Josua 5 - Vakavakadewa Vou kei na iVola tale eso

Na Veicilivi e Kilikali

¹ Era sa rogoca o ira kece na nodra tui na Amoraiti ena ra ni Joritani kei ira kece na nodra tui na kai Kenani ena baravi ni Wasa Meditereni ni sa vakadiva o Jiova na wai ni Joritani me yacova ni ra takoso taucoko na Isireli. Era a rere sara kina vakalevu, ka yali na nodra yalo dei ena vukudra na Isireli.

² Sa qai tukuna vei Josua o Jiova, “Mo cakava eso na i sele mai na vatu gagata, ka cilivi ira kina na Isireli.”

³ A sa cakava o Josua na i sele vatu gagata ka cilivi ira kina na Isireli mai Kipeaci-araloci.

⁴ Oqo na vu ni nona cakava na ka oqo: o ira kece na tagane era a lako tani mai Ijipita, kei ira kece na tamata i valu era a mate kecega e gaunisala.

⁵ E dina ga ni ra a cilivi kece o ira ka biuti Ijipita mai, ia o ira kecega era a sucu ena vanua lala donuya na i lakolako mai Ijipita era sa sega ni cilivi.

⁶ Era a veilakoyaki voli na Isireli ena loma ni vanua lala me yabaki vasagavulu, ni ra sa mate kece o ira ka okati na nodra yabaki ni bula me ra tamata i valu ni ra biuti Ijipita mai. Era sa mate ena vuku ni nodra talaidredre vei Jiova. A sa yalataka oti vei ira o koya ni ra na sega ni raica na vanua sa yalataka vei ira na nodra qase me na solia vei ira, o ya na vanua sa dave kina na sucu kei na oni.

⁷ Sa qai vakatuburi ira cake na luvedra tagane me kedra i sosomi, ka sai ira oqo ka cilivi ira o Josua. Era sa sega tu ni cili, baleta ni sa sega ni rawa me ra cilivi e gaunisala.

⁸ Ni ra cilivi oti na tagane kece era sa tiko ga ena nodra keba me yacova ni sa mavo na we ni sele.

⁹ A sa qai tukuna vei Josua o Jiova, “E daidai, au sa bokoca tani kina mai vei kemuni na veivakamaduataki ni nomuni bobula mai Ijipita.” Sa vakatokai kina na vanua o ya me o Kilikali me yacova na siga edaidai.”

¹⁰ Ena yakavi, na i katinikava ni siga ni vula o ya, ni ra keba tikoga mai Kilikali ena bucabuca mai Jeriko, era a solevutaka kina mai kea na Isireli na Lakosivia.

¹¹ Ena siga ka tarava na Lakosivia, era sa qai tovolea kina na kakana e teivaki e Kenani: o ya na sila tavu kei na madrai sega ni vakatubu.

¹² Ena siga oqo ni ra sa tekivu kania na vuata ni vanua, a sa mudu talega ni lutu mai na mana vei ira na Isireli. Mai na gauna o ya, era sa kana ga mai na vuata ni vanua o Kenani.

Na Raivotu i Josua

¹³ Ni sa voleka yani ki Jeriko o Josua, a raica e dua na tamata ni tucake tu e matana, a ucuna na nona i seleiwau ka taura tu e ligana. A sa lako cake vua o Josua ka tarogi koya, “O sa to kei keimami, se o keimami meca?”

¹⁴ A sa sauma mai o koya, ka tukuna, “Sa sega, ena vukuna e dua! Au sa lako mai me vaka na turaganivalu ni mataivalu i Jiova,” A qai davo sobu vakatoboicu ena vakarokoroko o Josua, ka tukuna. “Oi au na nomuni tamata, na cava o ni vinakata me'u cakava?”

¹⁵ A sa qai sauma o koya na turaganivalu ni mataivalu i Jiova ka tukuna, “Mo luvata tani na i vava mai na yavamu, ni sa qele tabu na vanua o sa tu kina.” A sa qai cakava vakakina o Josua.