Josua 16 - Vakavakadewa Vou kei na iVola tale eso

Vanua e Nodra na Ifereimi

¹ Na vanua ka nodra i votavota na kawa i Iosefo a tekivu mai na Joritani volekati Jeriko, ena tokalau ni veivurevure ni wai e Jeriko ka gole yani ki na vanua lala. A lako mai Jeriko ki na vanua veidelana me yaco sara ki Peceli.

² Mai Peceli a gole vaka ki Lusa, ka lako yani ki Ataroci Atari na nodra i tikotiko na Ariki.

³ Sa qai gole yani ki na i dromudromu ni siga ki na nodra vanua na Jofiliti me yaco yani ki na muana sara e ra ni vanua o Peci Oroni. Mai kea ki Keseri me yaco sara ki na Wasa Meditereni.

⁴ Era sa taura na vanua oqo me nodra i votavota o ira na kawa i Iosefo, o ya o ira na veimama ni mataqali i Manasa kei na mataqali i Ifereimi.

⁵ Oqo na nodra vanua na veivuvale ni mataqali i Ifereimi: na nodra i yalayala e vakatekivu mai Ataroci Atari ka gole vaka ki na tokalau me yaco sara ki na muana e cake ni vanua o Peci Oroni,

⁶ ka lako yani mai kea ki na Wasa Meditereni. Sa koto ena kena vualiku o Mikimecaci. Mai kea a sa gole yani vaka ki Tenaci Sailo, ia sa lako ravita ga na yasana ki na tokalau me yaco sara ki Janoa.

⁷ Mai Janoa ki Ataroci, Neeraci kei Jeriko, ka yaco sara ki na Joritani.

⁸ Mai Tapua a cici yani na i yalayala ki na ra ni uciwai o Kana ka yaco sara yani ki na Wasa Meditereni. Oqo na vanua a soli me nodra i votavota na veimatavuvale ni mataqali i Ifereimi me ra taukena,

⁹ vata kei na koro lelevu kei na koro lalai eso, ka toka ena nodra vanua na Manasa, ia a soli ga me nodra na Ifereimi.

¹⁰ Ia era sega ni mani vakasavi ira tani rawa na kai Kenani ka ra vakaitikotiko mai Qasa. Era a bula maliwai ira na Ifereimi o ira na kai Kenani me yacova na siga oqo, ia era a vakasaurarataki ira ga me ra cakacaka me vaka na bobula.