Josua 18 - Vakavakadewa Vou kei na iVola tale eso

Kena Wasewasei na Vo ni Vanua

¹ Ni ra sa vakamalumalumutaka na vanua, era a qai soqoni vata e Sailo o ira kece na Isireli, ka birika e kea na Vale ni Veitavaki.

² E lewe vitu na mataqali i Isireli, ka sa vo tiko me votai na nodra i votavota ni qele.

³ Sa qai tukuna o Josua vei ira na lewe i Isireli, “A cava sara mada na balavu ni gauna o ni na wawa tiko kina ni bera ni o ni lako ka taukena na vanua ka solia oti vei kemuni o Jiova na nodra Kalou na nomuni qase?

⁴ Ni digitaka mai vei au e yatolu na tamata mai na veimataqali yadua. Au na talai ira me ra la'ki butuka na vanua taucoko, ka droinitaka sara vakamatata na qele era vinakata me ra taukena. Ni oti o ya me ra qai lesu tale mai vei au.

⁵ Ena wase ga vakavitu na qele; ena tiko ga ena kena vanua ena ceva o Juta, kei Iosefo ena kena vanua ena vualiku.

⁶ Mo ni vola na i vakamacala ni yalayala ni tiki ni qele vituvitu oqori, ka kauta mai vei au. Au na qai vakawiri madigi, ena vukumuni, ka taro i vakasala vei Jiova na noda Kalou.

⁷ Ia, o ira na kawa i Livai ena sega ni soli vei ira e dua na i votavota ni qele me vakataki kemuni na kena vo, baleta ni sa nodra i votavota ga me ra qaravi Jiova ena i tutu vakabete. Era a sa taura oti na nodra qele ena tokalau ni Joritani na mataqali i Kata, na mataqali i Rupeni, kei na veimama ni mataqali i Manasa, me vaka a solia vei ira na tamata ni Kalou o Mosese.”

⁸ Era sa qai gole yani o ira na la'ki vola na i vakamacala ni vanua ni sa vakaroti ira oti o Josua ena i vakaro oqo: “Mo ni lakova na vanua taucoko sara, ka droinitaka vakamatata na i yalayala, ka kauta tale mai vei au. Au na qai vakawiri madigi ka taro i vakasala vei Jiova ena vukumuni ena vanua oqo o Sailo.”

⁹ Era a qai lako yani ka lakova na vanua taucoko, wasea vakavitu, ka vola vakamatata na kedra dui yalayala kei na kedra veikoro. Ni oti o ya era sa qai lesu tale mai vei Josua ki na keba e Sailo.

¹⁰ Sa qai vakawiri madigi o Josua me tarogi Jiova kina ena vukudra ka solia vei ira yadua na vo ni mataqali i Isireli e yadua na i votavota ni vanua.

Nodra Vanua na Penijamini

¹¹ E a solia e liu na nodra vanua na veivuvale ena mataqali i Penijamini. Sa koto na nodra vanua ena veimama ni mataqali i Juta kei na mataqali i Iosefo.

¹² Na kena i yalayala ena vualiku e tekivu ena uciwai na Joritani, ka ciciva cake na baba ena vualiku kei Jeriko, ka gole vaka ki na ra me basika ki na vanua veidelana me yaco sara ki na vanua lala o Peciaveni.

¹³ Mai kea, sa qai cici yani na i yalayala ki na baba ena ceva kei Lusa (sa vakatokai talega o Peceli), ka siro sobu ki Ataroci Atari ena ulunivanua ka koto ena ceva kei Pecironi e ra.

¹⁴ Sa qai takelo e ke na i yalayala me gole ki na ceva mai na yasa i ra ni ulunivanua oqo, ka lako yani ki Kiriaci Peali (oqo talega o Kiriaci Jiarimi), ka nodra na mataqali i Juta.

¹⁵ A sa tekivu ena i bili kei Kiriaci Jiarimi na kena i yalayala ena ceva, ka gole vaka ki na ra me yaco ki na Waivure mai Nefitoa.

¹⁶ Sa gole sobu na i yalayala ki na ruku ni ulunivanua ka irova sobu na Buca o Peni-Inomi, ena muana ki na vualiku ni Buca i Refaimi. Sa qai cici vaka ki na ceva ka curuma na Buca i Inomi ena ceva ni tokaitua ni Jepusaiti ka gole yani ki Enirokeli.

¹⁷ A sa gole ki na vualiku ki Eni-semesi, ka lako yani ki Qeliloci, ka veibasai kei na i curucuru o Atumimi. A qai gole sobu na i yalayala ki na Vatu i Poani a luve i Rupeni,

¹⁸ ka cici vaka ki na vualiku ni tokaitua era irova sobu na Buca o Joritani, ka siro ki na buca,

¹⁹ ka cici vaka ki na vualiku ni tokaitua o Peci Okila, me la'ki cava sara ena gusu ni Waitui Mate ena vualiku, na tobu ka drodro yani ki na Joritani. Oqo na kena i yalayala ena ceva.

²⁰ Na kena i yalayala ena tokalau na Joritani. Sai koya oqori na veiyalayala ni vanua ka nodra i votavota na veivuvale ni mataqali i Penijamini.

²¹ Oqo na veikoro ka nodra na veivuvale ena mataqali i Penijamini: o Jeriko, Peciokila, Emekesisi,

²² Peci-arapa, Simareimi, Peceli,

²³ Avimi, Para, Ofira,

²⁴ Kifari-Amoni, Ofini, kei Kipa: e tinikarua na koro lelevu kei na kedra veikoro lalai.

²⁵ Ka vaka talega kina o Kipioni, Rama, Pieroci,

²⁶ Misipe, Kifira, Mosa,

²⁷ Rikemi, Iripeli, Tarela,

²⁸ Sela, Elefi, Jepusa o ya o Jerusalemi, Qibea kei Kiriaci-jiarimi: e tini ka va na koro lelevu kei na kedra veikoro lalai. Oqo na nodra i votavota ka soli vei ira na veivuvale ni mataqali i Penijamini, me ra taukena.