tikoga e vuqa na tikina.’

²³ Sa qai kaya vua na tamata dauveiqaravi na nona turaga, ‘Lako ki na veigaunisala lelevu kei na veisala lalai, ka cikevi ira na tamata me ra lako mai, me sinai sara kina na noqu vale.

²⁴ Ni'u sa kaya vei kemudou, ena sega sara ni dua vei ira na sureti me na kania e dua na ka ena noqu i vakayakavi oqo!’ ”

Na i Colacola ni Bula Vakatisaipeli

²⁵ Era a salavata tiko kei Jisu e lewe vuqa sara, ka a vuki o koya ka kaya vei ira,

²⁶ “Kevaka e lako mai vei au e dua na tamata ka sega ni uasivi cake na nona lomani au mai na nona lomani tamana, kei tinana, kei na watina, kei iratou na luvena, kei iratou na tuakana kei na tacina, kei iratou na ganena, io kei na nona bula sara talega o koya, ena sega ni rawa me noqu tisaipeli.

²⁷ O koya talega e sega ni colata na nona kauveilatai ka muri au, ena sega ni rawa me noqu tisaipeli.

²⁸ “Se o cei vei kemuni e via tara e dua na vale cecere, me na sega ni tiko sobu mada e liu ka cakacakataka na kena i sau, se na rauta na ka e tu vua me vakaotia kina se sega?

²⁹ De lakolako ena qai cakava rawa walega na kena yavu ka sa oti na i lavo. Era na qai vakalialiai koya o ira kecega ka raica,

³⁰ ka ra kaya, ‘E a tekivu tara vale na tamata oqo, ia sa sega ni rawa ni vakaotia.’

³¹ “Se o cei na tui e la'ki vala kaya e dua tale na tui, me na sega ni tiko sobu mada e liu ka vakasamataka, se sa na rawa vua kei na nona lewe tini na udolu, me ra vala kaya na nona meca kei na nona ruasagavulu na udolu se sega?

³² Ia kevaka e sega, ena tala o koya e dua na mata ni sa yawa sara yani o koya ka dua, me vakamasuta me rau veisaututaki.

³³ O koya oqo ena sega kina ni rawa me noqu tisaipeli e dua vei kemuni kevaka e sega ni biuta tani na veika kece e tu vua.

Na Masima Tawa Yaga

³⁴ “E ka vinaka na masima, ia kevaka sa seyavu mai na masima ena kena tuituina, ena qai vakatuituinataki tale ena cava?

³⁵ Sa na qai tawa yaga ki na vanua se ki na i vakabulabula ni qele; ka ra sa na biuta tani ga na tamata. O koya sa vakadaligana me rogo kina, ia me rogoca sara!”