Lako Yani 9 - Vakavakadewa Vou kei na iVola tale eso

Ai Kalima ni Totogi: Mate na Manumanu Susu

¹ A sa kaya vei Mosese o Jiova, “Mo lako vua na tui, ka tukuna vua, ‘Sa kaya vakaoqo o Jiova, na nodra Kalou na Iperiu mo laivi ira na noqu tamata me ra lako, ka me ra la'ki qaravi au.

² Ia kevaka o na sega ni via laivi ira me ra lako,

³ au na cudruvi iko ena mate rerevaki ka'u sa solia vei iko me ra mate kina na nomu manumanu susu kece sara — na ose, na asa, na kameli, na qele ni bulumakau kei na sipi.

⁴ Au na vakaduiduitaka na nodra qele ni manumanu susu na Isireli mai na nodra na kai Ijipita, ka na sega ni mate kina e dua na nodra manumanu na Isireli.

⁵ Oi au, o Jiova, ka'u sa lokuca na siga ni mataka me sa na yaco kina na veika oqo.”

⁶ Ena siga ka tarava, a sa vakayacora o Jiova na nona vosa, ka ra sa mani mate kina na nodra manumanu susu kece sara na kai Ijipita, ia sa sega ga ni bau mate e dua na nodra manumanu susu na Isireli.

⁷ A sa vakataroga na tui na veika sa yaco ka sa tukuni vua ni sega ni bau dua na nodra manumanu na Isireli me mate. Ia sa kaukauwa ga na lomana na tui ka bese ni laivi ira na Isireli me ra lako.

Ai Kaono ni Totogi: Na Bo

⁸ A sa kaya vei Mosese kei Eroni o Jiova, “Drau lukuta na dravusa ka kaburaka yani ki macawa me donuya na mata ni tui.”

⁹ Ia ena yaco me kuvu ni qele matailalai ka robota na vanua taucoko o Ijipita, ka ra na tauvi bo kina ka la'ki yaco sara me vidikoso na tamata kei na manumanu.

¹⁰ Erau a qai kauta na dravusa ka tucake tu ena mata ni tui, ka qai kaburaka yani ki macawa o Mosese, ka vakavuna oqo na bo kei na vidikoso vei ira na tamata kei na manumanu.

¹¹ Era a sega ni rairai rawa vei Mosese o ira na daucakamana baleta ni ra sa tauvi bo ka vakakina o ira na kai Ijipita.”

¹² Ia sa vakaukauwataka na lomana na tui o Jiova, me vaka ga na nona vosa vei Mosese, ka sa sega ni vakarorogo vei rau o Mosese kei Eroni na tui.

Ai Kavitu ni Totogi: Kurukuru kei na Uca Cevata

¹³ A qai kaya vei Mosese o Jiova, “Mo yadra ena mataka lailai ni mataka ka lako vua na tui ka kaya vua, ‘Sa tukuna vakaoqo o Jiova na nodra Kalou na Iperiu: Mo laivi ira na noqu tamata me ra lako ka la'ki qaravi au.

¹⁴ Ia oqo au na tala kece yani na noqu mate rerevaki vei iko, kei ira na nomu vakailesilesi kei na nomu tamata, mo ni kila kina ni sa sega tale ni dua keirau tautauvata ena vuravura oqo.

¹⁵ Ia ena gauna oqo, kevaka me'u sa dodoka yani na ligaqu ka ravuti iko kei ira na nomu tamata ena mate rerevaki, sa na yaco mo ni qeyavu taucoko mai na vuravura oqo,

¹⁶ Ia sai koya oqo na vuna au sa laivi iko kina mo bula: me'u vakaraitaka vei iko na noqu kaukauwa, ka mo vakarogoya na yacaqu e vuravura taucoko.

¹⁷ O sa vakalevulevui iko tikoga vei ira na noqu tamata, ka sega ni laivi ira me ra lako.

¹⁸ Ena gauna vata oqo ni mataka, au na vakatauca kina na uca cevata bibi duadua ka sega ni se bau kilai e liu ena i tukutuku kei Ijipita.

¹⁹ Ia oqo mo vakaroti ira era qarava na nomu manumanu kei na veika kecega sa tu e tautuba me ra kau mai me ra vakarurugi; na tamata se manumanu taucoko era tu e tautuba ka sega ni vakarurugi era na mate kecega ni sa na tau mai na uca cevata.”’

²⁰ O ira na vakailesilesi ni tui ka ra rerevaka na vosa i Jiova era a vakusakusataki ira tani mai na nodra bobula kei na manumanu ki na dua na vanua me ra la'ki vakaruru kina.

²¹ O ira era a sega ni kauwaitaka na vosa i Jiova era laivi ira tu ga na nodra bobula kei na manumanu e tautuba.

²² A sa kaya vei Mosese o Jiova, “Mo dodoka cake na ligamu ki lagi, me na rawa ni tau mai kina na uca cevata ki na vanua taucoko o Ijipita, vei ira na tamata, na manumanu kei na kau kecega ena loma ni vanua kei Ijipita.”

²³ Sa qai laveta cake vakakina o Mosese na nona i titoko ki lagi, ka sa vakayacora o Jiova na kurukuru kei na uca cevata, ka sa tibika na vanua na livaliva.

²⁴ E a tau tiko na uca cevata ka tibi na liva ena veiyasana kecega. A sa yaco me dua na draki ca levu ka sega ni a sa bau yaco vakadua ena i tukutuku kei Ijipita.

²⁵ A sa vakarusa na uca vulavula na veika kecega sa tu e tautuba ka donumaka na vanua galala, ka okati vakakina na tamata kecega kei ira na manumanu taucoko. A sa vakarusa talega na kau lalai ni vanua kecega kei na veivunikau.

²⁶ A sa sega ga ni tau na uca cevata ena vanua o Qoseni, oqori na vanua era sa tiko kina na Isireli.

²⁷ A vakaroti Mosese kei Eroni na tui me rau la'ki raici koya, ka sa kaya, “Au sai valavala ca ena tiki ni gauna oqo; sa dodonu ga o Jiova, ka'u sa cala ga oi au kei ira na noqu tamata.

²⁸ Drau masu vei Jiova! Me sa rauta na kurukuru kei na uca cevata! Au sa na laivi kemuni mo ni lako yani; mo ni sa kakua tale ni tiko eke.”

²⁹ A sa kaya vua o Mosese, “Ena gauna ga au sa tiko kina ena i bili ni koro, au na laveta cake na ligaqu ena masu vei Jiova. Ena qai oti na kurukuru ka sega tale ni tau na uca cevata, ka mo ni na kila kina ni sa nei Jiova o vuravura.

³⁰ Ia au sa kila ni o kemuni kei ira na nomuni vakailesilesi o ni se sega tikoga ni rerevaka na Kalou o Jiova.”

³¹ A sa sega talega na masi kei na barile ni ra sa vakacacani kecega, baleta ni la'ki matua sivia na barile ka sa lavouvou mai na masi.

³² Ia sa sega ga ni vakacacani na witi, baleta ni a qai matua ena dua na gauna e muri.

³³ A sa biuti tui Ijipita o Mosese ka lako tani yani mai na koro, a sa laveta cake na ligana vei Jiova; a sa oti kina na kurukuru, na tau ni uca cevata kei na uca.

³⁴ Ia ni sa raica na tui na ka sa yaco, a sa ia tale na i valavala ca. A sa qai vakalevutaki cake ga kina na nona lomaqa ka vakakina o ira na nona vakailesilesi,

³⁵ ka sa sega ni laivi ira na Isireli me ra lako, me vaka ga na veika sa kaya oti vei Mosese o Jiova.