Lako Yani 2 - Vakavakadewa Vou kei na iVola tale eso

Na Sucu nei Mosese

¹ A sa dua na tamata ena yavusa i Livai sa la'ki vakawatitaka e dua na yalewa ena kawa i Livai.

² A sa kunekune na yalewa oqo ka vakasucuma e dua na gonetagane, ia ni sa raica o koya ni sa mata vinaka na gone, a mani vunitaki koya tiko me tolu na vula.

³ Ia ni sa sega ni vunitaki koya rawa, a qai talia e dua na kato kuta ka dregata ena drega me kakua kina ni curuma na wai. A sa biuta na gonetagane ena loma ni kato ka vakacirima yani e uciwai, ena loma ni veikuta.

⁴ A sa tu mai vakayawa na tuakana yalewa me raica na cava ena yaco vua na gone.

⁵ A sa lako sobu mai na luvenitui goneyalewa me mai sisili e uciwai ka ra a lako vata mai kei ira na nona dauveiqaravi. Sa qai raica o koya na kato ena veikuta ka mani tala yani na nona vada me la'ki kauta mai.

⁶ Ia ni dolava o koya na kena i sogo a raica sara na gone. A tagi na gone ka sa lomani koya sara vakalevu ka kaya, “Oqo e rairai luvena sara ga e dua vei ira na Iperiu.”

⁷ A sa lako yani na ganena na gonetagane ka tukuna vua na luvenitui yalewa, “Me'u vakasaqara li mai e dua na yalewa ni Iperiu me qarava na gone vei kemuni?”

⁸ A sauma na luvenitui yalewa ka kaya, “Io.” A lako yani na goneyalewa ka kauti tinadrau mai.

⁹ A sa kaya vua na luvenitui, “Kauta na gonetagane oqo ka qaravi koya ena vukuqu, ia ka'u na saumi iko ena vuku ni nomu veiqaravi.” A sa kauta na gone na yalewa ka qaravi koya.

¹⁰ Ia ni sa tubu cake na gone, a sa kauti koya lesu tale vua na luvena yalewa na tui, a sa susuga me luvena. A sa kaya, “Ni'u a dreti koya tani mai wai, au na vakatoka kina me yacana o Mosese.”

Sa Dro ki Mitiani o Mosese

¹¹ Ni sa tamata levu sara o Mosese, a sa lako yani vei ira na wekana, o ira na Iperiu, ka sarava na nodra vakasaurarataki ena cakacaka vakabobula. A sa raica talega e dua na kai Ijipita ni mokuta tiko e dua na Iperiu, na kai nona.

¹² A sa veiraiyaki, ia ni sa sega ni dua e raici koya, a sa qai mokuta mate na kai Ijipita ka buluti koya ena nuku.

¹³ Ni sa lako tale yani o koya ena siga ka tarava, a sa raica e rua na Iperiu ni rau veivala tiko vakataki rau, a mani kaya vua ka caka cala, “A cava na vuna o sa mokuta kina na wekamu, na Iperiu oqo?”

¹⁴ A sauma o koya ka vaka, “O cei sa lesi iko mo mai liutaki keimami ka lewai keimami? O sa nanuma beka mo vakamatei au me vaka na nomu vakamatea na kai Ijipita?” Ia ni sa rogoca na ka oqo o Mosese, a sa rere vakalevu ka kaya e lomana, “Era sa kila na tamata na ka au sa vakayacora.”

¹⁵ Ia ni sa rogoca na ka oqo na tui, a sa vakasaqarai Mosese me vakamatea. Ia sa mani dro tani kina mai vua na tui o Mosese ka la'ki tiko ena nodra vanua na kai Mitiani, ka dabe sobu ena bati ni keliwai.

¹⁶ Ia na nodra bete na kai Mitiani o Jacoro, a sa vitu tiko na luvena yalewa. E ratou a lako mai me taki wai, ka ratou mai vakatawana na i gunugunu me ra gunu kina na manumanu i tamadratou.

¹⁷ Ia ka so tale na i vakatawa ni manumanu era a lako mai ka cemuri ira tani na nodratou manumanu. A sa tucake o Mosese ka taqomaki iratou, ka vakatawa talega na wai me ra gunu kina na nodratou qele ni sipi.

¹⁸ Ni ratou sa lako yani vei tamadratou, a sa qai tarogi iratou mai o koya ka vaka, “A cava dou sa lesu totolo mai kina edaidai?”

¹⁹ E ratou a sauma ka kaya, “E dua na kai Ijipita a vukei keitou mai vei ira na i vakatawanisipi, ka takiva talega na wai me ra gunu kina na sipi.”

²⁰ A sa kaya vei ira na luvena yalewa o koya, “Sa evei o koya? A cava dou sa biuti koya tu yani kina? Dou la'ki sureti koya mai me tou mai kana vata.”

²¹ A sa vakadonuya o Mosese me tiko ena vanua o ya, ka sa mani solia o Jacoro ki vua na luvena yalewa o Sipora me watina.

²² A sa vakasucuma o Sipora e dua na luvena tagane. Sa kaya e lomana o Mosese, “Ni'u sa tiko vulagi ena vanua oqo, au na vakatokai koya kina me yacana o Kerisomi.”

²³ Sa qai mate na tui Ijipita ni sa oti e vuqa na yabaki. Ia era se tagi voli ga na Isireli ena vuku ni nodra vakabobulataki, ka ra sa tagi vua na Kalou me ra vukei.

²⁴ A sa rogoca na Kalou na nodra tagi, ka sa nanuma na nona yalayala vei Epara-ama, vei Aisake, kei Jekope.

²⁵ A sa raica na Kalou na nodra vakabobulataki na Isireli, ka sa kauwaitaki ira.