Josua 3 - Vakavakadewa Vou kei na iVola tale eso

Takosova na Joritani o Ira na Isireli

¹ A sa sou ena mataka o Josua, kei ira kecega na lewe i Isireli, ka biuti Sitimi me ra lako ki na Joritani, ka keba mai kea ni ra sa takoso ki tai kadua.

² Ena i katolu ni siga, era sa curuma yani na loma ni keba o ira kece na vakailesilesi ni tamata se dauveiliutaki

³ ka vakaroti ira na tamata vakaoqo, “Ni o ni sa raici ira na bete ni ra sa colata yani na Kato ni Veiyalayalati i Jiova na nomuni Kalou, mo ni cokia na nomuni valelaca ka muri ira.

⁴ Era na liutaki kemuni ena sala mo ni muria, ka ni a sega mada ni dua vei kemuni sa lako oti e ke. Mo ni kakua sara ni lako volekata yani na Kato ni Veiyalayalati, ka me rauta e dua na kilomita na kemuni yawa ki muri.”

⁵ Sa qai vosa vei ira na tamata o Josua, ka kaya, “Mo ni vakasavasavataki kemuni ni na vakayacora o Jiova na cakacaka mana levu vei kemuni ni mataka.”

⁶ Sa qai vosa vei ira na bete o Josua, ka tukuna, “Dou laveta cake na Kato ni Veiyalayalati ka colata ki liu me ra muri yani na tamata.” Era sa cakava me vaka sa tukuna o Josua.

⁷ A sa kaya vei Josua o Jiova, “Au na tekivu vakalevulevui iko edaidai ena matadra na Isireli taucoko me ra kila kina ni'u sa tiko vata kei iko, me vaka ga na noqu a dau tiko vata kei Mosese.

⁸ Mo vakaroti ira na bete era colata tiko na Kato ni Veiyalayalati me ra sobu yani ka la'ki tucake tu vakadua e loma ni uciwai ena gauna era sa yaco yani kina ki na bati ni wai na Joritani.”

⁹ Sa qai kaya vei ira na Isireli o Josua, “Ni toro mai, ka mai rogoca na vosa i Jiova na nomuni Kalou.

¹⁰ Oqo na i vakatakilakila o ni na kila kina ni sa tu vata kei kemuni o Jiova na Kalou bula, ka na vakasavi ira vakaidina na Kenanaiti, na Itaiti, na Ivaiti, na Perisaiti, na Kakesaiti, na Amoraiti kei ira na Jepusaiti mai na matamuni o koya.

¹¹ Raica, na Kato ni Veiyalayalati i Jiova na Kalou ni vuravura taucoko ena liu vei kemuni ki na Joritani.

¹² Mo ni digitaka e lewe tinikarua na tagane, ka me yadua mai na veimataqali kece e Isireli.

¹³ Ia ena gauna era na butuka kina na wai ni uciwai na Joritani o ira na bete ka ra colata tiko na Kato ni Veiyalayalati i Jiova, ena qai mudu vakasauri na drodro ni uciwai, ka bini cake vata na wai ena dua na yasana.”

¹⁴ Ia ni ra sa uruca na nodra veivalelaca me ra takosova na Joritani, era sa qai lako yani e liu o ira na bete era colata tiko na Kato ni Veiyalayalati.

¹⁵ A sa dau waluvu wasoma na bati ni Joritani ena gauna o ya ni sa donumaka na vula i tatamusuki. Ia, ena gauna ga era sa yaco yani kina ki na bati ni Joritani o ira na bete ka ra colata tiko na Kato ni Veiyalayalati, ni sa sobu sara yani na yavadra ki wai,

¹⁶ a sa qai mudu vakasauri na drodro sobu mai ni wai. Era a bini vata na wai ena tolo ni uciwai ki cake, donuya na koro o Atama ena yasayasa vaka-Saricani, ka muduki sara kina na drodro sobu ni wai ki na Waitui Mate. Era sa qai takoso ki na tai kadua o ira na Isireli ena vanua sa veidonui kei Jeriko.

¹⁷ Ena gauna era sa taubale takoso tiko kina na tamata ena qele mamaca, era sa tucake tu vakadua o ira na bete ka colata tiko na Kato ni Veiyalayalati i Jiova ena lomadonu ni uciwai na Joritani ena qele mamaca, me yacova ni ra sa takoso kece sara na Isireli ki na tai kadua.