Josua 9 - Vakavakadewa Vou kei na iVola tale eso

Lawakitaki Josua o Ira na Kipioni

¹ Ia ni ra sa rogoca o ira kecega na tui ena ra ni Joritani na nodra qaqa na Isireli o ya o ira kece na tui ena vanua ena baravi ni Wasa Meditereni me yaco sara ki Lepanoni ena vualiku; o ira na nodra tui na Itaiti, na Amoraiti, o ira na kai Kenani, kei ira na Perisaiti, na Aivaiti kei ira na Jepusaiti.

² Era sa qai soqoni vata ka yalo vata me ra vorati Josua kei ira na Isireli.

³ Ia ni ra sa rogoca na kai Kipioni na ka sa vakayacora o Josua vei Jeriko kei Ai,

⁴ era sa qai nakita me ra lawakitaki koya. Era sa la'ki kauta mai eso na kakana ka tawana ena taga makawa kei na waini ena taga ni waini e botani, me ra vakayagataka o iratou me matataki ira.

⁵ E ratou sa vakaivava ena i vava makawa, ka vakaisulu ena i sulu kakadresudresu. Sa bulagi ka tauvi faqasi na madrai e ratou kauta voli me kedra i vaqa.

⁶ E ratou sa qai lako yani vei Josua ena keba mai Kilikali ka tukuna vua kei ira na Isireli, “Keitou lako mai ena dua na vanua yawa sara. Mo ni vakayacora mada e dua na veiyalayalati kei keitou.

⁷ Era sa qai tukuna na Isireli vei iratou na kai Kipioni, “Na cava na vuna me keimami veiyalayalati kina kei kemudou. O cei e kila, de dou lako vakavoleka ga mai.”

⁸ Era sa qai tukuna vei Josua, “Keitou sa vakarorogo ga ki na nomuni lewa.” Sa qai tarogi iratou o Josua, “O cei mada o kemudou? Dou kai vei?

⁹ E ratou sa qai vakamacala vua ka tukuna vakaoqo: “Keitou lako saka mai ena dua na vanua yawa ni keitou rogoca na i rogorogo me baleti Jiova na nomuni Kalou. Keitou sa rogoca na i tukutuku ni veika kece e sa vakayacora mai Ijipita,

¹⁰ kei na veika e sa vakayacora vei rau na nodra tui na Amoraiti ena tokalau ni Joritani: vei Sioni na tui Esiponi ka vakakina vei Oki na tui Pasani ka tiko mai Asitoreci.

¹¹ Era sa tukuna vakaoqo na neitou qase kei ira na lewe ni neitou vanua, ‘Mo dou vakarautaka na kemudou i vaqa ena dua na i lakolako; dou lako yani ka veivosaki kei ira ka tukuna, “Oi keitou na nomuni tamata; mo ni veiyalayalati mada kei keitou.”

¹² Ni raica mada na keitou madrai, sa se buta katakata sara tu ga ena siga keitou biuta mai kina na neimami vanua, me keitou mai raici kemuni. Ia ni raica mada oqo; sa mamaca tu ka tauvi faqasi.

¹³ Na neitou taga kuli-ni-manumanu ni waini era se ka vou ena gauna era sa vakasinaiti kina ena waini. Ia ni raica mada oqo! Era sa kakadresudresu. Sa madra talega na neitou i sulu kei na neitou i vava ena taubaletaki ni sala balavu.”

¹⁴ Era sa qai tovolea na kedra kakana o ira na Isireli, ka ra sega mada ni vakasaqara na i vakasala i Jiova.

¹⁵ Sa qai cakava o Josua e dua na veiyalayalati ni veisaututaki kei iratou, me ratou kakua kina ni vakarusai. Era sa qai vakadeitaka na veiyalayalati na qase ni Isireli, ena vosa bubului.

¹⁶ Ni sa oti e bogi tolu mai na gauna ka caka kina na veiyalayalati, era sa qai kila na Isireli ni ra tiko volekati ira ga na tamata oqo.

¹⁷ Era sa qai lako yani na Isireli, ka yaco yani ki na nodra veikoro ni oti ga e bogi tolu. Na yaca ni nodra veikoro o Kipioni, o Kefira, o Pieroci, kei Kiriaci Jiarimi.

¹⁸ Ia era a sega ga ni rawa ni vakamatei ira baleta ni ra sa bubului oti ena dua na veiyalayalati ni veisaututaki kei ira, o ira na nodra qase, ena yaca i Jiova na Kalou ni Isireli. Era sa vosa kudrukudru vei ira na qase o ira kecega na tamata ena vuku ni ka oqo.

¹⁹ Era sa qai sauma na nodra vosa o ira na qase ka tukuna, “Eda sa yalayala ka bubului vei ira ena yaca i Jiova na Kalou ni Isireli. Ia oqo, sa tabu ni da vakarusai ira.

²⁰ Me da vakabulai ira ga, baleta ni da sa bubuluitaka me vakakina; ia kevaka e sega, ena cudruvi keda kina o Jiova na noda Kalou.

²¹ Me ra vakabulai ga; ia me ra noda i tata ni buka ka dau taki wai.” Oqori na veika era sa vakatura o ira na qase.

²² Sa qai vakarota o Josua me ra kau mai e matana o ira na kai Kipioni. A sa tarogi ira ka tukuna, “Na cava o ni sa lawakitaki keimami kina, ka tukuna ni o ni sa lako mai ena dua na vanua yawa, ni o ni sa vakaitikotiko ga e ke?

²³ Ena siga oqo ka lako yani o ni sa cudruvi mo ni sa na dauveiqaravi me vaka na dautabuka kei na dautakiwai ena vale ni noqu Kalou.

²⁴ Era sa qai tukuna vei Josua, “Keimami a cakava saka oqo baleta ni keimami sa rogoca ni dina na i rogorogo ni a vakarota o Jiova na nona tamata o Mosese me solia vei kemuni na vanua taucoko oqo, ka me vakamatei ira kece sara na veimataqali tamata era vakaitikotiko kina, ni o ni toso tiko mai. Keimami sa vakayacora ga oqo me baleta ni keimami sa rerevaki kemuni vakalevu; ka taqayataka na neimami bula.

²⁵ Ia oqo keimami sa tu ena ruku ni nomuni kaukauwa; mo ni vakayacora ga vei keimami na veika o ni nanuma ni dodonu.

²⁶ Sa qai taqomaki ira o Josua mai vei ira na Isireli me ra kakua ni vakamatei ira.

²⁷ Ia ena gauna vata o ya sa lesi ira me ra tamata dauveiqaravi me ra dautabuka ka dautakiwai vei ira na Isireli, ka vaka talega kina ki na i cabocabonisoro i Jiova. Era sa vakayacora tikoga na cakacaka oqo me yacova edaidai, ena vanua ni vakacaboisoro sa digitaka o Jiova na Kalou me qaravi kina.