Jope 5 - Vakavakadewa Vou kei na iVola tale eso

¹ I Jope, mo yalo vinaka ka kaci mada yani. De lakolako ena sauma mai e dua.

² Na nomu vakaleqa vakasivia na lomamu ena nomu yalo ca, Sa rui ka lialia ka yalowai talega.

³ Au raica na tamata e lialia vakalevu sara Ni tiko dei ga ka tiko vinaka; Ia a qai lutuka vakasauri na nona vale e dua na sau me vu ni Nona mate.

⁴ O ira na luvena era sega ni tiko vinaka rawa, Ni ra na buturaki kecega e matamata, Ka sega ni dua e vukei ira rawa.

⁵ O ira ga na viakana tu, era na rawa ni kania na ka e tea na lialia; Ka ra kania talega na sila ka tubu tu vakaveitalia; Ia na nona i yau kecega, era na veidomoyaka na daugunu dra.

⁶ E sega ni dau bula ena qele na leqa kei na i valavala ca.

⁷ E sega sara ga! Ia na tamata duadua sara ga e dau vakaleqai koya tu ga, Me vaka ni rui ka dina sara na kena dau lidi na bukawaqa.

⁸ Oqo ga na noqu i vakasala: Gole sara ga oqo vua na Kalou ka tusanaka vua na nomu cala.

⁹ E dredre me da kila rawa, na ka lelevu e dau cakava; Kei na nona cakacaka mana ni sega ni dau vakaiyalayala.

¹⁰ Sa vakatauca mai o koya na uca ki na qele, Ka vakasuasuataka na veilomanivanua.

¹¹ Io, o ira na yalo malumalumu sa laveti ira cake na Kalou, Ka vakamarautaki ira era tiko vakaloloku.

¹² Sa vakasevai ira na tamata lawaki ca ena nodra i naki,

¹³ Ka vakatacoritaki ira na tamata qaseqase ena nodra i lawaki, Ka me kakua kina ni yaco rawa na ka era dau bukiveretaka.

¹⁴ Ia ni sigalevu tutu sara tu mada ga, Ena vaka ga na butobuto ni ra vakayayamo voli ga.

¹⁵ Na Kalou ga sa taqomaki ira na luveniyali mai vei ira na daulawaki; Ka maroroi ira na vakaloloma kei na dravudravua Mai na veivakasaurarataki ni tamata i tovo kaukauwa.

¹⁶ O koya sa qai nodra kina na nuidei na tamata tu vakaca Ni ra sa tababokoci na tamata i valavala ca.

¹⁷ Me qai marau sara mada na tamata sa vakadodonutaka na Kalou! Na nona vunauci iko na Tamada, Mo kakua ni lule se yalocataka.

¹⁸ Na mavoa kecega sa vakayacora na Kalou, Ena vadretitaka; Kevaka ena vakamavoataki iko na ligana, Sa na veivakabulai talega na ligana.

¹⁹ Ena veigauna kecega Sa dau taqomaki iko kina o koya mai na veika ca;

²⁰ Ni sa yaco mai na dausiga levu Ena qarauna mo bula tikoga, Ia ni sa yaco na i valu, Ena taqomaki iko mo kakua ni mate.

²¹ Ena sabaya tani vei iko na lasu Kei na vosa vakacaca ni gusuda; Ena viribaiti iko ni basika mai o rusa.

²² O na dredrevaka na veivakarusai kei na dausiga, Ka sega ni rerevaka na manumanu kila eso.

²³ Na tikinivanua kecega o siviyarataka Era na kau tani kina na veivatu me galala vinaka; Ka ra na sega ni katalaki iko na manumanu daukata.

²⁴ O na qai tiko vakacegu ena nomu valelaca; O na rai yani ka raici ira na nomu sipi ni ra tu welewelei sara.

²⁵ Era na lewe vuqa na luvemu kei na nomu kawa Me vaka na i wiliwili ni drau ni co ena dua na i kanakana.

²⁶ Me vaka na witi ka tamusuki ni sa matua vinaka, O iko talega o na qai mate ni o sa matua ka qase sara.

²⁷ Na ka kece oqo Jope, Keitou kila mai na vakadidike dede keitou a cakava. E ka dina taucoko ka dodonu mo rogoca, Ka kila me rawa kina ni o vinaka.