Josua 1 - Vakavakadewa Vou kei na iVola tale eso

Vakaroti Josua o Jiova

¹ Ni sa mate na tamata ni Kalou o Mosese, sa qai vosa o Jiova vei Josua na luve i Nuni, na i vukevuke i Mosese, ka tukuna,

² “Sa mate o Mosese na noqu tamata. Mo tu vakarau, o iko kei ira kece na Isireli mo ni takosova na Uciwai na Joritani ka lako ki na vanua au na solia vei ira.

³ Me vaka na ka au a tukuna vei Mosese, au na solia vei kemuni na vanua kece ena butuka na qeteqete ni yavamuni.

⁴ Na i yalayala ni nomuni vanua e tekivu mai na vanua lala ena ceva ki na veiulunivanua o Lepanoni ena vualiku. Mai na uciwai levu na Uferetisi ena tokalau, ka takosova na nodra vanua na Itaiti me yaco ki na Wasa Meditereni ena yasana ki na ra.

⁵ I Josua, ena sega ni rawa vua e dua me vakadrukai iko ena veisiga kecega o bula kina. Au na tiko ga kei iko me vaka au a dau tiko kei Mosese ka'u na sega ni laivi iko.

⁶ Mo kaukauwa ka qaqa, ka la'ki taukena na vanua au a yalataka me'u solia vei ira na nodra qase.

⁷ Mo kaukauwa ka yaloqaqa. Qarauna mo talairawarawa ki na noqu Lawa kece sara sa vakarota vei iko na noqu tamata o Mosese. Kakua ni vakawaletaka e dua na tikina, o na qai tamata yaco ena vanua ga o lako kina.

⁸ Mo nanuma mo dau wilika na i vola ni Lawa ena veigauna kecega ni sokalou. Mo wilika ka vakananuma ena veisiga kei na veibogi kece, ka cakava na veika kece sara sa volai kina, o na qai kalougata ka tamata rawa ka.

⁹ Mo nanuma na noqu i vakaro, ‘Mo kaukauwa ka qaqa!’ Mo kakua ni rere se yalolailai, ni na tiko vata kei iko o Jiova na nomu Kalou ena vanua kecega o na lako kina.”

Vakaroti Ira na Tamata o Josua

¹⁰ Sa qai vakaroti ira na nodra i vakalesilesi na tamata o Josua,

¹¹ me ra lako yani ki loma ni keba ka tukuna vei ira na tamata, “Mo ni vakarautaka na kemuni kakana ni o ni sa na kosova na uciwai na Joritani ni oti e tolu na siga me la'ki taukeni na vanua sa solia vei kemuni o Jiova na nomuni Kalou.”

¹² A qai tukuna o Josua vei ira na mataqali i Rupeni, kei na mataqali i Kata kei na veimama ni mataqali i Manasa,

¹³ “Mo ni nanuma na vosa ka vakaroti kemuni kina na tamata ni Kalou o Mosese: ‘O Jiova na nomuni Kalou sa solia vei kemuni na vakacegu kei na vanua oqo, mo ni vakaitikotiko kina.’

¹⁴ Me ra tiko ga ena tokalau ni Joritani, ena vanua ka sa solia vei kemuni o Mosese o ira na watimuni, na luvemuni, kei ira na nomuni manumanu. Ia o ira na nomuni sotia me ra vakaiyaragi ni vala, ka liutaki ira yani na vo ni veimataqali ni Isireli. Ia mo ni vukei ira na wekamuni

¹⁵ me yacova sara ni ra sa taukena na vanua ena tai kadua ni Joritani, na vanua sa solia o Jiova na nomuni Kalou. Ni sa solia vei ira kecega na veimataqali i Isireli o Jiova me ra tiko vinaka ka vakacegu mai na i valu, mo ni qai lesu tale mai ki na tai oqo ni Joritani na vanua ka solia vei kemuni o Mosese na tamata ni Kalou.”

¹⁶ Era sa qai tukuna vei Josua, “Keimami na vakayacora na veika kece o ni sa vakaroti keimami kina, ka lako talega ki na veivanua o ni na talai keimami kina.

¹⁷ Keimami na vakarorogo ki na nomu lewa, me vaka keimami sa dau vakarorogo vei Mosese. ‘Me tiko ga vei kemuni Josua o Jiova na nomu Kalou, me vaka sa dau tiko kei Mosese!

¹⁸ Na tamata e taroga na nomu veiliutaki, se talaidredre ki na nomu i vakaro ena vakamatei. Mo kaukauwa ka tu dei!”