Jope 40 - Vakavakadewa Vou kei na iVola tale eso

¹ A qai kaya vei Jope o Jiova,

² I Jope, o iko a bolea na Kalou Kaukauwa; O sa na qai soro beka ena gauna oqo? Se mo sa saumi taro mai?

Na Vosa i Jope vua na Kalou

³ A qai sauma o Jope ka vaka,

⁴ Kemuni Jiova, au a vosa tu ga vakalialia. A taro cava au na bau sauma rawa? Au sa na sega ni via tovolea me'u tukuna tale e dua na ka.

⁵ Na ka au sa tukuna oti e sa rui sivia sara ga.

Na Bolebole ni Kalou vei Jope

⁶ Mai na loma ni covulaca, sa qai vosa tale mai kina o Jiova vei Jope,

⁷ Tucake mada me vaka e dua na tagane Ka sauma mai na noqu taro.

⁸ O iko beka o tovolea tiko mo vakadinadinataka Ni'u Kalou sega ni dodonu

⁹ O tamata kaukauwa sara beka me vakataki au? E rawa beka ni vakuru vakadomoilevu na domomu me vaka na domoqu?

¹⁰ Kevaka e vakakina, ia mo tucake tu mada ena nomu sakitaki iko; Ka vakasulumi iko ena lagilagi kei na vakarokoroko.

¹¹ Raici ira mada na tamata viavialevu; Talaucaka vei ira na nomu cudru ka vakamaduataki ira.

¹² Io, mo vakawadravi ira ka toroi ira sobu ki ra; Vorolaki ira na tamata ca ena vanua era dui tu kina.

¹³ Buluti ira kece ki na qele; Ka vesuki ira tu ena nodra vuravura na mate.

¹⁴ Au sa na qai kena i sevu Me'u vakacaucautaki iko; Ka vakadinadinataka sara Ni o sa rawata ga vakai iko na qaqa.

¹⁵ Raica mada na tevoro o Pimoci; Au a buli koya, ka'u a buli iko talega. E dau kana co o koya me vaka na bulumakau,

¹⁶ ia sa dua na ka na kaukauwa ni cegu ka tiko vua, Ka sa dua na ka na kaukauwa ka tiko ena yagona!

¹⁷ E duri dodonu tu na buina me vaka e dua na sitari, Ka ra sa biriwakakau dina na viciko ni yavana.

¹⁸ Na kaukauwa ni suina e vaka na kaukauwa ni parasa Ia na yavadra era vaka na duru kaukamea.

¹⁹ Na i bulibuli kurabuitaki duadua vei ira na noqu i bulibuli! Na nona Dauveibuli duadua ga ena rawa ni rawai koya.

²⁰ Sa dau la'ki kau mai na co me mai kena Mai na veiulunivanua era dau kakana kina na manumanu kila.

²¹ Sa dau davo koto o koya ena ruku ni veikau vakavotona, Ka dau vuni koto ena veikuta ena veivanua lolobo.

²² Sa dau vakaruru tu ena rugurugua ni veivunikau vakavotona Kei na veiwilou ena bati ni uciwai.

²³ E sega ni bau rerevaka o koya na uciwai kui vakaukauwa, Ka dau vakawelewele ga ni sa robaka mai na matana na wai.

²⁴ O cei beka e rawa ni bokoca na matana ka me qai toboka? Se o cei ena tudaitaka rawa na ucuna balavu ena dua na dai?