Jope 8 - Vakavakadewa Vou kei na iVola tale eso

Vosa o Vilitati: E Dodonu me Veivutuni o Jope

¹ A qai vosa o Vilitati na luve i Sua, ka kaya,

² I Jope, mo kila tiko ni vosa, na cagi. A cava soti na dede ni nomu vosa tiko vakaoqo?

³ Na Kalou e sega sara ni dau moica vakaveve na ka dodonu; Ka sega ni bau daro vakadua na nona caka dodonu.

⁴ E ratou a sai valavala ca dina ga na luvemu vua na Kalou, Sa i koya sa kuitataki iratou kina ena i totogi e rauti iratou.

⁵ Ia oqo mo qai saumaki mai ka cike matua Vua na Turaga na Kalou Kaukauwa.

⁶ Kevaka o tamata savasava ka dodonu na nomu tiko, Ena qai lako mai na Kalou ka mai vukei iko, Ka vakavoutaka tale na nomu vuvale kei na nomu i tikotiko Me nona ka ni vakavinavinaka vei iko.

⁷ Na i yau e a yali vei iko e liu e lailai sara Ka sega ni rawa ni o vakatauvatana kei na kena levu Ena qai solia vei iko na Turaga.

⁸ Vakasamataka mada vakalekaleka na vosa vuku ni gauna makawa; Ka vakananuma na veika dina era a kila tu na tamada.

⁹ O keda eda a qai sucu ga ena noa, ka lailai na ka eda kila. Na noda bula e vuravura e sega ni dei, Rui lekaleka wale ga ni sa sega ni wili me dua na ka. Eda sega ni wili ni da sai yaloyalo wale ga.

¹⁰ Laiva me ra vakavulici iko na vuku makawa; Ka rogoca mada, na ka oqo era a kainaka:

¹¹ E sega ni bula rawa na kuta ena qele mamaca; E rawa wale ga ni bula ena vuci se na vanua suasua sara.

¹² Ena malai duadua e liu na kuta kevaka sa maca na wai, Ia kevaka sa musu ena sega ga na betena ni ra sa rui lalai

¹³ Na tamata lecava na Kalou kei na veikuta oqori E sega na kedrau duidui, Baleta ni guileca ga na Kalou, Sa qai yali na nodra i nuinui.

¹⁴ Era vakararavi tiko ki na dua na vunikau vuca.

¹⁵ Kevaka era ravita na vunikau vuca, Era na sega beka ni bale vata kaya? Kevaka era lilita e dua na taba ni kau oqori, Era na sega beka ni lutu vata?

¹⁶ Na tamata ca sa vaka e dua na vunikau bulabula, Sa tete yani na tabana ka vakaruguta na vanua.

¹⁷ Na wakana talega era sa tete, Ka ra salava na veivatu e loma ni qele.

¹⁸ Ia ni ra sa cavuti laivi ga Ena sega e kila ni ra a tiko taumada e kea.

¹⁹ Na nodra marau na tamata ca sa vaka wale tu ga oqori; Era na qai tubu tale mai e kea eso me kedra i sosomi.

²⁰ O ira na tamata vinaka, dina ka dodonu, E sega ni dau biuti ira na Kalou. Ia, e sega dina sara ga ni dau vukei ira na tamata ca.

²¹ Raica, ena vakamarautaki iko na Kalou, Ka na levu na nomu dredre kei na qoqolou.

²² Ena luvuci ira na nomu meca o koya ena madua, Ka na vakarusai ira na tamata i valavala ca.