Kalatia 5 - Vakavakadewa Vou kei na iVola tale eso

Ni Taqomaka na Nomuni Galala

¹ Sa vagalalataki keda na Karisito me da sa galala vakadua. Mo ni tu dei sara kina, ka kakua ni soli kemuni tale mo ni bobula.

² Ni rogoca! Oi au o Paula, ka'u sa kaya vei kemuni ni kevaka o ni sa vakatara mo ni cilivi ga, sa na sega kina ni yaga na Karisito vei kemuni.

³ Au via vakadeitaka tale mada vei ira na tamata yadua era cilivi ni ra sa vauci me ra muria sara na Lawa taucoko.

⁴ O ni sa tawasei kemuni tani mai vei Karisito oi kemuni o ni via vakadonui ena Lawa, o ni sa tu ena taudaku ni loloma-savu ni Kalou.

⁵ Ia oi keimami, keimami sa nuitaka ni na vakadonui keimami na Kalou; sai koya oqo na ka keimami waraka tiko, ka sa rawa ena kaukauwa ni Yalo Tabu sa cakacaka ena noda vakabauta.

⁶ Ni da tu vata kei Karisito Jisu, sa sega ni kauwaitaki kina na cili se na tawa cili, na vakabauta ga sa vakavatukanataki ena loloma.

⁷ O ni a toso vinaka sara e liu, o cei ga sa tarovi kemuni mo ni kakua ni talairawarawa ki na i vakavuvuli dina?

⁸ Na mataqali veisiwati vakaoqo sa sega ni vu mai vua na Kalou, o koya sa kacivi kemuni.

⁹ E dua na i vakatubu lailai walega ena vakatubutaka na i buli taucoko.

¹⁰ Au sa vakanuinui tu ena noda tu vata kei na Turaga ni o ni na lomavata kei au, ia o koya ga e vakacalai kemuni ena cudruvi koya na Kalou, veitalia ga se o cei sara mada ga o koya.

¹¹ Ia oi au, kemuni na wekaqu, kevaka au sa vunautaka tiko ni dodonu ga na veicilivi, au na sega ni vakararawataki tale tiko. Kevaka au vunautaka na ka oqo, ena qai sega na leqa ena yaco ena noqu vunautaka na kauveilatai.

¹² Au gadreva ke ra muduki ira sara ga o ira era gadreva mo ni cilivi ka kakua ni vakasagai kemuni tale tiko.

¹³ O ni a sa kacivi, na wekaqu, mo ni galala, mo ni qai kakua ni vakayagataka na nomuni galala me lewai kemuni kina na nomuni gagadre vakayago, ia mo ni veivukei tikoga ena loloma.

¹⁴ Ni sai soqoni ni Lawa taucoko e duabau ga na i vakaro, “Mo lomana na kai nomu me vakataki iko.”

¹⁵ Ia kevaka ga o ni veicati ka veivakacacani tikoga vakai kemuni, mo ni qarauna de o ni veivakarusai ga vakai kemuni.

Na Yalo Tabu kei na i Tovo Vakayago

¹⁶ Ia, me'u kaya, ni laiva na Yalo Tabu me liutaka na nomuni bula; o ni na sega kina ni vakayacora na gagadre ca ni tovo vakayago.

¹⁷ Ni sa dau veivala na gagadre ni tovo vakayago kei na Yalo Tabu, ka sa dau veivala na Yalo Tabu kei na i tovo vakayago, ni rau sa veimecaki oi rau oqo, o ni na sega kina ni dau cakava rawa na ka o ni vinakata dina.

¹⁸ Ia kevaka sa tuberi kemuni tiko na Yalo Tabu, o ni na sega ni vakarorogo ki na ruku ni lewa ni Lawa.

¹⁹ Ia sa macala votu tu ga na cakacaka ni tovo vakayago: na dauveibutakoci, na i vakarau vakasisila, na i valavala velavela,

²⁰ na dausoro ki na matakau, na daucakaisausau, na dauveicati, na dauveileti, na dauveiqati ca, na daucudrucudru, na dauqara ga na ka me nona, na veisei kei na veitovaki vakailawalawa,

²¹ na dauvuvu, na daumateni, na daumarau vakalialia, kei na veika vaka o ya. Au via vakasalataki kemuni me vaka au a sa vakasalataki kemuni kina e liu, ni ra na sega ni curu ki na matanitu ni Kalou o ira era dau cakava na veika oqori.

²² Ia na vua ni Yalo Tabu na loloma, na reki, na vakacegu, na vosota vakadede, na cakacaka loloma, na yalovinaka, na yalodina

²³ na yalomalumalumu, na lewai koya rawa vakai koya. E sega na lawa me vakacalai kina na veika oqo.

²⁴ O ira sa nei Karisito era sa vakota ki na kauveilatai na i tovo vakayago kei na kena veidodomo ca, kei na kena veigagadre ca kecega.

²⁵ Ia kevaka sa bula e yaloda na Yalo Tabu, me liutaki keda tikoga na Yalo Tabu.

²⁶ Me da kakua ni gadreva me da dokai walega, se veivakacudrui se veivuvutaki.