Jope 41 - Vakavakadewa Vou kei na iVola tale eso

¹ O na rawa li ni dreti Livaiacani mai Ena dua na bati ni siwa? Se vesuka na yamena ena dua na dali?

² O na rawa li ni daramaka na dali ki na ucuna? Se curumaka ki na galegalena na i qila?

³ Ena kerei iko beka o koya mo laivi koya ga me lako? Se me vakamasuti iko mo bau lomani koya?

⁴ O drau na cakava vata beka e dua na veiyalayalati Ka yalataka me qaravi iko ka sega ni mudu?

⁵ O na qito vata li kei koya me vaka e dua na manumanu susu? Se o na vauca vua e dua na dali me nodra i vakalasa na nomu goneyalewa?

⁶ Era na veisisivitaka beka na dauqoli na i sau me voli kina? Era na seleseleti koya beka na dauveivoli me volitaki?

⁷ E rawa beka ni o cobara wavoki e yagona na moto ni cocoka? Se mo vana lamuta na nona qavokavoka ena gasau ni vana ika?

⁸ Kevaka o tarai koya, o na sega tale vakadua ni via cakava tale; Ka sega ni guilecava rawa na nomudrau veimulomulo!

⁹ Na tamata ga e sa raici Livaiacani Sa vakayalia na nona yalodoudou Ka sa bale sobu ki na qele.

¹⁰ Ni sa vakacudrui, sa ka levu sara na kena rerevaki; O cei e yatedei rawa me tu e matana?

¹¹ O cei e rawa ni veivala kaya ka sega ni mavoa? Sa sega e dua e vuravura taucoko me na cakava rawa oqo.

¹² Me'u tukuna mada vei iko na yava i Livaiacani, Ka vakamacalataka talega na kena levu kei na nona kaukauwa.

¹³ Sa sega e dua me rawa ni dresulaka na nona kote e sau, Se me suabasikata na i sasabai vakaivalu e tokara tiko e taudaku.

¹⁴ O cei beka e rawa ni dolava na gusuna, Sa voliti tu ena batina vakadomobula?

¹⁵ Na dakuna sa buli ena i sasabai vakaivalu sa tuvai vakamaqosa, Era cokocokoti vata ka kaukauwa me vaka na vatu.

¹⁶ Era sa veikabiti vakaukauwa sara na i sasabai yadua, Ka sega na cagi me curuma rawa na kedra i sema.

¹⁷ Era sa semati vakavinaka sara Ka sa sega sara na ka me na basubasuki ira rawa.

¹⁸ E tibi na liva ni sa suru o koya, Ka sa waqa na matana me vaka na matanisiga sa cadra cake mai.

¹⁹ Sa caudre mai gusuna na yameyame ni buka, Ka veivukayaki na kena lidi ni buka.

²⁰ Sa kuvu mai na ucuna na kubou, Me vaka na kubou ni co malai sa vakamai tiko ena boto ni kuro.

²¹ Na nona i cegu e vakacaudreva rawa na buka; Ka ra babasika mai gusuna na yameyame ni buka.

²² Sa rui kaukauwa na domona Ka ra sa domobula kecega o ira sa sota kaya.

²³ Sa segai sara e dua na tikina malumalumu ena kulina; Ka sa vavaku ka kaukauwa me vaka na kaukamea.

²⁴ Sa kaukauwa na lomana me vaka na vatu, Io sa kaukauwa me vaka na vatu ni qaqi sila.

²⁵ Ni sa vude cake mai o koya, era sa bau rere talega o ira na qaqa; Ni sa vuka na yalodra ena levu ni nodra rere.

²⁶ Sa sega na i seleiwau me na rawa ni vakamavoataki koya, Se na moto, se na dakaititi, se na kau balavu.

²⁷ Ki vua, sa vaka wale ga na malumalumu ni tolo ni co na kaukamea, Ka vaka na malumalumu ni kau vuca na parasa.

²⁸ E sega na gasau ni dakaititi me na rawa ni cemuri koya tani; Kei na vatu sa virilaki kina sa vaka na i musumusu ni tolo ni co.

²⁹ Ki vua, na i yaragi ni valu ka sa vaka na tolo ni co, Ka tabalaka na dredre ni ra cokalaki koya na tamata ena moto.

³⁰ Na varina e ketena sa vaka na i vorovoro gagata ni kuro qele; Era seleseleta na qele ena vanua lolobo me vaka na qiqi ni tatamusuki.

³¹ Sa vakabutara na wai titobu me vaka na kerekere ni dua na kuro, Ka vakayavalata na wasawasa me vaka na buebue ni kuro waiwai.

³² Sa tatalivaliva na mawena ena vanua e muria Ka vukica na wasawasa me vuso vulavula.

³³ Sa sega na ka e vuravura me vakatauvatani vata kina; O koya e dua na i bulibuli sa sega vua na rere.

³⁴ A sa raica sobu na veimanumanu dokadoka kecega; Ni sa nodra tui na manumanu kila kecega.