Lele i Jeremaia 5 - Vakavakadewa Vou kei na iVola tale eso

Na Masu ni Kere Veivuke

¹ Ni nanuma, Jiova, na veika sa yacovi keimami; Ni rai mai, ka raica na neimami vakaloloma.

² Na ka e neimami sa soli vei ira na kai tani; Era sa tiko ena neimami veivale na vulagi.

³ Keimami sa luveniyali, sa sega ni vakatamani; Sa vaka na yada o ira na tina i keimami.

⁴ Me keimami na sauma na wai keimami gunuva; Keimami na volia na neimami buka ni vakasaqa.

⁵ Keimami sa vakasaurarataki vaka na kameli, Keimami sa oca, ia sa sega ni soli na vakacegu.

⁶ Keimami sa kerea vei Ijipita kei Asiria, Na kakana me veirauti kei keimami.

⁷ Era sai valavala ca na neimami qase, Ia oqo era sa yali yani, Ka keimami sa colata na nodra ca.

⁸ Era sa lewai keimami na bobula; Sa sega e dua me veivueti mai na ligadra.

⁹ Keimami sa bole mate ga Me rawa mai kina na keimami kakana; Ena vuku ni seleiwau mai na vanua lala.

¹⁰ Sa tubu na katakata ni yago mai na viakana, Me yacova ni sa katakata vaka na ovani Na kuli ni yago i keimami.

¹¹ Era sa kucuvi na yalewa mai Saioni, Kei na goneyalewa ena veikoro e Juta.

¹² Era sa vakaliligi na i liuliu ena ligadra; Sa sega ni ra dokai na neimami qase.

¹³ O ira na cauravou Era sa vakasaurarataki me ra qaqi sila. Era sa taceba ga na gone lalai Ena vuku ni nodra i colacola buka bibi.

¹⁴ Era sa biuta na matamata ni koro na qase, Era sa mudu ni qiri vakatagi na cauravou.

¹⁵ Sa mudu na reki ni lomada; Sa vuki na noda meke me tagi ni lolosi.

¹⁶ Sa lutu tani mai na uluda na i sala vakaturaga, Eda sa kalouca, ni da sai valavala ca!

¹⁷ Ena ka oqo sa bibi kina na loma i keimami, Ena ka oqo sa buwawa kina na matada.

¹⁸ Ena vuku ni kena sa lala tu Na ulunivanua o Saioni, Era sa daulako voli kina na jekeli.

¹⁹ Ia oi kemuni ga, Jiova, na Tui tawamudu, Ka na veiliutaki tikoga me yacova na i vakataotioti.

²⁰ A cava o ni sa guilecavi keimami vakadua kina? A cava o ni sa biuti keimami kina vakadede?

²¹ I Jiova, mo ni vakalesui keimami tale yani; Ni vakavouia na neimami siga me vaka eliu.

²² Se o ni sa biuti keimami li vakadua? Sa sega li ni vakaiyalayala na nomuni cudru?