Lele i Jeremaia 4 - Vakavakadewa Vou kei na iVola tale eso

Na Cudruvi nei Saioni

¹ Sa yali yani na tatalivaliva ni koula, Ka sa veisau na i rairai ni koula dina! Na veivatu tabu era sa veituyaki Ena veitolo ni salatu kecega.

² O ira na luve i Saioni vakamareqeti, Era sai yau levu vei keda me vaka na koula, Ia oqo era sa vaka wale na kuro qele, Na cakacaka ni liga i koya na dautuli kuro!

³ O koya na tina ni olifa ena soli wainisucu, Me susugi cake kina o ira na luvena, Ia o ira na noqu tamata sa vaka na ositeriji, Era sai tovo kaukauwa vei ira na luvedra.

⁴ Era sa laivi ira ga na luvedra Me ra ciba ena viakana ka karamaca; Era sa kere kakana na luvedra, Ka sega ni dua e vakacegui ira kina.

⁵ O ira sa daukania na kakana digitaki, Era sa kolaiciba ena viakana e gaunisala; O ira sa susugi mai na veika sau lelevu, Era sa davo no ena dravusa sa bini tu.

⁶ Ni sa levu cake na kuita sa tau Vei ira na noqu tamata ka lailai sobu Na i totogi sa soli vei Sotoma; A sa vakarusai ga ena dua na gauna Mai na liga ni Kalou duadua ga.

⁷ Na neimami ravouvou Era sa savasava sara Me vaka na uca vulavula se na sucu; Era sa levulevu vinaka ka kaukauwa, Ka bulabula na yagodra taucoko.

⁸ Ia oqo sa loaloa na kedra i rairai Me vaka na qilaiso; Era sa sega ni kilai e gaunisala. Sa kabi na kulidra ena nodra sui, Ka sa mamaca me vaka na kau madu.

⁹ Sa vinaka cake o ira sa mate ena i valu Mai vei ira era sa qai mate emuri, O ira sa mate vakamalua ena viakana, Ka sa sega na kakana me ra bula kina.

¹⁰ Na ligadra dauloloma na marama, Sa vakasaqara tale na luvedra dina; Era sa yaco kina me kedra kakana, Ena rusa sa yacovi ira na noqu tamata.

¹¹ A sa solia kece o Jiova na nona cudru; Sa sovaraka na nona cudru katakata, A sa vakatubura e dua na kama e Saioni, Ka sa vakamai kina na kena yavu.

¹² Era sega ni vakabauta na tui kei vuravura, Sa sega talega ni dua na kai vuravura, Me na rawa ni curu mai na meca Ki na matamata ni koro o Jerusalemi.

¹³ Sa yaco ga ena vuku ni i valavala ca Mai vei ira na nona parofita kei na bete, O ira sa vakadavea na nodra dra na yalododonu Ena loma ni vanua.

¹⁴ Sa vakayayamo me vaka na mataboko O ira na nona dauveiliutaki ena veisalatu. Era sa vakadukadukalitaki ena dra, Ka sa sega ni rawa vua e dua Me tara na nodra i sulu.

¹⁵ Era sa kailavaka, “Ni lako tani! Dukadukali!” Ni toso laivi! Kakua ni tara! Era sa dauyasa voli kina ka veitokiyaki; Sa dautukuni kina vei ira na veimatanitu, “Era na sega ni tiko tale vakadua eke.”

¹⁶ O Jiova ga e sa vakavuna me ra talabusese, Ena sega ni kauwaitaki ira tale o koya; A sa sega ni dokai na bete, Ka sega ni lomani ira na qase.

¹⁷ Ni sa sega ni yaco mai na veivuke, Ka sa oca na mata i keimami ena vakararai. Keimami a vakararai matua Ki na matanitu sa rawa ni ia na veivueti.

¹⁸ Era sa muri we ni yavada na meca Me da kakua ni lakova kina na noda salatu; Sa voleka na noda i tinitini; sa wiliki na noda siga; Ni sa yaco oti mai na noda i vakataotioti.

¹⁹ O ira na vakacemuri keda tiko sa totolo sara Ka berabera na ikeli ni lomalagi; Era cici muri keda ena veiulunivanua Era sa waraki keda toka mai ena vanua lala.

²⁰ Era sa vesuka na i vurevure ni noda bula, O koya na tui ka sa digitaka o Jiova, O koya eda sa nuitaka Me maroroi keda mai vei ira na meca.

²¹ Mo ni reki ga ka marau na kai Itomi, Oi kemuni sa bula tiko ena vanua o Usu. Ena lako talega mai na nomuni ka ni rusa; O ni na lako luvawale kina ena madua.

²² Sa oti na cudruvi i Saioni ena vuku ni caka ca; Ena sega ni veivakabobulataki vakadua o Jiova. Ia o iko Itomi, ena cudruvi iko o Jiova; Ena vakavotuya o koya na nomu i valavala ca.