Kalatia 4 - Vakavakadewa Vou kei na iVola tale eso

O Ni sa Luve ni Kalou

¹ Ia me'u kuria, na gone me na taukena na i yau nei tamana sa qaravi me vaka ga e dua na bobula ena gauna e se gone lailai kina, ka dina ga ni sa nona tu na i yau kecega i tamana.

² Ni se gone lailai, ena tiko vakarorogo ga o koya vei ira na dauveisusugi kei ira na qase me yacova na gauna lokuci e sa nakita oti o tamana.

³ Sa vakakina oi keda; ni da a se gone, eda a bobula tu ki na veivakavuvuli makawa ni veiyalo ni vuravura oqo ni bera ni da yacova na matua vakayalo.

⁴ Ia ni sa yaco mai na kena gauna dodonu, sa qai tala mai na Luvena na Kalou. A sucu mai vua e dua na yalewa ka mai bula voli ena ruku ni lewa ni Lawa vaka-Jiu,

⁵ me mai voli ira kina vakadua era sa tiko ena ruku ni lewa ni Lawa, me da yaco rawa kina me da luve ni Kalou.

⁶ Ni o ni sa luvena, sa tala mai kina na Kalou na Yalo ni Luvena ki na lomada, o koya sa dau kaci, “Apa, Tamaqu.”

⁷ Ia oqo o ni sa sega tale kina ni bobula, o ni sa luvena sara ga. Ena solia na Kalou na ka kecega e tu vua vei ira na luvena.

Sa Lomaleqataki Ira na Kai Kalatia o Paula

⁸ E liu ni o ni a sega ni kila na Kalou, o ni a nodra bobula tu kina na veika era sa sega ni kalou eso.

⁹ Ia edaidai ni o ni sa qai kila na Kalou; se me'u kaya, sa qai kilai kemuni oqo na Kalou, ia o ni sa qai lesu tale vakaevei li ki na veiyalo malumalumu ka tawayaga eso? Na cava o ni sa via nodra bobula tale kina na veika oqo?

¹⁰ O ni sa vakatatabutaka na siga eso, kei na vula eso, kei na gauna eso kei na yabaki eso.

¹¹ Au sa lomaleqataki kemuni, de na qai maumau wale na noqu veiqaravi vei kemuni.

¹² Oi kemuni na wekaqu, au sa vakamasuti kemuni, mo ni vakataki au, ka ni'u sa vakataki kemuni talega oi au. O ni a sega ni bau caka ca vei au;

¹³ o ni kila ni a vu mai na dua na noqu tauvimate na i matai ni noqu la'ki vunautaka yani na i tukutuku vinaka vei kemuni.

¹⁴ Ia o ni a sega sara ni beci au se vakasisilataki au kina, dina ga ni a vakatovolei kemuni na i tutu ni yagoqu oqori. Ia o ni a ciqomi au ga me vaka au agilosi ni Kalou, me vaka sai au o Karisito Jisu.

¹⁵ Sa evei na nomuni veirekitaki o ya? O ni rui qaravi au vinaka. Kevaka au kerea na matamuni ke o ni a leuta ka solia vei au.

¹⁶ Ia na cava sa yacovi kemuni oqo? Au sa qai nomuni meca beka ni'u sa vosataka na ka dina vei kemuni?

¹⁷ Era sa vakaraitaka na tamata oqori na nodra taleitaki kemuni vakalevu, ia e sega ena i naki vinaka; era via vagolei kemuni tani ga vei au ka mo ni vinakati ira vakalevu kina.

¹⁸ E ka vinaka ke ra dau galeleti kemuni vagumatua tikoga ena i naki vinaka, ka sega ga ena gauna au sa tiko vata kina kei kemuni.

¹⁹ Kemuni na luvequ, au sa vaka e dua na tina e vakasucu. E yacovi au na mataqali vutu vaka o ya ena vukumuni me yacova ni sa buli oti na i tovo i Karisito ena nomuni bula.

²⁰ Au sa gadreva sara ga me'u tiko vata kei kemuni oqo, me bau veisau kina na noqu i tovo ni vosa vei kemuni. Ni'u sa rui lomaleqataki kemuni.

Na i Vakatautauvata Baleti Eka kei Sera

²¹ Ni tukuna mada vei au, oi kemuni ka via tiko ga ena ruku ni lewa ni Lawa, o ni sa sega beka ni rogoca na ka e kaya na Lawa?

²² Ni sa volai tu ena i Vola Tabu ni a rua na luve i Epara-ama tagane, e dua mai vua na yalewa bobula, ka dua mai vua na yalewa galala.

²³ E a sucu me vaka na kena i vakarau vakatamata o koya na luve ni yalewa bobula, ia o koya na luve ni yalewa galala sa sucu me vakayacori kina na vosa ni yalayala ni Kalou.

²⁴ Ia oqo na i balebale ni vakatautauvata: sa rua na veiyalayalati ka sai rau na yalewa e rua oqo. E dua mai na Ulunivanua o Saineai ka vakasucumi ira na gone me ra bobula, oqori o Eka.

²⁵ Ia o Eka sa vakatautauvatataki kei na Ulunivanua o Saineai mai Arapea. Sa i dusidusi o koya kei Jerusalemi edaidai, ni sa tiko vakabobula kei ira kece na lewena.

²⁶ Ia sa galala o Jerusalemi vakalomalagi mai cake, sai koya na tinada.

²⁷ Ni sa volai tu ena i Vola Tabu, “Mo reki o iko na yava ka sega ni vakaluveni! Mo kaila ka qolou ena marau, o iko ka se bera vakadua ni vakila na mosi ni taratara! Ni ra na lewe vuqa cake na luvena na yalewa sa biuti koya o watina, Mai vei koya ka tiko ga kei na watina.”

²⁸ Oi keda, kemuni na wekaqu, eda sa vakataki Aisake ni da sa gone ni yalayala.

²⁹ Ia me vaka a caka ena gauna o ya, sa caka talega edaidai, sa vakacacani koya ka a sucu ena vuku ni Yalo Tabu o koya ka a sucu me vaka na i vakarau ni sucu vakatamata.

³⁰ Ia na cava li a kaya na i Vola Tabu? “Vakasava tani na yalewa bobula kei na luvena, ni rau na sega ni taukei vata e muri o koya na luve ni yalewa bobula, kei na luve ni yalewa galala.”

³¹ Sa vakakina, oi kemuni na wekaqu, eda sa sega ni luve ni yalewa bobula, eda sa luve ga ni yalewa galala.