Lele i Jeremaia 3 - Vakavakadewa Vou kei na iVola tale eso

Na Cudruvi, na Veivutuni kei na i Nuinui

¹ Sa i au ga oqo ka'u sa kila Se na cava na cudruvi mai vua na Kalou.

² Sa veituberi ka kauti au yani ki na vanua Sa butobuto vakalevu ka segai na rarama.

³ Ena nona cudru sa vuki tani kina; Sa mokulaki au tikoga ena siga taucoko.

⁴ Sa drutilaka na lewequ kei na kuliqu Ka sa ramusu na noqu sui.

⁵ Sa vesuki au ka ubi au Ena rarawa kei na veivakararawataki,

⁶ Sa kitaka me'u dabe ena butobuto Me vaka na tamata sa mate makawa sara.

⁷ Sa vesuki au ena sinucodo bibi; Oi au na kaivesu sa sega ni dro bula rawa.

⁸ E dina ga ni'u sa kaci ka kere veivuke, Ia sa sega ni via rogoci au na Kalou.

⁹ Au sa taceba ga ni'u sa lako voli; Sa lati au ga na lalaga vatu mai na veiyasana.

¹⁰ Sa waraki au o koya me vaka e dua na bea; Sa vakasasataki au me vaka e dua na laione.

¹¹ Sa vukica na noqu i lakolako ka basuraki au; Sa qai biuti au tu me'u vakaloloma.

¹² Sa laveta na nona dakaititi ka vakadodonutaka Ka me lau vei au na nona gasau.

¹³ Sa vanataka mai na nona gasau Ka sa lauta na noqu gacagaca e loma.

¹⁴ Era sa dredrevaki au o ira na tamata; Ka'u sa yaco me'u ka ni veiwali vei ira kece.

¹⁵ A sa solia ga vei au na rarawa mosimosi, Me kequ kakana kei na mequ wai ni gunu.

¹⁶ Sa laiva na batiqu me quruta na qereqere, Ka vakacuvara na mataqu ki na dravusa.

¹⁷ Sa yali e lomaqu na vakacegu; Ka'u sa sega ni kila se na cava na marau.

¹⁸ Ia ka'u sa kaya kina, “Sa yali na noqu lagilagi, Kei na veika ka'u sa vakanuinui kina vei Jiova.”

¹⁹ Na vakanananu ni noqu rarawa ka sega na vale Sa vaka ga na duva kei na wai wiwi.

²⁰ Sa vakananuma tikoga oqo na yaloqu Ka sa bibi sara kina na yaloqu.

²¹ Ia ka'u sa qai vakananuma ga na ka oqo, Ka'u sa kila kina ni sa tiko na noqu i nuinui:

²² Na loloma tudei i Jiova sa ia tikoga, Ka sa sega ni mudu na nona yalololoma.

²³ Sa vakavoui ga ena veimataka; Sa cecere sara na nomuni yalodina.

²⁴ Sa kaya na yaloqu, “Sa noqu i votavota o Jiova Ka'u sa vakanuinui ga kina ki vua.”

²⁵ Sa yalovinaka o Jiova vei ira sa waraki koya, Io ki na veiyalo sa vakasaqarai koya.

²⁶ Sa ka vinaka ga na wawa ena vosota Ena vuku ni veivakabulai i Jiova.

²⁷ Sa ka vinaka vua me da vulica na vosota oqo Ena gauna ni noda tabagone;

²⁸ Me da dabe duadua ka vakadigagalu Ena gauna ni rarawa sa virikotora na Turaga;

²⁹ Me da cuva sobu ga ena yalomalumalumu, De rairai se tiko na i nuinui.

³⁰ E dina ga ni da sa mokulaki ka vosacataki, Ia me da ciqoma na veika kecega.

³¹ Ni sa dauyalololoma na Turaga Ka na sega ni biuti keda tani vakadua.

³² E dina ga ni sa rawa vua me veivakararawataki, Ia sa dei ga ka kaukauwa na nona lomani keda.

³³ Ni sa sega ni rawarawa vua me veivakararawataki Se me vakamosia na yalona e dua.

³⁴ Ena gauna era sa buturaki sobu kina O ira na kaivesu ni vanua kece sara,

³⁵ Ena gauna sa vakatanitaki kina na dodonu yadua Ena mata i Koya sa Cecere sara,

³⁶ Ena gauna sa cala kina na mataveilewai — E sega li ni raica tu na veika oqo o Jiova?

³⁷ O cei beka ena vakarota na kena caka, Kevaka e se bera ni vakadonuya o Jiova?

³⁸ E sega li ni tau mai na gusu i Koya sa Cecere Na yaco mai ni veika vinaka kei na veika ca?

³⁹ A cava ga na vuna eda qai vosavosa kina Ni da sa cudruvi baleta na noda i valavala ca?

⁴⁰ Me da dikeva tale mada na noda bula, Ka lesu tale vei Jiova.

⁴¹ Me da laveta cake na yaloda kei na ligada Vua na Kalou ni lomalagi ka masu vakaoqo,

⁴² “Keimami sai valavala ca ka talaidredre Ka o ni se sega ni ia na veivosoti.

⁴³ “O ni sa cemuri keimami ka vakamatei keimami, Sa ologi na nomuni loloma ena nomuni cudru;

⁴⁴ O ni sa ologi kemuni ena dua na o Me kakua ni curu basikata rawa na masu.

⁴⁵ O ni sa vakayacori keimami me i sovasova ni benu Ena kedra maliwa na tamata.

⁴⁶ O ira kece na neimami meca Era sa vosa vakacacataki keimami;

⁴⁷ Sa yacovi keimami na taqaya kei na rere, Sa vakakina na veivakacacani kei na veivakarusai.

⁴⁸ Sa drodro vakayauyau na wainimataqu Baleta na nodra vakarusai na noqu tamata.

⁴⁹ Sa drodro tikoga na wainimataqu, Ka sega ni cegu se mudu

⁵⁰ Me yacova ni sa rai mai lomalagi O Jiova ka sa raici keda.

⁵¹ Sa vakamosi yalo ni'u sa raica Na veika sa yacovi ira na yalewa ni noqu koro.

⁵² Ia o ira na kequ meca ka segai na vuna Era na vakasasataki au ga Me vaka na manumanu vuka.

⁵³ Era sa biuti au bulabula ena i keli Ka vakaviriki au ena vatu.

⁵⁴ A sa luvuca na uluqu ena wai, Ka'u sa nanuma ni sa voleka sara o mate.

⁵⁵ Au a kaciva na yacamuni, i Jiova, Mai na boto ni i keli titobu.

⁵⁶ O ni sa rogoca na noqu kere veivuke, “Ni kakua ni sogota na daligamuni; Ni rogoca ga na noqu kaci ka vakacegui au!”

⁵⁷ O ni sa toro volekati au ni'u sa kaci yani; O ni sa qai kaya, “Mo kakua ni rere!”

⁵⁸ O ni sa keveti au cake, na Turaga, O ni sa vakabula tale na yaloqu.

⁵⁹ I Jiova, o ni sa raica votu sara Na veika ca sa vakayacori vei au; Mo ni mai vakatulewa mada kina.

⁶⁰ O ni sa raica talega na nodra i naki ca Ni ra sa via coriti au.

⁶¹ I Jiova, o ni sa rogoca na veivakacacani, Na nodra i naki ca kece sara me baleti au.

⁶² Na nodra vakasolokakana Kei na nodra vosa kudrukudru na kequ meca, Me baleti au ena veisiga kece sara.

⁶³ Ni ra sa tiko sobu se mata cake — ni raica, Sa i au ga era sa seretaka vakaca.

⁶⁴ I Jiova, ni sauma lesu vei ira na nodra cala, Me vaka ga na veika era sa cakava.

⁶⁵ Ni vakalomaleqataka na lomadra; Ka me muri ira na nomuni cudru.

⁶⁶ Ni vakasavi ira ena nomuni cudru, Ka vakarusai ira tani mai na vuravura oqo.