Lako Yani 3 - Vakavakadewa Vou kei na iVola tale eso

Sa Kacivi Mosese na Kalou

¹ A sa dau vakatawani ira voli na sipi nei vugona o Jacoro na bete mai Mitiani o Mosese. Ena dua na siga, sa qai kauti ira yani na sipi ki na taudaku ni vanua lala me yaco sara i Saineai, na ulunivanua tabu.

² A sa rairai vua mai kea na agilosi i Jiova ena yameyame ni buka sa caudre tiko mai na loma ni vunikau. E a raica rawa o Mosese ni sa caudre tu na vunikau, ia sa sega ga ni kama na vunikau.

³ A qai kaya o Mosese, “Me'u lako mada i kea me'u la'ki raica mada na ka matalia oqo, se cava na vuna sa sega ni kama yavu kina na vunikau.”

⁴ Ni sa raica o Jiova ni sa lako yani o Mosese me raica, sa qai kacivi koya na Kalou mai na vunikau, “I Mosese, I Mosese!” A sa sauma o koya ka vaka, “Oi au saka oqo.”

⁵ A sa kaya o Jiova, “Kakua ni toro voleka mai. Luvata tani na i vava mai na yavamu, ni sa vanua tabu o tucake tu kina.

⁶ Oi au na Kalou ni nomu qase, na Kalou i Epara-ama, na Kalou i Aisake, kei na Kalou i Jekope.” A sa tabonaka na matana o Mosese, baleta ni sa rerevaka me raica na Kalou.

⁷ A sa qai kaya o Jiova, “Au a raica ka rogoca na nodra rarawa na noqu tamata ka ra tiko mai Ijipita, ka'u sa rogoca na nodra tagi ena vuku ni veika rarawa era sa vakayacora o ira na i liuliu ni cakacaka. Ia oqo ka'u sa kila na nodra rarawa,

⁸ ka'u sa lako sobu mai kina me'u sereki ira mai vei ira na kai Ijipita, ka me'u kauti ira tani mai Ijipita ki na dua na vanua sa levu ka sautu, na vanua sa dave kina na sucu kei na oni, ki na nodra vanua na kai Kenani, na Itaiti, na Amoraiti, na Perisaiti, na Avaiti, kei na Jepusaiti.

⁹ Ia oqo sa rogo mai vei au na nodra tagi na Isireli, ka'u sa raica talega na nodra veivakabobulataki na kai Ijipita.

¹⁰ Ia oqo mo lako, me'u talai iko vei tui Ijipita mo rawa ni o kauti ira tani mai kina na noqu tamata na Isireli mai Ijipita.”

¹¹ Sa qai kaya o Mosese vua na Kalou, “O cei o au me'u lako vua na tui, ka kauti ira tani mai Ijipita na Isireli?”

¹² A sa kaya na Kalou, “Au na tiko kei iko, ia oqo me i vakatakilakila vei iko ni'u sa talai iko, ena nomu sa na kauti ira tani mai na tamata mai Ijipita, ia dou na mai qarava na Kalou ena ulunivanua oqo.”

Vakatakilai na Yaca Tabu ni Kalou

¹³ Ia sa kaya o Mosese vua na Kalou, “Kevaka ka'u sa lako vei ira na Isireli ka kaya, ‘Na Kalou ni nomuni qase sa talai au mai vei kemuni,’ ka ra qai tarogi au, ‘o cei na yacana?’ A cava beka me'u na tukuna vei ira?”

¹⁴ A sa kaya na Kalou vei Mosese, “Oi au sai au ga. Oqori na ka mo tukuna vei ira: O koya sa vakatokai o ‘OI AU’ sa talai au yani vei kemuni.”

¹⁵ A sa kaya tale vei Mosese na Kalou, “Mo tukuna vakaoqo vei ira na Isireli, ‘O Jiova, na nodra Kalou na nomuni qase, na Kalou i Epara-ama, na Kalou i Aisake kei na Kalou i Jekope sa talai au mai vei kemuni; sai koya oqo na yacaqu ka tawa mudu, ka sai koya oqo na noqu i tutu ena veitabatamata kecega.

¹⁶ Mo lako ka vakasoqoni ira vata na qase e Isireli, ka tukuna vei ira ni o au, o Jiova, na Kalou ni nomuni qase, na Kalou i Epara-ama, Aisake, kei Jekope, sa rairai mai vei au ka kaya, “Au sa rogoca na nomuni tagi kei na veika sa vakayacori vei kemuni mai Ijipita.

¹⁷ Au sa vakadeitaka oqo ni'u na kauti kemuni tani mai na veivakararawataki e Ijipita, ki na nodra vanua na kai Kenani, na Itaiti, na Amoraiti, na Perisaiti, na Aivaiti, kei na Jepusaiti, na vanua sa dave kina na sucu kei na oni.

¹⁸ “Era na rogoca na domomu, mo lako vata kei ira na qase ni Isireli vua na tui Ijipita ka kaya, ‘O Jiova, na nodra Kalou na Iperiu sa vakatakilai koya vei keimami; mo ni laivi keimami me keimami lako ki na vanua lala ka la'ki vakacaboisoro vua me tolu na siga.’

¹⁹ Ia au sa kila ni o tui Ijipita ena sega ni laivi kemuni mo ni lako, vakavo ga kevaka ena qai vakasaurarataki ena dua na liga kaukauwa.

²⁰ Ia ka'u na dodoka na ligaqu ka ravuti Ijipita ena cakacaka vakadomobula e veivakurabuitaki ka'u na vakayacora kina, ni oti oqo ena qai laivi kemuni o koya.

²¹ “Ia ka'u na cakava me ra taleitaki kemuni o ira na kai Ijipita; ni kemuni sa na lako, o ni na sega ni lako liga lala.

²² Ia o ira yadua na yalewa ni Isireli me ra kerea mai vei ira na i tokani yalewa ni Ijipita na i sulu, na koula, kei na i ukuuku talei sa buli mai na siliva. Era na daramaka na veika oqo o ira na Isireli vei ira na luvedra tagane kei na yalewa, ka kauta yani na nodra i yau na kai Ijipita.”