Josua 8 - Vakavakadewa Vou kei na iVola tale eso

¹ A sa tukuna vei Josua o Jiova, “Kakua ni o yalolailai se rere; Kauti ira taucoko na tamata i valu, ka lako cake i Ai; Raica au sa soli ira oqo ki na ligamuni, na tui Ai kei ira na nona tamata, na kena veikoro kecega kei na vanua.

² Ia o na vakayacora vei Ai na kena tui na ka vata ga o a vakayacora vei Jeriko kei na kena tui, ia na i toki ni valu ga kei na manumanu mo ni maroroya me nomuni. Ia mo taura vakidacala na koro mai na daku ni koro.

³ Sa mani vakavakarau o Josua kei ira kece na tamata i valu, me ra lako ka valuti Ai. A sa digitaki ira e lewe 30,000 na sotia o Josua ka vakatalai ira yani ena bogi.

⁴ Ena i vakaro, “Mo ni taura vakidacala na koro, mai dakuna, kakua ni lako vakayawa mai na koro; ia o kemuni kece sara mo ni yadra ka vakarau tu.

⁵ Oi au, kei ira na sotia era tu vata kei au, keimami na lako vakadodonu yani ki na koro, ia, ni ra sa lako mai me valuti keimami, me vaka ga e liu, keimami na dro tani mai vei ira.

⁶ Ia era na cici muri keimami, me rawa ni keimami kauti ira tani rawa mai ena koro; ni ra na tukuna “Era sa dro tani mai vei keda me vaka ga e liu.” Ia ni keimami sa dro tani mai vei ira,

⁷ mo ni qai lamata cake vakasauri mai na nomuni i vunivuni, ka taura vakaukauwa na koro. Ena solia o Jiova na nomuni Kalou ki na ligamuni.

⁸ Ia ni o ni sa taura na koro, mo ni qai vakama me vaka na i vakaro i Jiova. Sai koya oqo na veika au sa vakarota vei kemuni.”

⁹ A sa vakatalai ira yani o Josua, ka ra sa lako yani ki na nodra i vunivuni me ra wawa e kea, o ya ena ra kei Ai, ena tadrua ni koro o Ai kei Peceli. A sa moce o Josua ena keba ena bogi o ya.

¹⁰ A sa yadra vakamataka o Josua, ka vakarautaki ira na tamata, ka lako cake, vata kei ira na qase ni Isireli vei ira na tamata mai Ai.

¹¹ O ira taucoko na sotia era sa tiko vata era sa lako cake, ka toro voleka yani ki na koro, ka la'ki tiko volekata sara na koro o Ai, ena yasana vaka ki na vualiku ni koro, ka sa toka e dua na buca ena kedra maliwa kei na koro.

¹² A sa digitaki ira e lewe 5,000 na sotia ka vakarautaki ira me ra tauri ira vakidacala na meca ena maliwa i Peceli kei Ai, ki na yasana vaka ki na ra kei Ai.

¹³ A sa vakarautaka na mataivalu, me ra vakarau tu ena vualiku ni koro o Ai, ka dua tale na i lawalawa mai na ra ni koro. Ia o Josua a tiko ga ena buca ena bogi taucoko o ya.

¹⁴ Ni sa raici ira na tamata i Josua o tui Ai, a sa vuki sara vakatotolo. A sa lako vakusakusa yani kei ira taucoko na nona tamata vaka ki na Buca o Joritani me valuti ira na Isireli ena vanua vata ga era sa sota oti kina, ia sa sega ga ni sa vakarau valuti mai dakuna.

¹⁵ Ia o Josua kei ira na Isireli, era sa vakaraitaka vakalecaleca ga ni ra sa vakadrukai mai vei ira ka dro yani vaka ki na loma ni veikau.

¹⁶ Era sa kacivi na tamata kece sara era tiko ena loma ni koro me ra cici muri ira na meca, ia ni ra cici muri Josua tiko, era sa lako tani mai na koro.

¹⁷ A sa sega tale ni vo tiko e dua na tagane ena koro, ena nodra cici muri ira na Isireli.

¹⁸ A sa tukuna na Kalou vei Josua, “Dodoka yani na i seleiwau sa tiko e ligamu vaka ki Ai, ni'u sa solia ki na ligamu.” A dodoka yani na nona i seleiwau o Josua ka vakanamata ki na koro.

¹⁹ Ena gauna ga a dodoka yani kina na nona i seleiwau, era sa tu na sotia era veivakidacalataki ka tu cake mai ka cici yani. Era curuma na koro, taura ka vakama.

²⁰ Ia ni ra sa rai lesu mai na kai Ai, sa kubou na koro ka sa vana ki lagi na kena kubou, ka sa sega vei ira na kaukauwa me ra dro kina vaka se vaka, ka ni o ira na Isireli ka dro vaka ki na veikau era sa vuki tale mai me sotavi ira na veivakasavi.

²¹ Ia ni sa raica o Josua kei ira na Isireli ni ra sa taura na koro o ira na sotia ka veivakakidacalataki, ka sa kubou talega na koro, era sa vuki lesu ka mokuti ira mate na kai Ai.

²² Era sa qai lako mai na Isireli ka tu ena koro me mokuti ira talega; era a kovuti taucoko na meca mai vei ira na Isireli, eso ena yasana oqo ka vakakina na yasana o ya, era sa qai veimoku na Isireli me yacova ni sa sega tale ni dua me vo se dro bula.

²³ Ia sa qai vesu bulabula o koya na tui Ai ka sa kau mai vei Josua.

²⁴ Ia ni sa oti na nodra vakamatei ira kece na meca; era a qai lesu na Isireli ki Ai, ka ra vakamatei kece na lewe ni koro ena bati ni nodra i seleiwau.

²⁵ Na levu ni tamata era sa vakarusai ena siga o ya, ka wili kina na tagane kei na yalewa sa lewe 12,000 — o ira kece sara na kai Ai.

²⁶ Ni sa sega ni vakasuka na ligana o Josua mai na i seleiwau me yacova ni sa sega tale ni dua na kai Ai e vo tiko ena koro o ya.

²⁷ Ia na manumanu wale ga kei na nodra i yaya ka sa i toki ni valu sa vo ena koro, me sa nodra, me vaka na vosa i Jiova a vakaroti Josua kina.

²⁸ A vakamai Ai o Josua ka cakava me dua na i binibini caca ni koro me tawa mudu me yacova mai na gauna oqo.

²⁹ Sa qai kukunataki na tui Ai, ka lili tu ena vunikau me yacova na yakavi ni sa dromu na siga me vaka na i vakaro i Josua, era a qai tukuca sobu na yagona mai na vunikau ka kolotaka ki na matamata ni koro. Era a vakaduria cake kina e dua na i buli qele levu ka duri tu me yacova na gauna oqo.

Sa Wiliki na Lawa e Ului Ipali

³⁰ A sa qai tara o Josua na i cabocabonisoro vei Jiova na Kalou ni Isireli ena ulunivanua o Ului Ipali,

³¹ ka me vaka ga na ka sa vakarota o Mosese na tamata ni Kalou vei ira na Isireli, me vaka ka sa volai tu ena Lawa i Mosese, “Me caka e dua na i cabocabonisoro ena veivatu sa sega ni ta mai na i yaya ni caka kaukamea.” Era sa qai vakacabora kina vei Jiova na i soro kama kei na i solisoli ni veivinakati.

³² Ia ena matadra kecega na Isireli, a sa vola kina o Josua ena vatu na i lavelave ni Lawa i Mosese.

³³ O ira kece sara na Isireli, vei ira na vulagi kei na i taukei, kei ira na nodra qase, kei na nodra i vakalesilesi, kei ira na daunilewa, era sa duri veibasai ena yasa ruarua ni Kato ni Veiyalayalati, e matadra na bete mai na kawa i Livai era colata tu na Kato ni Veiyalayalati i Jiova; e veimama na i wase ni tamata era tucake vakanadakuya tu na ulunivanua o Qerisimi ka tucake vakanadakuya tu na ulunivanua o Ipali na i wase veimama tale kadua, me vaka sa vakarota taumada na tamata ni Kalou o Mosese me ra na vakalougatataki kina na Isireli.

³⁴ Ni sa oti o ya, sa qai wilika o Josua vei ira na veika kece me baleta na Lawa, ka okati kina na vosa ni veivakalougatataki kei na vosa-ni-cudru se veivakalougatataki, me vaka sara sa volai kece tu ena i vola ni Lawa.

³⁵ Na vosa ni vunau kecega nei Mosese sa wilika o Josua kivei ira na lewenivanua era sa soqoni vata mai, ka wili kina o ira na marama kei ira na gone, ka vakakina o ira na vulagi era bula veimaliwai.