Jope 6 - Vakavakadewa Vou kei na iVola tale eso

Sausaumi Lesu o Jope

¹ E sauma o Jope, ka kaya,

² Kevaka e vakarautaki na bibi ni noqu leqa kei na noqu rarawa,

³ Na noqu vosa vakaveitalia me kakua ni vakurabuitaki kemudou.

⁴ Sa cacabolobolo vei au na gasau titi ni Kalou, Na kena gaga sa robota kecega na yagoqu; Kei na nona veivakarerei kece sara sa yatuna oti tu me'u na sotava.

⁵ Ni kakana voli e dua na asa, ka vakakina na bulumakau, E rau sa dui wele sara ga ka mamarau.

⁶ Ia o cei sara mada e rawa ni kania na kakana Dranudranu e sega ni vakamasima? E rawa sara talega ni'u na taroga Na i kanakana ni vulavula ni yaloka.

⁷ Na kakana vakaoqo e yali kina na noqu viakana, Kevaka au kania, ena rawa ni'u luaraka.

⁸ A cava beka e sega tiko kina ni vakayacora na Kalou Na ka au kerea? A cava e sega kina ni sauma mai na noqu masu ena ka au gadreva?

⁹ Au na sega ni tukuna rawa na levu ni noqu marau, Kevaka e dodo liga sara ga mai oqo na Kalou ka vakamatei au.

¹⁰ Ke'u kila rawa ni sa na vakamatei au, Au na ladelade, ka rika ena levu ni noqu marau; Ka'u na sega ni via vakila na mosi levu ka tu vei au. Au kila tu ni Kalou e dodonu sara ka savasava Ka'u sega mada ni sa bau saqata na nona lewa.

¹¹ Na kaukauwa cava soti e sa taura tiko na noqu i cegu? Au sa wili cala tu ka'u sa via mate yani me'u cegu.

¹² Na noqu i cegu e sega ni ka kaukauwa sara Me vaka na kaukauwa ni vatu se na kaukauwa ni parasa.

¹³ Sa sega na kaukauwa e vo tiko vei au Me rawa kina ni'u vakabulai au vakataki au; Ka sega na vanua me'u gole rawa kina me rawa ni'u bau vukei mai kina.

¹⁴ Ena gauna ni leqa me vaka au sa tiko kina, Au gadrevi ira vakalevu na noqu i tau yalodina, Se'u sa qarava tikoga na Kalou se'u sa vakanadakuya.

¹⁵ Ia o kemudou na noqu i tau lomani, O dou mai cakava ga na nomudou veivakacalai me vaka e dua na uciwai, Ni lauqa ga na vanua ka mai maca tu yani.

¹⁶ E sinai koto na uciwai ena wai cevata, Ia ni sa katakata na vanua sa qai waicala,

¹⁷ Ka mani kune tu yani na botodra ni ra sa mamaca.

¹⁸ Era vaqaqara wai voli yani na i lala levu dauveilakoyaki; Era mai seseta na sala ka lako vakaveitalia Ka ra mani mate kecega ena vanua dravuisiga.

¹⁹ Ni ra vaqaqara wai na i lala dauveilakoyaki Mai na vanua o Sipa kei ira na Timani,

²⁰ Era a qai leqa ka ra veilecayaki Ni ra a maca kece tu na veiuciwai.

²¹ Au vakatauvatani ira na uciwai oqori vata kei kemudou Baleta ni dou raica na ka ena yacovi au qai vuka na yalomudou.

²² Au kerea beka e dua na i loloma mo dou solia vei au, Se mo dou la'ki temaka e dua ena ka e baleti au,

²³ Se mo dou kauta nomudou i lavo se na i yau vei ira na meca Se na dauveivakasaurarataki me ra sereki au?

²⁴ Sa vinaka, au sa na tiko lo me'u vakarorogo mada, Dou tukuna kece sara mai na cala au a cakava.

²⁵ Na i le yalomatua au na rawa ni vakadinata, Ia na nomudou i tukutuku e rui galala.

²⁶ O dou nanuma ni noqu vosa na cagi wale ga; Ia na cava ga o dou sauma tiko mai kina na noqu tagi ni nuinui ca?

²⁷ O ira mada na luveniyali bobula dou qai veimautaki ira, Ka saga vei ira na nomudou i tau na i sau vinaka me ra voli kina!

²⁸ Dou raica vakavinaka mai na mataqu. Au na sega sara ni lasu.

²⁹ Na nomudou vosa sa rui sivia. Na nomudou veibeitaki vakailasu mo dou tinia. Dou kakua ni beitaki au me'u ca kina. Oi au, au tu ga ena dodonu kei na dina.

³⁰ Ia o kemudou, o dou nanuma ni'u sa lasu tikoga, Ka nanuma ni duidui ni dodonu kei na cala au sega ni kila.