Jope 9 - Vakavakadewa Vou kei na iVola tale eso

Sauma o Jope ni Sega e Veivakaduavatataki

¹ A qai sauma o Jope, ka kaya,

² Io, au sa kila ni oqori sai tukutuku dina. Ia ena rawata beka vakacava e dua na tamata Me savasava sara ena mata ni Kalou?

³ O cei li na tamata e bolea me rau veileti kaya? Kevaka e taroga vua e udolu na taro, Ena sega mada ga ni duabulu e sauma rawa.

⁴ Sa rui vuku ka kaukauwa na Kalou, Ka sega ni dua e rawa ni rau veisaqa.

⁵ Sa tosoya na veiulunivanua ka sega na tamata e kila, Ka vukica ena nona cudru kaukauwa.

⁶ Na Kalou sa tala mai na uneune levu me kureitaka na vanua; Sa yavalata na i vakadei kei vuravura.

⁷ Sa rawa vua na Kalou me tarova na cabe cake ni matanisiga; Ka tarova na cila ni veikalokalo ena bogi.

⁸ Sa sega ni dua e vukea na Kalou ena nona tuva na lomalagi, Ka sa cakava vakaikoya ga na butuki ni dela ni ua ni wasawasa.

⁹ Na Kalou ga sa bulia na veikalokalo me vaka na Bea kei na Orioni, Na Peliatisi kei na yatu kalokalo ena ceva.

¹⁰ Sa dredre sara me da kila na veika lelevu sa cakava na Kalou, Ka sa sega ni vakaiyalayala na nona cakacaka mana.

¹¹ Ni sa lako siviti au na Kalou, au sa sega ni raici koya rawa; Ka'u sa sega ni vakilai koya ni sa lako raviti au.

¹² Sa na taura ga na Kalou na ka e vinakata, Ka na sega ni dua e tarovi koya rawa.

¹³ Na cudru ni Kalou sa sega ni mudu rawa. Na nona meca kece sa vakarusa; Oqori o ira era a vukei Rapi na tevoro ni wasawasa Ena nodra valuta na noda Kalou.

¹⁴ Au na kunea rawa vakacava na vosa Me saumi kina na taro a taroga?

¹⁵ E dina ga ni'u sega ni cala, Ia na ka ga au rawa ni cakava, Sa i koya me'u kerea na yaloveivosoti Mai vua na Kalou na noqu turaganilewa.

¹⁶ Kevaka sa mani vakakina, me sa laivi au me'u vosa, Au sega ga ni vakabauta ni na vakarorogo mai o koya.

¹⁷ E a tala mai o koya na cagilaba Me mai samuti au me'u mavoa sara; Ia, e sega mada ga na vuna vinaka.

¹⁸ E sega ni laivi au na Kalou me'u cegu vakavinaka mada; Ka ni ka e cakava vei au sa vakavuna ga na noqu rarawa.

¹⁹ Me'u sa tovolea beka vua na i tovo kaukauwa, E me sa veilewaitaki. O cei oqo ena tabaka na kena samani?

²⁰ Au sa vakabauta tikoga, ka'u sega ni cala, Ia na i rogorogo ga ni noqu vosa e cala, Ka rairai me vakacalai au kecega na veika au kainaka.

²¹ Oi au e sega na noqu cala, Ia au sa sega ni kauwaitaka. Sa ca vei au na bula tiko. Sa ka ni oca vei au.

²² Sa veitalia na ka kecega; Se da cala se da dodonu Ena vakarusai keda ga na Kalou.

²³ Ni mate vakasauri e dua na yalododonu, Sa qai dredre na Kalou.

²⁴ E a solia oti na vuravura na Kalou vei ira na tamata ca. E a vakamatabokotaki ira talega na turaganilewa. Kevaka a sega ni cakava na Kalou na ka oqo, ia o cei ga?

²⁵ Era sa vuka tiko yani na veisiga ni noqu bula, Ka sa totolo, ia sa sega ni dua vei ira e bau siga vinaka.

²⁶ Sa toso ni bula sa totolo dina vaka na waqa totolo, Sa vaka na ikeli ni sa vukaca sobu mai na ka me kania.

²⁷ Ke'u mani kaya, ‘Au na guilecava na noqu vosa kudrukudru; Ka'u na qai biuta laivi ga na noqu vakaveveku mata ka matadredredre,’

²⁸ Ia sa dau lesu ga mai na noqu rarawa me vakarerei au; Ka'u sa kila ni sa beitaki au ga na Kalou ni'u sa cala.

²⁹ Me vaka ni'u sa beitaki ena cala, A cava ga me'u qai kauwaitaka?

³⁰ Na noqu cala e sega sara ga na sovu e rawa ni savata.

³¹ E viritaki au ki na dua na i sovasova ni benu na Kalou, Ia na noqu i sulu mada ga e vakasisilataki au sara.

³² Kevaka e tamata na Kalou bula, ia ena rawa ni'u sauma vua; Ena rawa talega ni keirau la'ki veilewai me wali kina na neirau kisi ni veileti.

³³ Ia sa sega ni dua me turaganilewataki keirau, Sa sega e dua me lewai au vata kei na Kalou.

³⁴ Kemuni na Kalou, mo ni muduka mada na nomuni vakanakuitataki au! Mo ni kauta tani talega na nomuni ka ni veivakarerei!

³⁵ Au sa sega ni rere. Au sa na vosa ga Baleta ni'u kila vinaka na ka e tu e lomaqu.