Kalatia 1 - Vakavakadewa Vou kei na iVola tale eso

¹ Oqo na i vola i Paula na i apositolo; na i lesilesi oqo sa sega ni vu mai vei ira na tamata, se me a dewa mai vakatamata, ia sai lesilesi sara ga mai vei Jisu Karisito kei na Kalou o Tamada, o koya ka a vakaturi Jisu cake tale mai na mate.

² Era sa duavata kei au na i vavakoso eke ena vakanuinui vinaka vei kemuni na veisoqosoqo lotu mai Kalatia.

³ Me nomuni na loloma kei na vakacegu mai vua na Kalou na Tamada, kei na noda Turaga o Jisu Karisito,

⁴ o koya ka soli koya yani ena vuku ni noda i valavala ca, me vakabulai keda kina mai na gauna ca oqo, me vaka na loma ni noda Kalou o Tamada,

⁵ o koya sa kilikili me vakarokorokotaki ka sega ni mudu! Emeni.

Na Kosipeli e Duabau

⁶ Au sa kurabuitaki kemuni dina sara! E sega so ni dede walega na nomuni sa biuti koya tale ka a kacivi kemuni ena loloma-savu i Karisito, ka vuki tani mo ni la'ki ciqoma e duatani tale na kosipeli.

⁷ Na i tukutuku dina ga oqo: ni sa sega ni “dua tale na kosipeli”; ka'u sa kaya vakaoqo baleta ni sa tiko maliwai kemuni eso na tamata era sa vakasosataki kemuni tiko ka tovolea me ra vakatanitaka na kosipeli i Karisito.

⁸ Ia kevaka mada ga sa vunautaka vei kemuni e dua vei keitou se dua na agilosi mai lomalagi e dua na kosipeli ka duatani mai na kena keitou sa vunautaka vei kemuni, me rusa vakadua o koya.

⁹ Keitou sa kaya oti e liu, ka me'u kaya tale mada: kevaka e dua e vunautaka vei kemuni e dua na kosipeli sa duatani mai na kena o ni sa ciqoma ka vakabauta taumada, me yaco ga vua na rusa tawamudu!

¹⁰ E kena i rogorogo beka oqo ni sa vaka me'u vakasaqara tiko na veivakadonui ni tamata? E segai sara! Au sa gadreva ga na veivakadonui ni Kalou! Au sa tovolea tiko beka me'u taleitaki vakalevu mai vei ira na tamata? Kevaka au se tovolea tikoga oqo, au sa qai sega ni dauveiqaravi nei Karisito.

Na Kacivi nei Paula me i Apositolo

¹¹ Kemuni na veiwekani, au gadreva me'u vakaraitaka vei kemuni ni sa sega ni ka vakatamata na kosipeli ka'u sa vunautaka voli.

¹² Ni'u a sega ni ciqoma oqo mai vua e dua na tamata, se me'u a vakatavulici kina. Ia sa vakatakila ga vei au na Turaga o Jisu Karisito.

¹³ O ni sa na rogoca na noqu i valavala e liu ni'u se tiko ena nodra vakabauta na Jiu. Au a vakacacana vakalevu sara na i soqosoqo lotu ni Kalou, ka saga me'u vaqeyavutaka.

¹⁴ A toso cake vakatotolo sara na noqu i tutu vakalotu mai vei ira tale eso keitou taba vata, me vaka ni'u sa yalodina vakalevu ki na nodra i vakavuvuli na noda qase.

¹⁵ Ia na Kalou, ena nona loloma-savu levu, a sa digitaki au ni bera na noqu sucu, ka sa kacivi au me'u qaravi koya. Ena gauna sa vakatulewataka kina o koya ena marau

¹⁶ me vakatakila na Luvena vei au ka me'u rawa kina ni vunautaka na i Tukutuku Vinaka me baleti koya vei ira na kai matanitu tani, au a sega ni qai la'ki taro i vakasala tale vua e dua,

¹⁷ se me'u lako cake ki Jerusalemi ka raici iratou sai apositolo taumada vei au. Ia ka'u sa lako sara ki Arapea, ka qai lesu tale ki Tamasiko.

¹⁸ Ni sa oti e tolu na yabaki, au sa qai lako cake ki Jerusalemi me'u la'ki sota kei Pita, ka'u a tiko vata kaya voli ka macawa rua.

¹⁹ Au a sega ni raica e dua tale vei iratou na i apositolo, o Jemesa ga na tacina na Turaga.

²⁰ Sa dina taucoko na veika au sa vola oqo. Sa kila na Kalou ni'u sa sega ni vosa lasu!

²¹ Ni oti o ya, au a qai lako sara ki na veiyasana mai Siria kei Silisia.

²² Era a se sega ni kilai au sara kina o ira na lewe ni soqosoqo lotu Vakarisito mai Jutia ena gauna o ya.

²³ Era sa dau rogoca tu ga na veika era sa tukuna eso tale, me vakaoqo, “O koya ka dau vakacacani keda eliu sa vunautaka tiko edaidai na vakabauta vata ga sa tovolea taumada me vaqeyavutaka!”

²⁴ Era sa qai vakalagilagia kina na Kalou ena vukuqu.