Lele i Jeremaia 2 - Vakavakadewa Vou kei na iVola tale eso

Na Cudru i Jiova vei Jerusalemi

¹ Sa ubi Saioni ena butobuto Na Turaga ena nona cudru. Sa viritaka sobu mai lomalagi ki vuravura Na lagilagi kei Isireli; A sa sega tale ni nanuma na i tutu ni yavana Ena siga ni nona cudru waqawaqa.

² Sa veivakarusai o Jiova ka tabu loloma Ki na i tikotiko kecega i Jekope; Ena dela ni nona cudru sa vorolaka kina Na bainivalu ni vanua eso e Juta. A sa biuta sobu ki na qele ena rogo ca Na matanitu kei ira na kena i liuliu.

³ A sa muduka o koya ena cudru waqawaqa Na kaukauwa kece i Isireli; A sa sega ni dodoka mai na ligana i matau Me vukei keimami e matadra na meca; Sa cudruvi keimami me vaka na bukawaqa Ka sa vakama na veika kecega sa volita.

⁴ A sa vakarautaka na nona dakaititi Me vanalaki keimami me vaka na meca; A sa vakamatei ira kece sara Na noda i sakisaki kei na vu ni reki. Ni da sa vakila na nona cudru katakata Ena koro oqo o Jerusalemi.

⁵ Sa yaco o Jiova me vaka e dua na meca; Sa vakarusai Isireli o koya; Sa vakarusa na veivale vakatui kecega, Ka sa vakarusa na kena veibainivalu kaukauwa, Ka sa kauta mai kivei ira na Juta Na rarawa kei na vutugu sa sega ni oti rawa.

⁶ A sa vakacacana na nona vale vakacevaceva Me vaka e dua na i teitei; Sa vorolaka vakamatailalai sara vakakina Na Valenisoro eda dau sokalou kina; Sa muduka ga o Jiova mai Saioni Na veisolevu tabu kei na Siga ni Vakacecegu; Ia na nona cudru waqawaqa era sa vota O ira na tui kei ira na bete.

⁷ Sa besetaka o Jiova na nona i cabocabonisoro, Ka sa lako tani mai na nona Valenisoro tabu; A sa solia ki na ligadra na meca Na lalaga ni nodra veivale vakatui. Era sa kaila ga ena qaqa Ena tikina keimami a dau sokalou kina ena reki.

⁸ Sa nakita o Jiova me vakarusai Na lalaga ni koro o Saioni; A sa vakadreta na kena wa; Sa sega ni tarova na ia ni veivakarusai; Sa vakavuna me rusa na lalaga kei na tawa; Era sa kabasu ka sa bini vata tu.

⁹ Na matamata ni koro sa rusa ki na qele, Sa vakacacani na kena bai kaukamea. Na tui kei ira na turaga kilai era sa vesu. Sa sega ni vunautaki tale vakadua na Lawa; O ira na parofita sa sega vei ira na raivotu Sa lako mai vei Jiova.

¹⁰ O ira na qase mai Jerusalemi Era sa dabe sobu ena qele ka vagagalu; Sa viritaki ga ki uludra na qele Ka sa vakaisulu ena sulu taga; Ia o ira na goneyalewa kei Jerusalemi, Era sa cuva ena vakarokoroko ki na qele.

¹¹ Sa malumu sobu na mataqu ena levu ni tagi; Io sa rarawa vakalevu sara na yaloqu. Sa vakaocai au ga na noqu lomabibi Ena vuku ni noda vakarusai na noqu tamata. O ira na gone kei na gone dramidrami Era sa matabuto ena veisalatu ni koro.

¹² Era sa dui tagica na tinadra, Ni ra sa viakana ka viagunu. Era sa davo tu yani ena salatu ni koro Me vaka era sa mavoa ka mate vakamalua Ena qeteqete ni liga i tinadra.

¹³ Isa Jerusalemi, o Jerusalemi lomani, A cava me'u na tukuna vei iko? Me'u na vakacegui iko li vakaevei? Sa sega e dua me bau vakacacani vakaoqo. Na nomu vakarusai sa rabailevu vaka na wasawasa; Sa sega sara na i nuinui ni bula.

¹⁴ O ira na nomu parofita eso era sa solia Vei iko na veiraivotu lasulasu. Sa vakacalai iko na nodra i vunau Ni ra sega ni vakatakila kina na nomu i valavala ca. Era sa vakayacora na ka mo nanuma kina Ni sa sega ni yaga mo veivutuni.

¹⁵ O ira sa lako takoso ena sala Era sa vakasausau ni ra beci iko. Era sa vakasisi ka kureitaka na uludra Ka veiwalitaka na rusa kei Jerusalemi. “Sa i koya beka oqo na koro talei o ya? O koya li oqo na i sakisaki kei vuravura?”

¹⁶ O ira na kemu meca kece sara Era sa vakaraici iko ena loma ca. Era sa ruru ga vei iko ka kaya, “Keimami sa vakarusai koya! Oqo na siga keimami sa namaka; Keimami sa qai raica dina sara!”

¹⁷ Sa cakava o Jiova na ka sa nakita, Sa vakayacora na nona vosa; Io na veika sa vakarota taumada eliu, Ni sa veivakarusai ka sega ni loloma. Sa solia na qaqa vei ira na kequ meca Kei na reki ena vuku ni neimami vakaleqai.

¹⁸ Tagi vakadomoilevu vei Jiova! O iko na bai ni koro o Jerusalemi! Laiva na wainimatamu me drodro sobu Me vaka na uciwai ena bogi kei na siga; Kakua ni cegu ka vakaogai iko voli ga Ena tagi kei na lolosi!

¹⁹ Mo mata cake ena bogi taucoko Ka tagi yani vei Jiova; Sovaraka na yalomu me vaka na wai Ena mata ni Turaga! Laveta na ligamu ki vua Me vakabulai ira na luvemu, O ira na gone sa kolaiciba ena viakana Ena mua ni sala ni koro kecega.

²⁰ Mo ni raica mada oqo, i Jiova! A cava o ni sa totogitaki keimami kina vakaoqo? Me ra kania li na yalewa na vua ni ketedra, Na gone era sa vakasucuma? O ira na bete kei na parofita Era sa vakamatei ena loma ni Valenisoro!

²¹ O ira na gone kei na qase era sa davo Ena buturara ni veisalatu; O ira na noqu goneyalewa kei na cauravou Era sa bale mate ena i seleiwau. Ena siga ni nomuni cudru o ni vakamatei ira kina, Era sa suwaki ka sa sega na yalololoma.

²² O ni sa sureti ira na kequ meca mai na veivanua Me vaka ga ni sa dua na siga ni solevu. Ia ena siga ni cudru waqawaqa i Jiova Sa sega ni dua e dro bula rawa kina; O ira kece ka'u a susuga ka tubera Era sa vakarusai kecega mai vua na kequ meca.